കൊച്ചി: മെട്രോ നഗരത്തിന്‍റെ തിലകക്കുറിയായ മറൈൻ ഡ്രൈവ് വാക്ക് വേ രാത്രി 10 മുതല്‍ പുലര്‍ച്ച അഞ്ചു വരെ അടച്ചിടാനുള്ള ജി.സി.ഡി.എ തീരുമാനത്തിനെതിരെ വിവിധ ഭാഗങ്ങളില്‍നിന്ന് ശക്തമായ പ്രതിഷേധം ഉയര്‍ന്നു.
ജനപ്രതിനിധികള്‍, പൊതുജന കൂട്ടായ്മകള്‍, യാത്രക്കാര്‍, നഗരവാസികള്‍ തുടങ്ങിയവരുടെ ഭാഗത്തുനിന്നാണ് രാത്രിനിരോധനത്തിനെതിരെ എതിര്‍പ്പുയര്‍ന്നിരിക്കുന്നത്.
മറൈൻഡ്രൈവിലെ സാമൂഹ്യ വിരുദ്ധ ശല്യവും ലഹരി ഉപയോഗവും നിയന്ത്രിക്കാനാവാതെ വന്നതോടെയാണ് രാത്രി പത്തുമുതല്‍ പുലര്‍ച്ച വരെ പ്രദേശം അടച്ചുകെട്ടാൻ മേയര്‍ എം. അനില്‍കുമാറും ജി.സി.ഡി.എ ചെയര്‍മാൻ കെ. ചന്ദ്രൻപിള്ളയും വിളിച്ചുകൂട്ടിയ യോഗത്തില്‍ തീരുമാനിച്ചത്. തല്‍ക്കാലം ഒരു മാസത്തേക്കാണ് പരീക്ഷണാടിസ്ഥാനത്തില്‍ രാത്രി നിയന്ത്രണം നടത്തുന്നത്.
അധികൃതര്‍ സദാചാര പൊലീസ് ചമയുന്നു -എം.പി
കൊച്ചി: രാത്രി 10 മുതല്‍ പുലര്‍ച്ച അഞ്ച് വരെ മറൈൻഡ്രൈവില്‍ ഏര്‍പ്പെടുത്തിയ സന്ദര്‍ശക നിയന്ത്രണം പ്രതിഷേധാര്‍ഹമാണെന്ന് ഹൈബി ഈഡൻ എം.പി. വിഷയത്തില്‍ ജി.സി.ഡി.എയും കൊച്ചി കോര്‍പറേഷനും സദാചാര പൊലീസ് ചമയുകയാണ്. ആധുനിക സമൂഹത്തിന് ചേര്‍ന്ന നടപടിയല്ല ഇത്. സാമൂഹികവിരുദ്ധ പ്രവര്‍ത്തനങ്ങള്‍ തടയാൻ വേണ്ട ക്രമീകരണങ്ങള്‍ ഒരുക്കുകയാണ് അധികാരികള്‍ ചെയ്യേണ്ടത്. നടപടി അടിയന്തരമായി പിൻവലിക്കണമെന്ന് എം.പി ആവശ്യപ്പെട്ടു.
പിന്നില്‍ പൊലീസ് വീഴ്ച -എം.എല്‍.എ
സാമൂഹ്യവിരുദ്ധ ശല്യം ചൂണ്ടിക്കാട്ടി മറൈൻ ഡ്രൈവ് വാക്ക്-വേ രാത്രി അടച്ചിടേണ്ടി വരുന്നത് പൊലീസിന്‍റെ വീഴ്ചയാണെന്ന് ടി.ജെ. വിനോദ് എം.എല്‍.എ കുറ്റപ്പെടുത്തി. ജനങ്ങളുടെ സഞ്ചാര സ്വാതന്ത്ര്യം നിഷേധിച്ചല്ല ക്രമസമാധാന പാലനം ഉറപ്പ് വരുത്തേണ്ടത്. രാത്രികാലങ്ങളില്‍ മറൈൻ ഡ്രൈവ് ലഹരി, ക്വട്ടേഷൻ സംഘങ്ങളുടെ പിടിയിലാവാൻ കാരണം പൊലീസും എക്‌സൈസ് വകുപ്പും കാണിക്കുന്ന അലംഭാവം മാത്രമാണ്. പൊലീസിന്‍റെ ദൗര്‍ബല്യം മറയ്ക്കാൻ സാധാരണ ജനങ്ങളുടെ സഞ്ചാര സ്വാതന്ത്ര്യം തടയുന്ന നടപടി അംഗീകരിക്കാൻ കഴിയില്ലെന്ന് എം.എല്‍.എ കൂട്ടിച്ചേര്‍ത്തു. പൊതുജനങ്ങളെ നേരിട്ട് ബാധിക്കുന്ന തീരുമാനങ്ങള്‍ ഏകപക്ഷീയമായി അധികാരികള്‍ തീരുമാനിക്കുന്നത് എന്തടിസ്ഥാനത്തിലാണെന്നും, ജനപ്രതിനിധിയായ തന്നോട് പോലും ആലോചിക്കാതെയാണ് തീരുമാനം കൈക്കൊണ്ടതെന്നും എം.എല്‍.എ വ്യക്തമാക്കി.
മറൈൻ ഡ്രൈവില്‍ രാത്രി പ്രവേശനം നിരോധിച്ചുള്ള ഉത്തരവിന് പിന്നില്‍ യൂസര്‍ ഫീ അടിച്ചേല്‍പ്പിക്കാനുള്ള കൗശല നീക്കമാണെന്ന് ജനകീയ പ്രതിരോധ സമിതി ജില്ല കമ്മിറ്റി ആരോപിച്ചു.
സമീപ ഭാവിയില്‍ കൂടുതല്‍ നിയന്ത്രണങ്ങള്‍ക്ക് വഴി ഒരുക്കുമെന്നതിനാല്‍ നടപടിയില്‍നിന്നും നഗരസഭയും ജി.സി.ഡി.എ.യും പിന്തിരിയണമെന്ന് സമിതി പ്രസ്താവനയില്‍ ആവശ്യപ്പെട്ടു. പ്രഫ. കെ. അരവിന്ദാക്ഷൻ, ഡോ. എം.പി. മത്തായി, സി.ആര്‍. നീലകണ്ഠൻ, ഹാഷിം ചേന്ദംപള്ളി, ജോര്‍ജ് ജോസഫ്, ഫ്രാൻസിസ് കളത്തുങ്കല്‍ തുടങ്ങിയവരാണ് കൂട്ടായ്മയിലൂടെ ഇക്കാര്യം ആവശ്യപ്പെടുന്നത്.
വേണ്ടേ നൈറ്റ് ലൈഫ്
യുവതലമുറയുടെ സ്വന്തം ഇടമായ കൊച്ചിയില്‍ നൈറ്റ് ലൈഫ് ആസ്വദിക്കാൻ എത്തുന്നവരുടെ എണ്ണം ഏറെയാണ്. എന്നാല്‍, രാത്രിയില്‍ പ്രവര്‍ത്തിക്കുന്ന വിനോദ ഇടങ്ങളും പൊതു ഇടങ്ങളും കുറവായതിനാല്‍ മറൈൻ ഡ്രൈവ് വാക്ക് വേ ഉള്‍െപ്പടെയുള്ളവയാണ് ചെറുപ്പക്കാരുടെ ആശ്വാസം. ഈ സാഹചര്യത്തില്‍ അടച്ചിടുന്നതിനു പകരം പൊലീസുള്‍െപ്പടെയുള്ളവരുടെ ശക്തമായ നിരീക്ഷണമാണ് വേണ്ടതെന്ന് ഇവര്‍ ആവശ്യപ്പെടുന്നു.
സി.സി.ടി.വി ദൃശ്യങ്ങളുടെ തത്സമയ പരിശോധന, കൃത്യമായ നൈറ്റ് പട്രോളിങ്, ഡ്രോണ്‍ നിരീക്ഷണം ഉള്‍െപ്പടെ നടപടികളിലൂടെ സാമൂഹ്യവിരുദ്ധ ശല്യം ഇല്ലാതാക്കാമെന്നും ചെറുപ്പക്കാരുടെ പ്രതിനിധികള്‍ ചൂണ്ടിക്കാട്ടി.
ഒരു അഭിപ്രായം പോസ്റ്റ് ചെയ്യൂ