കൊച്ചി: തേവര വെണ്ടുരുത്തി പുതിയ പാലത്തിലെ ഗര്‍ഡറുകളുടെ മൂന്നിടങ്ങളില്‍ രണ്ട് ഇഞ്ചിലേറെ വീതിയുള്ള വിടവ്. അകലം കൂടിവരുന്നത് യാത്രക്കാരെ ആശങ്കയിലാഴ്ത്തുന്നു.
അതേസമയം, വിഷയം അധികൃതരുടെ ശ്രദ്ധയില്‍പ്പെടുത്തിയിട്ടും യാതൊരു നടപടിയുമില്ലെന്ന ആക്ഷേപവും ഉയര്‍ന്നിട്ടുണ്ട്. ഒരുമാസം മുമ്ബാണ് പാലത്തിന്റെ പടിഞ്ഞാറുഭാഗത്തുള്ള മൂന്ന് ഗര്‍ഡറുകള്‍ക്കിടയില്‍ വിടവ് യാത്രക്കാരുടെ ശ്രദ്ധയില്‍പ്പെടുന്നത്. ആദ്യം കാര്യമാക്കിയില്ലെങ്കിലും ഇത് കൂടിയതോടെ ബൈക്ക് യാത്ര ബുദ്ധിമുട്ടായി. ഗര്‍ഡറിന്റെ വിടവില്‍ തട്ടി ബൈക്കുകളുടെ നിയന്ത്രണം നഷ്ടമാകുന്നത് പതിവാണ്.
പശ്ചിമകൊച്ചിയെയും എറണാകുളത്തെയും ബന്ധിപ്പിക്കുന്ന പാലത്തിലൂടെ പ്രതിദിനം പതിനായിരത്തിലധികം വാഹനങ്ങളാണ് കടന്നുപോകുന്നത്. ഗര്‍ഡറുകള്‍ തമ്മില്‍ വിടവുള്ളതിനാല്‍ ഡ്രൈവര്‍മാര്‍ ഇവിടെയെത്തുമ്ബോള്‍ വാഹനത്തിന്റെ വേഗം കുറയ്ക്കും. ഇത് ഗതാഗതക്കുരുക്കിനും കാരണമാവും. പത്തുവര്‍ഷത്തിലേറെ പഴക്കമുള്ള പാലത്തില്‍ രണ്ടുവര്‍ഷം മുമ്ബാണ് അറ്റകുറ്റപ്പണി നടത്തിയത്. 1938 ല്‍ ബ്രിട്ടീഷുകാര്‍ നിര്‍മ്മിച്ച പഴയപാലം ശോച്യാവസ്ഥയിലായതോടെയാണ് പുതിയ പാലം നിര്‍മ്മിച്ചത് . യഥാസമയം അറ്റകുറ്റപ്പണിയും പരിശോധനയും നടത്താതിരുന്നതിനെ തുടര്‍ന്നാണ് പഴയ പാലം നശിച്ചത്. കൊച്ചിൻ പോര്‍ട്ട് ട്രസ്റ്റിന്റെ ഡ്രെഡ്ജര്‍ പഴയ പാലത്തില്‍ രണ്ടുതവണ ഇടിച്ചെങ്കിലും അതിനെ അതിജീവിക്കാൻ പാലത്തിനു കഴിഞ്ഞിരുന്നു.
ഒരു അഭിപ്രായം പോസ്റ്റ് ചെയ്യൂ