കൊല്‍ക്കത്ത
വനിതാ പി.ജി. ട്രെയിനി ഡോക്ടറെ ബലാല്‍സംഗം ചെയ്തു കൊലപ്പെടുത്തിയ കേസില്‍ അറസ്റ്റിലായ സഞ്ജയ് റോയ് ക്രൂരകൃത്യത്തിനു മുമ്ബ് ചുവന്നതെരുവില്‍ എത്തിയെന്ന് അന്വേഷണസംഘം.
ഓഗസ്‌റ്റ് ഒമ്ബതിനു പുലര്‍ച്ചെയാണ്‌ ആര്‍.ജി. കര്‍ മെഡിക്കല്‍ കോളജിലെ സെമിനാര്‍ ഹാളില്‍ ഡോക്‌ടര്‍ കൊല്ലപ്പെട്ടത്‌. സഞ്ജയ് റോയിയും മറ്റൊരു സിവിക്‌ വളന്റിയറും ഓഗസ്‌റ്റ് 8 ന്‌ അര്‍ധരാത്രിക്ക്‌ ശേഷം കൊല്‍ക്കത്തയിലെ സോനാഗച്ചിയിലെ ചുവന്ന തെരുവിലെത്തി. റോയ് മദ്യപിക്കുകയും ചെയ്‌തിരുന്നു.
കൂടെയുണ്ടായിരുന്നയാള്‍ ലൈംഗികത്തൊഴിലാളിയുടെ വീട്ടില്‍ കയറിയപ്പോള്‍ സഞ്ജയ് റോയ് പുറത്ത്‌ നിന്നു. പുലര്‍ച്ചെ രണ്ടു മണിയോടെ ഇരുവരും മറ്റൊരു ചുവന്നതെരുവിലുമെത്തി. അതുവഴി പോയ ഒരു സ്‌ത്രീയെ സഞ്ജയ് ശല്യംചെയ്‌തു. മറ്റൊരു സ്‌ത്രീയെ വിളിച്ച്‌ നഗ്നഫോട്ടോ ആവശ്യപ്പെട്ടു.
ഒപ്പമുണ്ടായിരുന്നയാള്‍ ഇതിനിടെ വീട്ടിലേക്കു പോയി. പുലര്‍ച്ചെ മൂന്നരയോടെ സഞ്ജയ് റോയ് ആര്‍.ജി. കര്‍ ആശുപത്രിയിലെ ട്രോമ യൂണിറ്റിനടുത്തെത്തി. അമിതമായി മദ്യപിച്ച നിലയില്‍ ഇയാള്‍ ഓപ്പറേഷന്‍ തീയറ്ററിന്റെ വാതില്‍ തകര്‍ത്തു. പുലര്‍ച്ചെ നാലുമണിയോടെ അത്യാഹിത വിഭാഗത്തില്‍ എത്തി. ഇവിടെനിന്നു മൂന്നാം നിലയിലുള്ള സെമിനാര്‍ ഹാളിലേക്കു പോയി.
സെമിനാര്‍ ഹാളില്‍ ഉറങ്ങുകയായിരുന്ന ട്രെയിനി ഡോക്ടറെ കണ്ടെന്നും അവരുടെ മേലേക്കു ചാടിവീണു ബലാല്‍സംഗം ചെയ്യുകയായിരുന്നെന്നും പ്രതി സമ്മതിച്ചതായി അന്വേഷണസംഘം പറഞ്ഞു.
കുറ്റകൃത്യം നടന്ന രാത്രി 11 മണിയോടെ സഞ്ജയ് റോയ് ആശുപത്രിക്കു പിന്നില്‍ ഒരിടത്തിരുന്നു മദ്യപിച്ചിരുന്നെന്നും അപ്പോള്‍ അശ്ലീലദൃശ്യങ്ങള്‍ കണ്ടിരുന്നെന്നും നേരത്തെ പോലീസ്‌ പറഞ്ഞിരുന്നു. അന്നുരാത്രി പലതവണ ഇയാള്‍ ആശുപത്രി വളപ്പില്‍ കടന്നു. അതിനിടെ, സഞ്‌ജയ്‌ക്കു നുണപരിശോധന നടത്താന്‍ കൊല്‍ക്കത്ത കോടതി തിങ്കളാഴ്‌ച സി.ബി.ഐക്ക്‌ അനുമതി നല്‍കി.
ഒരു അഭിപ്രായം പോസ്റ്റ് ചെയ്യൂ