സൂറിച്ച്‌ ഡയമണ്ട് ലീഗ്; നീരജ് ചോപ്രയ്ക്ക് രണ്ടാം സ്ഥാനം, ലോങ്ജംപില്‍ ശ്രീശങ്കര്‍ അഞ്ചാം സ്ഥാനത്ത്

സൂറിച്ചില്‍ നടന്ന പുരുഷന്മാരുടെ ജാവലില്‍ ത്രോയില്‍ ലോക ചാമ്ബ്യനും ഒളിംപിക് സ്വര്‍ണ മെഡല്‍ ജേതാവുമായ നീരജ് ചോപ്ര രണ്ടാം സ്ഥാനത്തെത്തി.

അവസാന റൗണ്ടില്‍ 85.71 മീറ്റര്‍ എറിഞ്ഞാണ് താരം രണ്ടാം സ്ഥാനത്തെത്തിയത്. ലോക ചാമ്ബ്യൻഷിപ്പില്‍ വെങ്കലം നേടിയ ചെക്ക് റിപ്പബ്ലിക്കിന്റെ ജാക്കൂബ് വാഡ്‌ലെച്ചിനാണ് (85.86 മീറ്റര്‍) ഒന്നാംസ്ഥാനം. 15 സെന്റിമീറ്ററിന്റെ വ്യത്യാസത്തിലാണ് നീരജിന് ഒന്നാംസ്ഥാനം നഷ്ടമായത്. ജര്‍മനിയുടെ ജൂലിയൻ വെബര്‍ 85.04 മീറ്റര്‍ എറിഞ്ഞ് മൂന്നാംസ്ഥാനത്തെത്തി.

ലോക ചാംപ്യൻഷിപ്പിലെ സ്വര്‍ണനേട്ടത്തിന് ശേഷമുള്ള നീരജ് ചോപ്രയുടെ ആദ്യ മത്സരമാണിത്. ആദ്യ ശ്രമത്തില്‍ തന്നെ 80.79 മീറ്റര്‍ എറിഞ്ഞാണ് ചോപ്ര തുടങ്ങിയത്. രണ്ടാമത്തെയും മൂന്നാമത്തെയും ശ്രമങ്ങള്‍ ഫൗള്‍ ആയതോടെ ചോപ്ര അഞ്ചാം സ്ഥാനത്തേക്കെത്തി. മൂന്ന് അവസരങ്ങള്‍ ഫൗളായപ്പോള്‍ 85 മീറ്റര്‍ കടന്നത് രണ്ട് ത്രോകള്‍ മാത്രമാണ്. നാലാം ശ്രമത്തില്‍ 85.22 മീറ്റര്‍ എറിഞ്ഞാണ് സ്റ്റാൻഡിങില്‍ തിരിച്ചെത്തിയത്. ഇതോടെ, മൂന്ന് മീറ്റുകളില്‍ നിന്ന് 23 പോയിന്റുമായി സെപ്റ്റംബര്‍ 17 ന് അമേരിക്കയിലെ യൂജിനില്‍ നടക്കുന്ന ഡയമണ്ട് ലീഗ് ഫൈനലിലേക്ക് ചോപ്ര യോഗ്യത നേടി. കഴിഞ്ഞ വര്‍ഷം ഡയമണ്ട് ലീഗ് ട്രോഫി നേടിയിരുന്നു.

80.79 മീറ്റര്‍ എറിഞ്ഞ് ചോപ്ര മത്സരം തുടങ്ങിയപ്പോള്‍, 81.62 മീറ്റ‍ര്‍ എറിഞ്ഞ് ലിത്വാനിയയുടെ എഡിസ് മാറ്റുസെവിസിയസ് മുന്നിലെത്തി. രണ്ടാം ശ്രമത്തില്‍ ജാക്കൂബ് വാഡ്‌ലെച്ച്‌ 83.46 മീറ്റ‍ര്‍ എറിഞ്ഞു. രണ്ടാം ശ്രമവും ഫൗള്‍ ആയതിനാല്‍ നീരജ് മൂന്നാം സ്ഥാനത്ത് തുട‍ര്‍ന്നു. പിന്നീട് ജൂലിയൻ വെബര്‍ 84.75 മീറ്റ‍ര്‍ എറിഞ്ഞു. രണ്ടാം റൗണ്ട് അവസാനിച്ചപ്പോഴും വെബ‍ര്‍ ഒന്നാം സ്ഥാനത്ത് തുടര്‍ന്നപ്പോള്‍ നീരജ് അഞ്ചാം സ്ഥാനത്തേക്ക് പിന്തള്ളപ്പെട്ടു. ചോപ്രയുടെ മൂന്നാം ശ്രമവും ഫൗളായി. ലീഡ് നിലനിര്‍ത്തി വെബര്‍ മൂന്നാം റൗണ്ട് അവസാനിപ്പിച്ചു. നാലാം ശ്രമത്തില്‍ ജാക്കൂബ് 85.86 മീറ്റ‍ര്‍ എറിഞ്ഞ് മുന്നിലെത്തി. ഇത്തവണയും പരമാവധി ശ്രമിച്ച നീരജ് ചോപ്ര 85.22 മീറ്റര്‍ ദൂരം താണ്ടി രണ്ടാം സ്ഥാനം കരസ്ഥമാക്കി. അവസാന ത്രോയില്‍ 85.71 മീറ്റ‍ര്‍ ദൂരം താണ്ടാൻ ചോപ്രയ്ക്ക് സാധിച്ചെങ്കിലും ചെറിയ വ്യത്യാസത്തില്‍ സ്വ‍ര്‍ണം നേടാനായില്ല.

അതേസമയം, ലോക ചാമ്ബ്യൻഷിപ്പിലെ മോശം പ്രകടനത്തിന്റെ നിരാശ തീര്‍ക്കാനിറങ്ങിയ മലയാളി താരം മുരളി ശ്രീശങ്കര്‍ പുരുഷന്മാരുടെ ലോങ്ജമ്ബില്‍ അഞ്ചാമതായി. 7.99 മീറ്റര്‍ ചാടിയാണ് ശ്രീശങ്കര്‍ അഞ്ചാം സ്ഥാനത്തെത്തിയത്. ഗ്രീസിന്റെ മില്‍തിയാഡിസ് ടെന്റോഗ്ലു 8.20 മീറ്റര്‍ ചാടി ഒന്നാമതെത്തി.