ചെറുവത്തൂര്‍ ഇന്ത്യൻ റെയില്‍വേയിലെ ആദ്യ വനിതാ ട്രാക്ക് വുമണ്‍ പി രമണി വിരമിക്കുന്നു. 41 വര്‍ഷത്തെ സേവനത്തിനുശേഷം പയ്യന്നൂര്‍ സെക്ഷനില്‍നിന്ന് ഗാങ്മേറ്റായാണ് 31ന് വിരമിക്കുന്നത്.
19ാം വയസ്സില്‍ താല്‍ക്കാലികമായാണ് ജോലിയില്‍ പ്രവേശിച്ചത്. ചെറുവത്തൂരും മറ്റും നിര്‍ത്തിയിടുന്ന ട്രെയിനിന്റെ പരിപാലനമായിരുന്നു ആദ്യജോലി. പിന്നിട് ട്രാക്ക് മാനായി സ്ഥിരപ്പെട്ടു.
ഭാരിച്ച ജോലി കൃത്യതയോടെ പൂര്‍ത്തിയാക്കിയാണ് വിരമിക്കുന്നത്. റെയില്‍വേയില്‍ പുരുഷന്മാരുടെ മാത്രം കുത്തകയായിരുന്ന ട്രാക്ക്മാൻ പോസ്റ്റില്‍ ആദ്യമായി നിയമിതയായ വനിതയാണ് രമണി. ഇന്ത്യയിലെ ആദ്യ ട്രാക്ക് വുമണ്‍ എന്നുവിളിക്കാം.
അക്കാലത്ത് ട്രാക്ക്മാന്റെ വേഷം ട്രൗസറായിരുന്നു. എന്നാല്‍, ട്രൗസറിട്ട് ജോലി ചെയ്യാൻ പറ്റില്ലെന്ന് അറിയിച്ച രമണിക്ക് സാരി യൂണിഫോമായി അനുവദിച്ചു.
ട്രെയിൻ യാത്രക്കിടെ ഇളകിപ്പോകുന്ന ട്രാക്കിലെ നട്ടുകള്‍ സ്ഥാനത്ത് ഉറപ്പിക്കുന്നതും വിള്ളല്‍ കണ്ടെത്തിയാല്‍ ട്രെയിൻ നിര്‍ത്താൻ സിഗ്നല്‍ നല്‍കേണ്ടതും ട്രാക്ക്മാനാണ്. ചെറുവത്തൂര്‍ റെയില്‍വേ സ്റ്റേഷന് സമീപത്ത് മാച്ചിപ്പുറത്ത് സഹോദരിയുടെ മകള്‍ക്കൊപ്പമാണ് താമസം. അവിവാഹിതയാണ്.
ഒരു അഭിപ്രായം പോസ്റ്റ് ചെയ്യൂ