ചാലക്കുടി: വളയം പിടിക്കാൻ മാവേലിയും ടിക്കറ്റ് കീറിക്കൊടുക്കാൻ വാമനനും. ഉത്രാടപ്പാച്ചലിന് ആവേശം പകര്‍ന്ന് ചാലക്കുടിയില്‍ സ്വകാര്യ ബസിലായിരുന്നു കൗതുകക്കാഴ്ച.
മരിയ എന്ന ബസ്സില്‍ മഹാബലിയുടെ വേഷമിട്ടത് ഡ്രൈവര്‍ ടോം തോട്ടത്തില്‍. മാവേലിയെ പാതാളത്തിലേയ്ക്ക് ചവിട്ടിതാഴ്ത്തിയ വാമനനെ അനുകരിച്ചത് കണ്ടക്ടര്‍ ഡെന്നി വടക്കനും.
നിറഞ്ഞ ചിരിയുമായി ഡ്രൈവറുടെ സീറ്റിലിരുന്ന മാവേലിയെ കണ്ട് യാത്രക്കാര്‍ അമ്പരന്നെങ്കിലും പെട്ടന്ന് തന്നെ അവര്‍ക്ക് കാര്യം പിടികിട്ടി. മാവേലിയുടെ ഓണാംശകള്‍ സ്വീകരിച്ച യാത്രക്കാര്‍ക്ക് തൊട്ടുപിന്നാലെ കൈമടക്കില്‍ ക്യാഷ് ബാഗുമായി വാമനനെ കണ്ടപ്പോള്‍ ആഹ്‌ളാദം അടക്കാനായില്ല. തിരിച്ചുള്ള ആശംസകള്‍ അവര്‍ വാമനെ അറിയിച്ചു. ബസില്‍ കയറുന്ന എല്ലാവര്‍ക്കും വിവിധ ദേശക്കാര്‍ക്കും ഓണത്തിന്റെ മഹത്തായ സന്ദേശം നല്‍കലും സന്തോഷവും പങ്കിടലുമാണ് ഇത്തരം ആഘോഷം സംഘടിപ്പിക്കാൻ പ്രചോദനമായതെന്ന് ഡ്രൈവറായ ടോം തോട്ടത്തില്‍ പറഞ്ഞു.
ഒരു അഭിപ്രായം പോസ്റ്റ് ചെയ്യൂ