2014ല്‍ മലേഷ്യയിലെ ക്വാലലംപുരില്‍ നിന്ന് പറന്നുയർന്ന എംഎച്ച്‌ 370 എന്ന വിമാനം കാണാതായതിനെ തുടർന്ന് നടന്നത് ലോകചരിത്രത്തിലെ ഏറ്റവും വലിയ തിരച്ചിലുകളാണ്.
ഏഴു രാജ്യങ്ങളുടെ സഹകരണത്തോടെ 34 കപ്പലുകളും 28 വിമാനങ്ങളും ഉപയോഗിച്ച്‌ നടത്തിയ അന്വേഷണങ്ങള്‍ക്കൊന്നും വിമാനത്തിന് എന്ത് സംഭവിച്ചു എന്ന ഉത്തരം നല്‍കാനായിരുന്നില്ല. ഇതിനിടെ, വിമാനം കാണാതായതിനെ കുറിച്ച്‌ പല സിദ്ധാന്തങ്ങളും അഭ്യൂഹങ്ങളും പ്രചരിച്ചെങ്കിലും അവയെല്ലാം അടിസ്ഥാനമില്ലാത്തവയായിരുന്നു. 2018ല്‍ തെരച്ചില്‍ അവസാനിപ്പിച്ചെങ്കിലും ചിലപ്പോഴൊക്കെ വിമാനം സംബന്ധിച്ച അഭ്യൂഹങ്ങള്‍ ഉയർന്നുവരാറുണ്ട്. ഇപ്പോഴിതാ, 2014ല്‍ കാണാതായ വിമാനം ഇന്ത്യൻമഹാസമുദ്രത്തിലെ ബ്രോക്കണ്‍ റിഡ്ജ് എന്ന 20000 അടി താഴ്ചയിലുള്ള പടുകുഴിയില്‍ തകർന്നു കിടപ്പുണ്ടെന്ന വെളിപ്പെടുത്തലാണ് പുറത്തുവരുന്നത്. ടാസ്മാനിയ സർവകലാശാലയുടെ മറൈൻ, അന്‌റാർട്ടിക് സ്റ്റഡീസ് വിഭാഗം ഗവേഷകനായ ലിൻ ആണ് എംഎച്ച്‌ 370 എന്ന മലേഷ്യൻ വിമാനത്തെ കുറിച്ച്‌ പുതിയ വെളിപ്പെടുത്തല്‍ നടത്തിയിരിക്കുന്നത്.
2014 മാർച്ച്‌ 8 രാത്രിയിലാണ് മലേഷ്യൻ എയർലൈൻസിന്റെ ബോയിങ് വിമാനം എംഎച്ച്‌ 370 മലേഷ്യൻ തലസ്ഥാനം ക്വാലലംപുരിലെ എയർപോർട്ടില്‍നിന്നു പറന്നുയർന്ന് ചൈനയിലെ ബെയ്ജിങ് ലക്ഷ്യമാക്കി യാത്ര തുടങ്ങിയത്. സാഹറി അഹമ്മദ് ഷാ എന്ന അനുഭവ സമ്ബന്നനായ പൈലറ്റായിരുന്നു വിമാനം നിയന്ത്രിച്ചിരുന്നത്. ഒരു ഉപ പൈലറ്റും 10 ഫ്‌ലൈറ്റ് അറ്റൻഡന്റുമാരും 227 യാത്രക്കാരുമുണ്ടായിരുന്നു. ആകെ 239 പേർ. ഇതില്‍ 5 ഇന്ത്യക്കാരുമുണ്ടായിരുന്നു.
അർധരാത്രി ഒന്നോടെ 35,000 അടി വരെ പൊങ്ങിയ വിമാനം 1.07നു ക്വാലലംപുർ എയർ ട്രാഫിക് കണ്‍ട്രോള്‍ സ്റ്റേഷനിലേക്കു സന്ദേശമയച്ചു. എന്നാല്‍ വിമാനം വിയറ്റ്‌നാമീസ് വ്യോമമേഖലയുടെ സമീപമെത്തിയെങ്കിലും അവിടെ റിപ്പോർട്ടു നല്‍കിയില്ല. വിമാനത്തിന്റെ പൈലറ്റുമായി ബന്ധപ്പെടാനുള്ള വിയറ്റ്‌നാമീസ് എയർ ട്രാഫിക് കണ്‍ട്രോള്‍ ജീവനക്കാരുടെ ശ്രമങ്ങളും നടന്നില്ല. തെക്കൻ ചൈനാക്കടലില്‍ വച്ചുതന്നെ വിമാനം ദിശ മാറിയിരുന്നു. മലേഷ്യയ്ക്കു കുറുകെ പറന്ന വിമാനം പിന്നീട് മലാക്ക കടലിടുക്കിനു നേർക്കും അവിടെനിന്നു വടക്കുപടിഞ്ഞാറൻ ദിശയില്‍ ആൻഡമാൻ കടലിനു നേരെയുമാണു പറന്നതെന്ന് മലേഷ്യൻ സൈനിക റഡാറുകള്‍ കണ്ടെത്തി. 2.22നു സൈനിക റഡാറി ന്റെ പരിധിയില്‍നിന്നു വിമാനം കാണാതായി.രണ്ടരയോടെ ഉന്നത വ്യോമ അധികൃതർ വിഷയത്തില്‍ ഇടപെട്ടു.പിന്നീട് നാലു മണിക്കൂർ കഴിഞ്ഞ് വിമാനത്തിനായി ഊർജിതമായ തിരച്ചില്‍ തുടങ്ങി. ലോകചരിത്രത്തിലെ ഏറ്റവും വലിയ തിരച്ചിലുകളിലൊന്നിന്റെ തുടക്കം. എത്ര തിരഞ്ഞിട്ടും വിമാനം കണ്ടെത്താനായില്ല.
ആദ്യഘട്ടത്തില്‍ മലേഷ്യയ്ക്കും വിയറ്റ്‌നാമിനും ഇടയ്ക്കുള്ള കടല്‍മേഖലയായിരുന്നു പ്രധാനമായി തിരഞ്ഞത്. 34 കപ്പലുകളും 28 വിമാനങ്ങളും ഇതിനായി നിയോഗിക്കപ്പെട്ടു. ഏഴു രാജ്യങ്ങളും തിരച്ചിലില്‍ പങ്കുചേർന്നു. പിന്നീടുള്ള തിരച്ചിലുകളില്‍ സർക്കാർ, സർക്കാരിതര ഏജൻസികള്‍ ധാരാളമായി പങ്കെടുത്തു. 2018ല്‍ ഈ വിമാനത്തിനായുള്ള എല്ലാ ഔദ്യോഗിക തിരച്ചിലുകളും അവസാനിപ്പിച്ചു. ഓസ്‌ട്രേലിയയുടെ തെക്കുപടിഞ്ഞാറൻ തീരത്തിനു 2500 കിലോമീറ്റർ അകലെ ഏതോ മേഖലയില്‍ തകർന്നു വീണെന്നാണ് പിന്നീട് മലേഷ്യ അറിയിച്ചത്.
2015ല്‍ കിഴക്കൻ ആഫ്രിക്കൻ തീരത്തിനു സമീപമുള്ള റീയൂണിയൻ ദ്വീപിലെ ബീച്ചില്‍ നിന്നു വിമാനത്തിന്റെ ചിറകിന്റെ ഭാഗം കണ്ടെത്തി. പിന്നീട് ടാൻസാനിയ, മൊസാംബിക്, ദക്ഷിണ ആഫ്രിക്ക, മഡഗാസ്‌കർ, മൗറീഷ്യസ് തുടങ്ങിയ രാജ്യത്തിന്റെ കരകളില്‍ നിന്നും ഇരുപത്തിയേഴോളം വിമാന അവശിഷ്ട ഭാഗങ്ങള്‍ കിട്ടി. ഇതില്‍ 3 ഭാഗങ്ങള്‍ എംഎച്ച്‌ 370ന്റേതാണെന്നു സ്ഥിരീകരിക്കപ്പെട്ടു.
ഈ വിമാനം കാണാതായതോടെ പുറത്തുവന്ന വിവിധ സിദ്ധാന്തങ്ങള്‍ :-
എംഎച്ച്‌ 370 വിമാനത്തിനുള്ളില്‍ ഓക്‌സിജൻ ഇല്ലാത്ത അവസ്ഥ (ഹൈപ്പോക്‌സിയ) ഉടലെടുത്തെന്നും ഇതേത്തുടർന്ന് യാത്രക്കാരും പൈലറ്റുമാരും മറ്റു വിമാന ജീവനക്കാരുമുള്‍പ്പെടെ അബോധാവസ്ഥയിലായെന്നും ഒരു സിദ്ധാന്തം പറയുന്നു.
എംഎച്ച്‌ 370 ന്റെ സൈബർ സംവിധാനങ്ങള്‍ ഹാക്ക് ചെയ്യപ്പെട്ടതു മൂലം ഓട്ടോ പൈലറ്റില്‍ സംഭവിച്ച പിഴവാണ് അപകടകാരണം എന്നായിരുന്നു ചരിത്രകാരനായ നോർമൻ ഡേവിസിന്റെ സിദ്ധാന്തം.
2018ലാണു കംബോഡിയ തിയറി എന്ന പേരില്‍ ഇതു സംബന്ധിച്ച പുതിയൊരു പ്രശസ്ത വാദം ഉയർന്നത്.ബ്രിട്ടിഷ് വിഡിയോ നിർമാതാവായ ഇയാൻ വില്‍സൻ, ഗൂഗിള്‍ മാപ്പ് ഇമേജുകള്‍ ഉപയോഗിച്ച്‌ കംബോഡിയയിലെ ഒരു വനത്തില്‍ വിമാനം കിടക്കുന്നതു കണ്ടെത്തിയെന്നു പറഞ്ഞത് ലോകമെങ്ങും ആവേശം സൃഷ്ടിച്ചു. ചിത്രങ്ങളുമുണ്ടായിരുന്നു. എന്നാല്‍ കംബോഡിയ വാദം നിരസിച്ചു.
ഒരു തമോഗർത്തം വിമാനത്തെ പിടിച്ചെടുത്തെന്നും, വിമാനം നേരെ ചന്ദ്രനിലേക്കു പോയെന്നും, അന്യഗ്രഹജീവികള്‍ തട്ടിയെടുത്താതാകാം എന്നൊക്കെയുള്ള വിചിത്ര സിദ്ധാന്തങ്ങളും പുറത്തിറങ്ങി. ഉത്തര കൊറിയ വിമാനം പിടിച്ചെടുത്തെന്നും സാൻ ഡിയഗോയിലേക്കു പോയ വിമാനത്തെ അവിടെയുള്ള അമേരിക്കൻ വ്യോമസേന വെടിവച്ചിട്ടെന്നുമൊക്കെ വേറെയും വാദങ്ങളുയർന്ന
സിദ്ധാന്തങ്ങളും വാദങ്ങളും എന്തുതന്നെയായിരുന്നാലും ആ വിമാനവും അതിലുണ്ടായിരുന്നവരും ഇനിയൊരിക്കലും തിരിച്ചുവരില്ല എന്നതാണ് യാഥാർത്ഥ്യം.
ഒരു അഭിപ്രായം പോസ്റ്റ് ചെയ്യൂ