മാരകമായ മയക്കുമരുന്നുകളുമായി യുവാക്കൾ പിടിയിൽ. താനാളൂർ നിരപ്പ് സ്വദേശി തോട്ടുങ്ങൽ വീട്ടിൽ പ്രബീഷ് (34), ഒഴൂർ തലക്കട്ടൂർ സ്വദേശി കൊല്ലത്തേടത്ത് സജീവ് (29) എന്നിവരെയാണ് പരപ്പനങ്ങാടി എക്സൈസ് സംഘം അറസ്റ്റ് ചെയ്തത്.
തിരൂരങ്ങാടി, തിരൂർ പ്രദേശങ്ങളിൽ യുവാക്കളിലും വിദ്യാർഥികളിലു മയക്ക് മരുന്നുകളുടെ വിപണനവും ഉപയോഗവും വ്യാപകമാവുന്നുവെന്ന വിവരത്തിന്റെ അടിസ്ഥാനത്തിൽ നടന്ന അന്വേഷണത്തിലാണ് പ്രതികൾ പിടിയിലായത്.
എക്സൈസ് ഇൻസ്പെക്ടർ പി കെ മുഹമ്മദ് ഷഫീഖിന്റെ നേതൃത്വത്തിലുള്ള പരപ്പനങ്ങാടി റേഞ്ച് എക്സൈസ് സംഘവും മലപ്പുറം എക്സൈസ് ഇന്റലിജൻസ് ബ്യൂറോയും ഒരാഴ്ചയായി രഹസ്യ നിരീക്ഷണം നടത്തിയാണ് പ്രതികളെ പിടികൂടിയത്.
നന്നമ്പ്ര പാണ്ടിമുറ്റത്ത് കാറിൽ വിതരണത്തിനെത്തിച്ച മാരക മയക്കുമരുന്ന് ഇനത്തിൽപെട്ട 7700 മില്ലിഗ്രാം എംഡിഎംഎ, 3800 മില്ലിഗ്രാം ഹാഷിഷ് ഓയിൽ തുടങ്ങിയവ ഇവരുടെ പക്കൽ നിന്നും കണ്ടെടുത്തു. ഒന്നര ലക്ഷം രൂപ വില വരുന്നതാണ് ഇവ. ഇവർ സഞ്ചരിച്ച കാറും എക്സൈസ് പിടിച്ചെടുത്തു.
ഇൻസ്പെക്ടർക്ക് പുറമെ ഇന്റലിജൻസ് ബ്യൂറോ പ്രിവന്റീവ് ഓഫീസർ ടി ഷിജുമോൻ, റേഞ്ച് പ്രിവന്റീവ് ഓഫീസർമാരായ ടി പ്രജോഷ് കുമാർ, കെ പ്രദീപ് കുമാർ, സിവിൽ എക്സൈസ് ഓഫീസർമാരായ ശിഹാബുദ്ദീൻ, നിതിൻ ചോമാരി, പി ബി വിനീഷ്, വനിത സിവിൽ എക്സൈസ് ഓഫീസർ ലിഷ തുടങ്ങിയവരും സംഘത്തിലുണ്ടായിരുന്നു.
ഒരു അഭിപ്രായം പോസ്റ്റ് ചെയ്യൂ