പരപ്പനങ്ങാടി
എവിടെ തീറ്റമത്സരമുണ്ടോ... ബാപ്പുക്കോയ റെഡി. ആരൊക്കെ മത്സരിക്കാനുണ്ടെങ്കിലും പങ്കെടുത്താല്‍ കപ്പും കൊണ്ടേ ബാപ്പുക്കോയ തിരിച്ചു വരൂ.
അത് നിർബന്ധമാണ്. ഒടുവിലത്തെ മത്സരത്തിലും അതുതന്നെ സംഭവിച്ചു. കൊടക്കാട് ആലിൻചുവട് സ്വദേശിയായ 58കാരനായ ബാപ്പുക്കോയയാണ് കഴിഞ്ഞ ദിവസം തമിഴ്‌നാട്ടിലെ കോയമ്ബത്തൂരില്‍ നടന്ന തീറ്റമത്സരത്തില്‍ ഒന്നാം സമ്മാനമായ ഒരുലക്ഷം രൂപ കാഷ് അവാർഡ് നേടിയത്. കേരളം, തമിഴ്നാട് സംസ്ഥാനങ്ങളില്‍ നിന്നായി അഞ്ഞൂറില്‍പരം മത്സരാർത്ഥികളോട് പോരാടിയാണ് ബാപ്പുക്കോയ വിജയം കൈവരിച്ചത്. രണ്ട് കിലോ ബിരിയാണി കൊള്ളുന്ന കപ്പ് മൂന്നെണ്ണമാണ് ഇദ്ദേഹം അകത്താക്കിയത്.
പങ്കെടുത്ത പലർക്കും രണ്ട് കപ്പിലെ ബിരിയാണി പോലും കഴിക്കാനായില്ല. ഒരു കാലത്ത് നാട്ടിലെ ക്ലബുകള്‍ സംഘടിപ്പിക്കുന്ന തീറ്റമത്സരങ്ങളിലെ അജയ്യനായ താരമായിരുന്നു കൊടക്കാട്ടുകാരനായ ഈ ഓട്ടോ ഡ്രൈവർ. പരിസരത്തെ ക്ലബ്ബുകള്‍ മത്സരയിനങ്ങളില്‍ തീറ്റ മത്സരം ഉള്‍പ്പെടുത്താത്തത് ബാപ്പുക്കോയയെ പേടിച്ചിട്ടാണെന്ന് നാട്ടില്‍ സംസാരമുണ്ട്. അഞ്ചുവർഷമായി മത്സരത്തില്‍ പങ്കെടുക്കാറില്ലായിരുന്നു. നീണ്ട ഇടവേളയ്ക്കു ശേഷമുള്ള അരങ്ങേറ്റത്തില്‍ വീണ്ടും വിജയിക്കാനായതില്‍ ഏറെ സന്തോഷവാനാണ് ബാപ്പുക്കോയ. തന്റെ 22ാം വയസില്‍ തുടങ്ങിയ മത്സരം 58ലും തുടരുന്നു. കോയമ്ബത്തൂരില്‍ ബോബി ചെമ്മണ്ണുരാണ് മത്സരം സംഘടിപ്പിച്ചത്. പരപ്പനങ്ങാടിയിലെ ഓട്ടോ ഡ്രൈവറായ കോലാക്കല്‍ ബാപ്പുക്കോയക്ക് ഭാര്യയും നാല് ആണ്‍മക്കളുമുണ്ട്. മകൻ മിലിറ്ററി എൻജിനീയറും മറ്റുള്ളവർ വിദ്യാർത്ഥികളുമാണ്.
ഒരു അഭിപ്രായം പോസ്റ്റ് ചെയ്യൂ