പാണത്തൂർ
പാണത്തൂർ ടൗണില്‍ വീണ്ടും ഭീതിയുണർത്തി കാട്ടാനക്കൂട്ടം. ഇന്നലെ പുലർച്ചെ ഒന്നോടെയാണ് സംഭവം. ഏഴു കാട്ടാനകളാണ് പാണത്തൂർ പഴയ ബസ് സ്റ്റാൻഡിനു സമീപം പുഴ നീന്തിക്കടന്നത്.
ഇതു നാട്ടുകാരുടെ ശ്രദ്ധയില്‍ പെട്ടതിനാല്‍ വലിയ അപകടം ഒഴിവായി.
പരിയാരം റോഡിന്‍റെ പാലത്തിനടിയില്‍ വെച്ച്‌ വിവരമറിഞ്ഞ് പാഞ്ഞെത്തിയ പനത്തടി ഫോറസ്റ്റ് സെക്ഷൻ ഓഫീസർ ശേഷപ്പയും ആർആർടി അംഗങ്ങളും ചേർന്ന് ആനക്കൂട്ടത്തെ ഇക്കരെ കയറാൻ അനുവദിക്കാതെ തുരത്തി. തിരിച്ച്‌ പുഴ നീന്തിയ ആനക്കൂട്ടം റോഡില്‍ കയറിയ ശേഷം വനപാലകർ പടക്കം പൊട്ടിച്ചും കൂക്കിവിളിച്ചും ആനക്കൂട്ടത്തെ വട്ടക്കയം ഭാഗത്തേക്ക് കയറ്റിവിട്ടു.
ദിവസങ്ങളായി പരിയാരം ഭാഗത്ത് ആനകളിറങ്ങുന്നതിനാല്‍ ഇന്നലെ രാത്രി വനപാലകർ സ്ഥലത്ത് തമ്ബടിച്ചിരുന്നു. വനപാലകർ സമീപത്ത് തന്നെ ഉണ്ടായതിനാല്‍ ആനകള്‍ ബസ് സ്റ്റാൻഡില്‍ എത്തിയില്ല.
അതുകൊണ്ട് വലിയ അപകടം ഒഴിവായി. ആനക്കൂട്ടത്തില്‍ രണ്ടു കുട്ടിയാനകളും ഒരു കൊമ്ബനാനയുമടക്കം ഏഴ് ആനകളാണ് ഉണ്ടായിരുന്നത്. ഏറെ പണിപ്പെട്ടാണ് ഇവയെ കാടുകയറ്റിയതെന്ന് വനപാലകർ പറഞ്ഞു. ആനകള്‍ ജനവാസസ്ഥലത്ത് എത്തിയതോടെ ഇന്നലെ കർഷകരും തൊഴിലുറപ്പ് തൊഴിലാളികളും ചേർന്ന് അതിർത്തിയിലെ കാടുകള്‍ വെട്ടിത്തെളിച്ചു തുടങ്ങി.
ആകെ ഒരു കിലോമീറ്റർ വരുന്ന വനാതിർത്തിയില്‍ അരകിലോമീറ്ററോളം ഇന്നലെ വെട്ടിത്തെളിച്ചു.
ബാക്കിഭാഗം ഇന്നു പൂർത്തിയാക്കും. തകരാറിലായിരുന്ന സോളാർ വേലികള്‍ പുനഃസ്ഥാപിച്ച്‌ തുടങ്ങിയിട്ടുണ്ട്.
ഒരു അഭിപ്രായം പോസ്റ്റ് ചെയ്യൂ