കാണാം പഠിക്കാം കേരളത്തിൻ്റെ കലാ പൈതൃകത്തെ

• എ എസ് മാളവിക

കണ്ണൂർ

തലയെടുപ്പോടെ നിൽക്കുന്ന ചെറുശ്ശേരി സ്മൃതി ഗോപുരവും ചിറക്കൽ ചിറയും അതിനെ കടന്നുവരുന്ന കുളിർക്കാറ്റും ആളുകളെ സ്വീകരിക്കുന്നത് 150 വർഷം പഴക്കമുള്ള ചിറക്കൽ കൊട്ടാരത്തിലേക്കാണ്. ചിറക്കൽ ഒരു കാലത്ത് പ്രാദേശിക ഭരണാധികാരികളുടെ തലസ്ഥാനവും നാടൻ കലകളുടെയും സംസ്കാരത്തിൻ്റെയും അറിയപ്പെടുന്ന കേന്ദ്രവുമായിരുന്നു. അത്തരത്തിലുള്ള സാംസ്കാരിക കേന്ദ്രത്തിൻ്റെ പ്രാധാന്യം കണക്കിലെടുത്താണ് ചിറക്കൽ രാജകുടുംബത്തിൻ്റെ ഭവനമായ ചിറക്കൽ കോവിലകം 1995 ൽ ഫോക്ക്ലോർ അക്കാദമിയാകുന്നത്. 150 വർഷം പഴക്കമുള്ള ഒരു കൊട്ടാരത്തെ വെറുതെ അങ്ങ് കണ്ടുമടങ്ങാനല്ല മറിച്ച് കേരളത്തിൻ്റെ കലാപാരമായ പൈതൃകം തേടിയാണ് ആളുകൾ ഇവിടെ എത്തുന്നത്. ഇവിടെയെത്തിയാൽ വിവിധ സംസ്ഥാനങ്ങളിലെ തനത് കലാരൂപങ്ങളോടൊപ്പം ഉത്തരമലബാറിലെ തെയ്യകോലങ്ങളും നാടൻ കലകളും ഉൾപ്പെടെ പ്രാചീന ഉപകരണങ്ങളേയും കണ്ടും കേട്ടും പഠിക്കാം. വിദ്യാർഥികൾക്കും ഗവേഷക വിദ്യാർഥികൾക്കും വിദേശികൾക്കും പുരാതന കലാരൂപങ്ങളേയും ഉപകരണങ്ങളേയും പറ്റി പഠിക്കാൻ ആഗ്രഹിക്കുന്നവർക്കും ഇവിടം ഒരു പോലെ പ്രയോജനകരമാണ്. 

കൊട്ടാരത്തിനും അതിനുള്ളിലെ ഉപകരണങ്ങൾക്കും മാത്രമല്ല മുറ്റത്തെ പടുകൂറ്റൻ മാവിനും അതിൽ നിന്ന് പൊഴിഞ്ഞു ചാടുന്ന മാങ്ങക്കുപോലും വർഷങ്ങളുടെ കഥ പറയാനുണ്ട്. 

നീളൻ വരാന്ത നിറയെ നാറാണത്തു പ്രാന്തൻ, വായില്ലാക്കുന്നിലപ്പൻ, ഉളിയന്നൂർ പെരുന്തച്ഛൻ, പാക്കനാർ തുടങ്ങിയവരുടെ കൊത്തുപണികളാൽ അലംകൃതമാണ്. പഴയ കൈപ്പണിയിൽ തീർത്ത ഒറ്റത്തടി വാതിലും കടന്ന് അകത്തു പ്രവേശിച്ചാൽ ആദ്യം നമ്മെ സ്വീകരിക്കുന്നത് ഗരുഡൻ തൂക്കം, പണിയ നൃത്തം, മലപ്പുലയാട്ടം, വഞ്ചിപ്പാട്ട്, ബിഹു, നാഗാലാൻ്റ് നൃത്തം, മയൂര നൃത്തം, വട്ട മുടി തുടങ്ങിയ വിവിധ കലാരൂപങ്ങളുടെ ഫോട്ടോകളാണ്. പിന്നീടങ്ങോട്ട് കണ്ടു തീർക്കേണ്ട മുറികളുടെ എണ്ണം ഒരൽപ്പം കൂടുതലാണ്. ഒരോ മുറിയും കടന്ന് അടുത്തതിലേക്ക് എത്തുമ്പോഴേക്കും ലഭിക്കുന്നത് പുതിയ പുതിയ അറിവുകളും. പുതിയ തലമുറക്ക് ഒട്ടും സുപരിചിതമല്ലാത്തതും അന്യം നിന്നു പോകുന്നതുമായ വിവിധ നാടൻ കളികളുടെ ചെറിയ മാതൃകകളെ കാണാനും മനസിലാക്കാനും ഇവിടെ അവസരമുണ്ട്. 

മനസിലാക്കാം തെയ്യത്തെ

ഉത്തരമലബാറിനെന്നും തെയ്യത്തിൻ്റെയും തിറയുടേയും ഉത്സവലഹരിയാണ്. മലബാറിലെ കാവുകളിൽ ഇപ്പോഴും നാനൂറോളം തെയ്യങ്ങൾ കെട്ടിയാടുന്നുണ്ട്. തെയ്യം, പടയണി തുടങ്ങിയവ ആചാരപരമായ ക്ഷേത്രനൃത്തങ്ങളാണ്. ഇരുപതോളം വിഭാഗത്തിൽ പെട്ടവരാണ് തെയ്യങ്ങൾ കെട്ടിയാടുന്നത്. തെയ്യത്തിൻ്റെയും പൂരക്കളിയുടെയും അവതരണത്തിൽ ഗ്രാമത്തിലെ എല്ലാ ആളുകളും ഉൾപ്പെടുന്നു. മുസ്ലീം തെയ്യങ്ങൾ പോലും അവതരിപ്പിക്കാറുണ്ട്. ജാതി മത വ്യത്യാസങ്ങളില്ലാതെ ഒരു ജനത ഒന്നടങ്കം ആഘോഷമാക്കി മാറ്റുന്ന തെയ്യത്തിൻ്റെ വിവിധ കോലങ്ങളുടെ മാതൃക ഇവിടെ തയ്യാറാക്കിയിട്ടുണ്ട്. കേരളത്തിലെ തെയ്യവും തിറയും കാണാനും പഠിക്കാനും വിദേശികളടക്കം എത്താറുണ്ട്. ഫോക്ക് ലോർ അക്കാദമിയിലെത്തിയാൽ തെയ്യത്തിൻ്റെ പൂർണ്ണ ചമയങ്ങളാൽ തയ്യാറാക്കിയ രൂപങ്ങളോടൊപ്പം ഒരോ തെയ്യത്തിൻ്റെയും വിവരണങ്ങൾ ഇംഗ്ലീഷിലും മലയാളത്തിലും വായിച്ച് മനസിലാക്കാം. പുതിയ ഭഗവതി തെയ്യം, ദൈവത്താർ, തിരുവപ്പന, മുത്തപ്പൻ, കതിവന്നൂർ വീരൻ, ബാലിത്തെയ്യം തുടങ്ങിയ ഉത്തര മലബാറിലെ വിവിധ തെയ്യ കോലങ്ങളുടെ മുഖത്തെഴുത്തുകളും ഇവിടെയുണ്ട്. 

നാടൻ തനിമയും കലകളും 

ഇനി തെയ്യം മാത്രമല്ല കേരളത്തിൻ്റെ തനത് കലാരൂപങ്ങളായ കളരിപ്പയറ്റ്, പൂരക്കളി, വേലകളി, പടയണി, തിരുവാതിര, മാർഗംകളി, മഗംലകളി, തോൽപ്പാവകൂത്ത്, പടയണി, അലാമിക്കളി തുടങ്ങി കേരളത്തിലെ നാടോടികളായ കാക്കാലന്മാർ പരമ്പരാഗതമായ രീതിയിൽ അവതരിപ്പിച്ചു വരുന്ന ആക്ഷേപഹാസ്യനാടകമായ കാക്കാരിശ്ശി നാടകത്തെ പറ്റിയും ഇനി കൂടുതലറിയാം. 

ഇത്തരം കലാരൂപങ്ങളോടൊപ്പം പണിയ, കുറിച്യ, വേലൻ, കരിംപാലൻ തുടങ്ങിയ ഗോത്ര വിഭാഗങ്ങളുടേതും ചില സാമുദായിക വിഭാഗങ്ങളുടെ പരമ്പരാഗത കലകളെ ഉൾപ്പെടെ മനസിലാക്കാം. കളരിപ്പയറ്റിൻ്റെ ആയോധന കലാരൂപം, മറത്തുകളി, പൂരക്കളി എന്നിവയുടെ നൃത്തരൂപങ്ങൾ, വടക്കൻപാട്ട്, വേടൻപാട്ട് തുടങ്ങിയ താരാട്ടുപാട്ട് എന്നിവയെക്കുറിച്ചുള്ള വിവരങ്ങളും ഇവിടെ നിന്ന് ലഭിക്കും. ഗോദാവരി പോലുള്ള നാടൻ നാടകങ്ങളും തൊടീക്കളം എന്ന മ്യൂറൽ പെയിൻ്റിംഗുകളും ഒപ്പന പോലുള്ള മുസ്ലീം കലാരൂപങ്ങളേയും അക്കാദമി പ്രോത്സാഹിപ്പിക്കുന്നുണ്ട്. കുത്ത് റാത്തീബ്, ദേവകൂത്ത്, കളിയൂട്ട്, മുടിയേറ്റ് തുടങ്ങിയ അനുഷ്ഠാന കലകൾക്കുപയോഗിക്കുന്ന വസ്തുക്കളും പ്രദർശനത്തിനായി ഒരുക്കിയിട്ടുണ്ട്. കൂടാതെ, ചവിട്ടുനാടകം, ഗരുഡൻ തുള്ളൽ തുടങ്ങിയ നാടൻ കലകളെക്കുറിച്ചുള്ള പഠനവും ഗവേഷണവും അക്കാദമി പ്രോത്സാഹിപ്പിക്കുന്നു.

ചരിത്ര പ്രാധാന്യമുള്ള ഉപകരണങ്ങളെ അറിയാം

വർഷങ്ങൾ പഴക്കമുള്ള ഉപകരണങ്ങളുമുണ്ടിവിടെ. പഴയ മെതിയടി, ചിരവ, മൺപാത്രങ്ങൾ, മരപാത്രങ്ങൾ, ത്രാസ്, കൈയിലുകൾ, ചുണ്ണാമ്പ് പാത്രം, കാസേർ, അരസേർ, തൈര് കടയുന്ന കോൽ തുടങ്ങിയ പല ഉപകരണങ്ങളും ഇവിടെ കാണാം. ഈ ഫോക്ക്ലോർ അക്കാദമിയിൽ കേരളത്തിലെ നാടൻ കലകൾക്ക് മാത്രമല്ല പ്രാധാന്യമുള്ളത്. മറിച്ച് വിവിധ സംസ്ഥാനങ്ങളുടെ കലകൾക്കും ഉപകരണങ്ങൾക്കും ഇവിടെ സ്ഥാനമുണ്ട്. ഒരു കൊട്ടാരത്തിലെ മുഴുവൻ മുറിയും വ്യത്യസ്തമായ രീതിയിൽ വിവിധ ഉപകരണങ്ങളാലും ചിത്രങ്ങളാലും സജ്ജീകരിച്ചിരിക്കുകയാണിവിടെ. മരം കൊണ്ടു നിർമ്മിച്ച കോണി പടി കടന്ന് മുകളിലെത്തിയാൽ അവിടെയുമുണ്ട് കാണാൻ. മുകളിലത്തെ നിലയിലെ കിളിവാതിലിലൂടെ നോക്കിയാൽ താഴെ നടുമുറ്റവും തുളസി തറയും തമിഴ് നാട്ടുകാരുടെ ആഘോഷങ്ങളിലേയും മരണാനന്ത ചടങ്ങുകളിലേയും നിറ സാന്നിധ്യമായ അവർ ദൈവമായി കണക്കാക്കുന്ന അയ്യനാർ കുതിര ഉൾപ്പെടെയുള്ള വ്യത്യസ്തങ്ങളായ ടെറാകോട്ട ഉപകരണങ്ങളുമുണ്ടിവിടെ. 

വിവിധ ശിൽപ്പശാലകൾ

വിവിധ സംസ്ഥാനങ്ങളിൽ നിന്നായി ആളുകൾ പങ്കെടുത്തുകൊണ്ട് നടത്തിയ നിരവധി ശിൽപ്പശാലകൾ അക്കാദമി സംഘടിപ്പിക്കാറുണ്ട്. ഉത്തർപ്രദേശ്, മണിപ്പൂർ, ആസാം, രാജസ്ഥാൻ, ഒഡീഷ, തമിഴ്നാട് തുടങ്ങിയ സംസ്ഥാനങ്ങളിൽ നിന്നായി ആളുകൾ പങ്കെടുത്തുകൊണ്ട് 2014 ൽ നടത്തിയ ടെറാക്കോട്ട ശിൽപ്പശാലയുടെ ഭാഗമായി നിർമ്മിച്ച വിവിധ ടെറാകോട്ട ഉപകരണങ്ങൾ ഇവിടെ സംരക്ഷിക്കപ്പെട്ടിട്ടുണ്ട്. 2015 ൽ ചത്തീസ്ഗണ്ഡിൽ നിന്ന് ആളുകൾ പങ്കെടുത്ത നടത്തിയ ബസ്തർ ദോക്കറ ശിൽപ്പശാലയുടെ ഭാഗമായി തയ്യാറാക്കിയ വിവിധ ഉപകരണങ്ങളുമുണ്ടിവിടെ. വിവിധ സംസ്ഥാനങ്ങളിൽ നിന്നായി ആളുകൾ പങ്കെടുത്തുകൊണ്ട് 2016 ൽ നടത്തിയ ലോഹാര ശിൽപ്പശാലയുടെ ഭാഗമായി തയ്യാറാക്കിയവ ഉപയോഗിച്ച് ആർട്ട് ഗ്യാലറി ഒരുക്കിയിട്ടുണ്ട്.

വായിക്കാനും പഠിക്കാനും ഉണ്ട് ഇടം

 

ഫോക്ക്ലോറുമായി ബന്ധപ്പെട്ടും അല്ലാത്തതുമായ നിരവധി ബുക്കുകളുടെ ശേഖരണവുമുണ്ടിവിടെ. വിദ്യാർഥികൾക്കും ഗവേഷകർക്കും ഗവേഷക വിദ്യാർഥികൾക്കും വന്നിരുന്ന് വായിക്കാനും പഠിക്കാനും സൗകര്യം ഒരുക്കുകയാണ് അക്കാദമി. ഫോക്ക്ലോർ വിഷയങ്ങളിൽ ഗവേഷണം ചെയ്യുന്നവരാണ് കൂടുതലും പഠിക്കാനായി ഇവിടെ എത്തുന്നത്.

നാടൻ കലകൾ കാണാനുമുണ്ട് അവസരം

ഇനി അക്കാദമിയിലെത്തി നാടൻ കലകളെ മനസിലാക്കി മടങ്ങാം എന്ന് മാത്രമല്ല കാണാനുമുണ്ട് അവസരം. ഫോക്ക് ലോർ അക്കാദമിയിലെത്തി 1000 രൂപ നൽകി അഫിലിയേഷൻ ചെയ്താൽ ക്ലബുകൾക്ക് മൂന്ന് വർഷത്തേക്ക് അക്കാദമി നേരിട്ട് ഇത്തരം പരമ്പരാഗത കളികൾ യാതൊരു ചിലവുമില്ലാതെ അവതരിപ്പിച്ച് നൽകുകയും ചെയ്യും. ഇനി സ്കൂൾ ക്ലബുകൾക്കാണെങ്കിൽ 500 രൂപയാണ് അഫിലിയേഷൻ തുക. 

പ്രവേശന ഫീസുകളിങ്ങനെ

വ്യക്തികൾക്ക് 30 രൂപയും കോളേജ് വിദ്യാർഥികൾക്ക് 20 രൂപയും സ്കൂൾ വിദ്യാർഥികൾക്ക് 10 രൂപയും ആണ് പ്രവേശന ഫീസ്. ഇനി കാമറ ഉപയോഗിക്കാൻ 200 രുപയും വീഡിയോ എടുക്കാൻ 1000 രൂപയുമാണ് നൽകേണ്ടത്.

 

നാടോടി കഥകളുടെ സമ്പന്നമായ പാരമ്പര്യമുള്ള ഒരിടമാണ് കേരളം. ഈ നാടോടി കഥകളൊക്കെയും മനുഷ്യൻ്റെ ചിന്തയുടേയും പെരുമാറ്റത്തിൻ്റെയും പ്രകടനങ്ങളാണ്. അത് അവരുടെ സംസ്കാരവും ഐതിഹ്യവുമായി ബന്ധപ്പെട്ടിരിക്കുന്നു. ഫ്യൂഡൽ രാജഭരണ കാലത്ത് അടിച്ചമർത്തപ്പെട്ട ജനതയുടെ ഇതിഹാസമായാണ് ഫോക്ക്ലോറിനെ കണക്കാക്കുന്നത്. അത്തരത്തിലുള്ള ജനതയുടെ സമൂഹികവും സാംസ്കാരികവും ഉപജീവനപരവുമായ ജീവിത രീതികളെ പഠന വിധേയമാക്കുകയാണ് ഫോക്ക്ലോർ. ജനം എന്നും വിജ്ഞാനം എന്നും അർത്ഥമുള്ള രണ്ടു വാക്കുകൾ ചേർന്നാണ് ഫോക്ക്ലോർ ആവുന്നത്. വിവിധ സംസ്കാരത്തിൻ്റെ ഭാഗമായി ഉരുത്തിരിഞ്ഞു വന്ന വൈവിധ്യങ്ങളായ കലകളെ മനസിലാക്കാനായി ഇടം ഒരുക്കുകയാണ് കണ്ണൂർ ജില്ലയിൽ സ്ഥിതി ചെയ്യുന്ന ഫോക്ക്ലോർ അക്കാദമി.

ജൂൺ മൂന്നു മുതൽ പുതിയ അധ്യായന വർഷം ആരംഭിച്ചതോടെ ഇനി സ്കൂൾ, കോളേജ് വിദ്യാർഥികൾക്കും ഗവേഷക വിദ്യാർഥികൾക്കും പാഠ്യ പാഠ്യേതര പ്രവർത്തനങ്ങളുടെ ഭാഗമായും അല്ലാതെയും ഇവിടെ എത്തിയാൽ പഠിക്കാനും മനസിലാക്കാനും അവസരമുണ്ട്.