ലാഹോര്‍: കളിക്കുന്നതിനിടെ ഗ്രൗണ്ടില്‍ നിന്ന് കിട്ടിയ റോക്കറ്റ് ലോഞ്ചറിന്റെ ഷെല്‍ പൊട്ടിത്തെറിച്ച്‌ അഞ്ച് കുട്ടികളടക്കം ഒരുകുടുംബത്തിലെ ഒമ്ബത് പേര്‍ കൊല്ലപ്പെട്ടു.
പാകിസ്ഥാനിലെ സിന്ധ് പ്രവിശ്യയിലാണ് ദാരുണസംഭവം. കുട്ടികള്‍ ഗ്രൗണ്ടില്‍ കളിക്കുന്നതിനിടെ റോക്കറ്റ് ഷെല്‍ ലഭിച്ചു. വെടിക്കോപ്പാണെന്നറിയാതെ വീട്ടില്‍ കൊണ്ടുവന്ന് തുറക്കാൻ ശ്രമിച്ചപ്പോള്‍ പൊട്ടിത്തെറിക്കുകയായിരുന്നു. മരിച്ചവരില്‍ രണ്ട് സ്ത്രീകളും രണ്ട് പുരുഷന്മാരും ഉള്‍പ്പെടുന്നതായി കാഷ്മോര്‍-കണ്ഡ്കോട്ട് സീനിയര്‍ പൊലീസ് സൂപ്രണ്ട് (എസ്‌എസ്പി) രോഹില്‍ ഖോസ പറഞ്ഞു. സ്‌ഫോടനത്തില്‍ പരിക്കേറ്റഅഞ്ച് പേരെ ആശുപത്രിയില്‍ പ്രവേശിപ്പിച്ചതായും അദ്ദേഹം പറഞ്ഞു.
നദീതീരത്തുള്ള പ്രദേശത്തുനിന്നാണ് റോക്കറ്റ് ഷെല്‍ ലഭിച്ചത്. കൊള്ളക്കാര്‍ ഉപേക്ഷിച്ചതാകാമെന്നാണ് നിഗമനം. പൊലീസ് സ്ഥലത്തെത്തി കൂടുതല്‍ അന്വേഷണം നടത്തി വരികയാണെന്നും എസ്‌എസ്പി പറഞ്ഞു. സിന്ധിലെയും പഞ്ചാബിലെയും നദീതട പ്രദേശങ്ങള്‍ നിരവധി ക്രിമിനല്‍ സംഘങ്ങളുടെ സുരക്ഷിത താവളമായി മാറിയെന്ന് പാകിസ്ഥാൻ പീപ്പിള്‍സ് പാര്‍ട്ടി ചെയര്‍മാനും മുൻ വിദേശകാര്യ മന്ത്രിയുമായ ബിലാവല്‍ ഭൂട്ടോ സര്‍ദാരി ട്വീറ്റില്‍ പറഞ്ഞു.
ഗ്രാമത്തില്‍ എങ്ങനെയാണ് റോക്കറ്റ് ലോഞ്ചര്‍ എത്തിയതെന്ന് സിന്ധ് മുഖ്യമന്ത്രി ജസ്റ്റിസ് മഖ്ബൂല്‍ ബഖര്‍ പ്രവിശ്യാ ഇൻസ്പെക്ടര് ജനറലിനോട് റിപ്പോര്‍ട്ട് ആവശ്യപ്പെട്ടതായി ഡോണ്‍ ന്യൂസ് റിപ്പോര്‍ട്ട് ചെയ്തു. സംഭവത്തില്‍ ദുഃഖം പ്രകടിപ്പിച്ച ബഖര്‍, സംഭവത്തെക്കുറിച്ച്‌ വിശദമായ റിപ്പോര്‍ട്ട് സമര്‍പ്പിക്കാൻ ഇൻസ്പെക്ടര് ജനറലിനോട് നിര്‍ദ്ദേശിച്ചു.
ഒരു അഭിപ്രായം പോസ്റ്റ് ചെയ്യൂ