കൊച്ചി: ശ്രീനാരായണ ഗുരുദേവന്റെ നവോത്ഥാന ദര്‍ശനങ്ങളും പത്രാധിപര്‍ കെ. സുകുമാരന്റെ ചങ്കൂറ്റമുള്ള നിലപാടുകളും മാറ്റത്തിന്റെ കൊടുങ്കാറ്റായി വീശിയ കേരളത്തെ അന്ധവിശ്വാസങ്ങളിലേക്കും അനാചാരങ്ങളിലേക്കും മടക്കിക്കൊണ്ടുപോകാനുള്ള ഗൂഢശ്രമങ്ങളെ കരുതിയിരിക്കണമെന്ന് മന്ത്രി കെ.രാജൻ പറഞ്ഞു. കേരളകൗമുദി കൊച്ചി യൂണിറ്റ് സംഘടിപ്പിച്ച പത്രാധിപകര്‍ കെ. സുകുമാരൻ അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു മന്ത്രി.
മതിലുകള്‍ കെട്ടാത്ത മനസുകളിലൂടെ മനുഷ്യരെ സൃഷ്ടിക്കാൻ കഴിയണമെന്നാഗ്രഹിച്ച മഹാൻമാരുടെ നാട്ടില്‍ നരബലിയടക്കമുള്ള പൈശാചിക പ്രവൃത്തികള്‍ അരങ്ങേറാൻ കാരണം ചിന്തകളിലുണ്ടായ മാറ്റമാണ്. കമ്ബോളവത്കരണത്തിന്റെ സ്വാധീനം രക്ഷിതാക്കളും മക്കളും തമ്മിലുള്ള ബന്ധത്തെപ്പോലും ബാധിച്ചുതുടങ്ങിയെന്നും മന്ത്രി പറഞ്ഞു.
ചരിത്രപ്രസിദ്ധമായ കുളത്തൂര്‍ പ്രസംഗത്തില്‍, പ്രഥമ കമ്മ്യൂണിസ്റ്റ് മുഖ്യമന്ത്രി ഇ.എം.എസ് നമ്ബൂതിരിപ്പാടിനെ വേദിയിലിരുത്തി രൂക്ഷമായി വിമര്‍ശിച്ച കെ.സുകുമാരൻ പ്രകടിപ്പിച്ചത് നിലപാടുകളിലെ സത്യസന്ധതയായിരുന്നു. ഇതിനെ പ്രതികാരബുദ്ധിയോടെ കാണാതെ വസ്തുതകള്‍ ഉള്‍ക്കൊള്ളാൻ ഇ.എം.എസിനു കഴിഞ്ഞു. വിയോജിപ്പുകളുടെ കൂടി കലയാണ് ജനാധിപത്യം എന്നു തിരിച്ചറിയാൻ കഴിഞ്ഞതായിരുന്നു അവരുടെ ഔന്നത്യം. സംസ്‌കാര സമ്ബന്നമായ കേരളത്തില്‍ ആചാരങ്ങളുടെ പേരില്‍ അനാചാരങ്ങള്‍ വീണ്ടും പിടിമുറുക്കുന്നത് അനുവദിക്കരുത്.
കേവലം എ പ്ലസുകാരെ സൃഷ്ടിക്കുന്ന സ്ഥാപനങ്ങളായി വിദ്യാലയങ്ങള്‍ തരംതാഴ്ന്നാല്‍ പുതിയ തലമുറയെക്കുറിച്ചുള്ള നവോത്ഥാന കേരളത്തിന്റെ പ്രതീക്ഷകള്‍ തകര്‍ന്നുപോകും. എന്താണു വിദ്യാഭ്യാസമെന്നും ജീവിതമെന്നും പഠിപ്പിച്ച ഗുരുദേവന്റെ നാട്ടില്‍, മക്കളെ ഉന്നത പദവികളിലെത്തിക്കാൻ തിരക്കു കൂട്ടുന്നവരാണ് ഇന്നുള്ളത്. എല്ലാറ്റിലും പ്രധാനം മക്കളെ മനുഷ്യരായി വളര്‍ത്തുകയെന്നതാണെന്ന് തിരിച്ചറിയണമെന്നും മന്ത്രി വ്യക്തമാക്കി.
ഒരു അഭിപ്രായം പോസ്റ്റ് ചെയ്യൂ