കണ്ണൂർ >
50 വയസ്സ് കഴിഞ്ഞവര്‍ക്കുള്ള മരുന്നുകളും മെഡിക്കല്‍ അനുബന്ധ ഉപകരണങ്ങളും വീട്ടുപടിക്കല്‍ എത്തിച്ച് നൽകുന്ന കേരള മെഡിക്കല്‍ സര്‍വീസസ് കോര്‍പ്പറേഷന്റെ ‘കാരുണ്യ@ഹോം’ പദ്ധതിയിലേക്ക് നാളെ വരെ (ജൂലൈ 15) രജിസ്റ്റര്‍ ചെയ്യാം. ‘കാരുണ്യ കമ്മ്യൂണിറ്റി ഫാര്‍മസി’ യുടെ രണ്ടാം ഘട്ടമാണ് ‘കാരുണ്യ@ഹോം'.
സര്‍ക്കാര്‍ ആശുപത്രികളിലെ കാരുണ്യ ഫാര്‍മസികളിലേതിനേക്കാള്‍ ഒരു ശതമാനം വിലക്കിഴിവിലാണ് മരുന്നുകള്‍, ഗ്ലൂക്കോമീറ്റര്‍, ബിപി അപ്പാരറ്റസ്, എയര്‍ബെഡ് തുടങ്ങിയവയും ലഭിക്കും. പദ്ധതിയുടെ ഭാഗമായി ഇന്‍സുലിന്‍ ഉള്‍പ്പെടെയുള്ള മരുന്നുകള്‍ കൊറിയര്‍ മുഖേന വീട്ടിലെത്തിച്ചു കൊടുക്കും. മുതിർന്ന പൗരൻമാർ കൊവിഡ് സാഹചര്യത്തില്‍ മരുന്നിനും മറ്റുമായി പുറത്തിറങ്ങുന്ന സാഹചര്യം ഒഴിവാക്കുകയാണ് പദ്ധതിയുടെ ലക്ഷ്യം. കിടപ്പ് രോഗികള്‍, കാന്‍സര്‍ ബാധിതര്‍, ജീവിതശൈലി രോഗങ്ങളുള്ളവര്‍ തുടങ്ങിയവര്‍ക്ക് ഏറെ പ്രയോജനകരമാണ് പദ്ധതി.
www.khome.kmscl.kerala.gov.in എന്ന വെബ്‌സൈറ്റിൽ രജിസ്റ്റര്‍ ചെയ്തോ സര്‍ക്കാര്‍ ആശുപത്രിയിലെ കാരുണ്യ ഫാര്‍മസിയില്‍ ലഭിക്കുന്ന ഫോം പൂരിപ്പിച്ച് നല്‍കിയോ പദ്ധതിയുടെ ഗുണഭോക്താവാകാം.
രജിസ്റ്റര്‍ ചെയ്തവര്‍ക്ക് കുറിപ്പടി പ്രകാരമുള്ള മരുന്നുകൾ വീട്ടിലെത്തിത്തുടങ്ങും. കേരള മെഡിക്കല്‍ സര്‍വ്വീസസ് കോര്‍പ്പറേഷന്റെ അക്കൗണ്ടിലേക്ക് തുക കൈമാറിയാല്‍ മതി.
സ്ഥിരമായി ഉപയോഗിക്കേണ്ട മരുന്നുകൾ ഓരോ മാസവും മുടക്കമില്ലാതെ വീട്ടിലെത്തും. ലഭിക്കുന്ന മരുന്നുകള്‍ക്ക് എന്തെങ്കിലും തരത്തിലുള്ള ന്യൂനതകള്‍ ശ്രദ്ധയില്‍പെട്ടാല്‍ 48 മണിക്കൂറിനകം ബില്ലില്‍ നല്‍കിയിരിക്കുന്ന ഫോണ്‍, ഇമെയില്‍ വഴിയോ കാരുണ്യ ഫാര്‍മസിയിൽ നേരിട്ടോ അറിയിച്ചാല്‍ ഉടന്‍ പരിഹാര നടപടി സ്വീകരിക്കും. കുറിപ്പടിയില്‍ മാറ്റം വരുത്തണമെങ്കില്‍ കാരുണ്യ ഫാര്‍മസി വഴിയോ ഓണ്‍ലൈനായോ രജിറ്റര്‍ നമ്പര്‍ സഹിതം അപേക്ഷിക്കാം.
ഒരു അഭിപ്രായം പോസ്റ്റ് ചെയ്യൂ