ന്യൂഡല്‍ഹി
നരേന്ദ്ര മോദി സര്‍ക്കാരിനെ അട്ടിമറിക്കാന്‍ അമേരിക്ക പദ്ധതിയിടുന്നുവെന്ന ഞെട്ടിക്കുന്ന അവകാശവാദവുമായി റഷ്യ രംഗത്ത്.
ഇതിനുള്ള ശ്രമങ്ങള്‍ അമേരിക്കയുടെ രഹസ്യാന്വേഷണ ഏജന്‍സിയായ സിഐഎ നടത്തുന്നതായി റഷ്യയുടെ സ്റ്റേറ്റ് മീഡിയയായ സ്പുട്‌നിക് റിപ്പോര്‍ട്ട് ചെയ്തു.
മോദി സര്‍ക്കാരിനെ അട്ടിമറിക്കുന്നതിനായി ആന്ധ്രാപ്രദേശിലെ പ്രതിപക്ഷ നേതാക്കളുമായി ചേര്‍ന്ന് യു.എസ് രഹസ്യാന്വേഷണ ഏജന്‍സി പ്രവര്‍ത്തിക്കുകയാണെന്നും മുഖ്യമന്ത്രി ചന്ദ്രബാബു നായിഡു ഉള്‍പ്പെടെയുള്ളവരുടെ പിന്തുണ യുഎസിന് ലഭിക്കുന്നുണ്ടെന്നും റിപ്പോര്‍ട്ടില്‍ പറയുന്നു.
പദ്ധതിയുടെ ഭാഗമായി ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു, തെലങ്കാന മുഖ്യമന്ത്രി കെ ചന്ദ്രശേഖര്‍ റാവു, എഐഎംഐഎം നേതാവ് അസദുദ്ദീന്‍ ഒവൈസി എന്നിവരുള്‍പ്പെടെയുള്ള പ്രമുഖ പ്രതിപക്ഷ നേതാക്കളുമായി യു.എസ് കോണ്‍സല്‍ ജനറല്‍ ജെന്നിഫര്‍ ലാര്‍സണ്‍ കൂടിക്കാഴ്ച്ച നടത്തിയതായും റിപ്പോര്‍ട്ട് അവകാശപ്പെടുന്നുണ്ട്.
ആഗോള നേതാവായി ഉയര്‍ന്നതോടെ ലോകത്തിലെ ഒട്ടുമിക്ക രാജ്യങ്ങളും പ്രധാനമന്ത്രി നരേന്ദ്ര മോദിയുടെ വാക്കുകള്‍ക്ക് വിലകല്‍പ്പിക്കുന്നുണ്ടെന്നാണ് കേന്ദ്രസര്‍ക്കാരിന്റെ അവകാശവാദം. റഷ്യയില്‍ നിന്ന് എണ്ണ വാങ്ങുന്നതുള്‍പ്പെടെയുള്ള ഇന്ത്യയുടെ നടപടികള്‍ യു.എസ് ഉള്‍പ്പെടെയുള്ള രാജ്യങ്ങളുടെ രോഷത്തിന് ഇടയാക്കിയിരുന്നു. ഈ സാഹചര്യത്തിലാണ് മോദി സര്‍ക്കാരിനെ അട്ടിമറിക്കാന്‍ അമേരിക്ക ശ്രമിക്കുന്നുവെന്ന് റഷ്യ അവകാശപ്പെടുന്നത്.
മോദി സര്‍ക്കാരിനെ താഴെയിറക്കാന്‍ യുഎസ് വലിയ ഗൂഢാലോചനയാണ് നടത്തുന്നതെന്നാണ് സ്പുട്‌നിക് റിപ്പോര്‍ട്ടില്‍ അവകാശപ്പെടുന്നത്. സര്‍ക്കാരിനെതിരെ ഉടന്‍ അവിശ്വാസ പ്രമേയം കൊണ്ടുവന്നേക്കുമെന്നും റിപ്പോര്‍ട്ട് പറയുന്നു.
ഇതിനായി വലിയ തോതില്‍ ശ്രമങ്ങള്‍ നടക്കുന്നുണ്ട്. യുഎസ് രഹസ്യാന്വേഷണ ഏജന്‍സിയായ സിഐഎ ഇന്ത്യന്‍ പ്രതിപക്ഷ നേതാക്കളുമായി നിരന്തര സമ്ബര്‍ക്കം ഇതിനായി പുലര്‍ത്തുന്നുണ്ട്.
അടുത്തിടെ എഐഎംഐഎം നേതാവ് അസദുദ്ദീന്‍ ഒവൈസിയുമായി യുഎസ് കോണ്‍സല്‍ ജനറല്‍ ജെന്നിഫര്‍ ലാര്‍സന്‍ ഹൈദരാബാദില്‍ കൂടിക്കാഴ്ച നടത്തിയിരുന്നു. ഇതിന് മുമ്ബ് മുഖ്യമന്ത്രി ചന്ദ്രബാബു നായിഡുവിനെയും തെലങ്കാന മുഖ്യമന്ത്രി കെ. ചന്ദ്രശേഖര്‍ റാവുവിനെയും അവര്‍ കണ്ടിരുന്നു.
ഈ സംഭവങ്ങളെല്ലാം റഷ്യന്‍ മാധ്യമങ്ങള്‍ തങ്ങളുടെ റിപ്പോര്‍ട്ടില്‍ പരാമര്‍ശിച്ചിട്ടുണ്ട്. ഹൈദരാബാദിലെ അമേരിക്കന്‍ മിഷന്‍ ഓര്‍ഗനൈസേഷനെ നയിക്കുന്നത് ലാര്‍സണാണെന്നും റിപ്പോര്‍ട്ടില്‍ പറയുന്നു. യുഎസ് കോണ്‍സല്‍ ജനറലും നയതന്ത്രജ്ഞരും പ്രതിപക്ഷ നേതാക്കളുമായി നടത്തിയ കൂടിക്കാഴ്ച ആശങ്കാജനകമാണെന്നാണ് റഷ്യയുടെ മുന്നറിയിപ്പ്.
ഒരു അഭിപ്രായം പോസ്റ്റ് ചെയ്യൂ