നോർത്ത് സെൻ്റിനൽ ദ്വീപ്
ഇന്ത്യയുടെ അധികാരപരിധിയിലുള്ള ബംഗാൾ ഉൾക്കടലിൽ സ്ഥിതി ചെയ്യുന്ന ദ്വീപ് സമൂഹമാണ് ആന്തമാൻ ദ്വീപ്. ഇവിടെയാണ് ദുരൂഹതകൾ നിറഞ്ഞ നിഗൂഢതകളുടെ പര്യായമായ നോർത്ത് സെന്റിനൽ ദ്വീപ്. പൊതു സമൂഹത്തിൽ നിന്നും തികച്ചും ഒറ്റപ്പെട്ടു കഴിയുന്ന ഒരു കൂട്ടം മനുഷ്യരാണ് സെൻ്റിനെൽ ദ്വീപ് നിവാസികൾ. അവരുടെ ജീവിതവും ജീവിതരീതികളും പുറം ലോകത്തിന് എന്നും ദുരൂഹത നിറഞ്ഞതാണ്.
വെള്ള നിറത്തിലുള്ള കടലാൽ ചുറ്റപ്പെട്ട ഈ ദ്വീപിൽ സ്വാഭാവിക തുറമുഖങ്ങൾ ഒന്നും തന്നെയില്ല. ചുറ്റും പവിഴപുറ്റുകളുള്ളതിനാൽ ബോട്ടുകൾക്കോ കപ്പലുകൾക്കോ ഈ ദ്വീപിലേക്ക് അടുക്കാൻ പ്രയാസമാണ്. തങ്ങളുടേതായ ഗോത്ര സംസ്‌ക്കാരങ്ങൾ പിന്തുടരുന്ന സെന്റിനെലീസ് വംശജരായ ഇവരെ സന്ദർശിക്കുന്നതോ അതിന് ശ്രമിക്കുന്നതോ കുറ്റകരമാണ്. അവരുടെ ഈ പ്രതേകതകൾ കണക്കിലെടുത്തു ഈ പ്രദേശത്തേക്ക് പോകുന്നത് ഇന്ത്യാ സർക്കാർ വിലക്കിയിട്ടുണ്ട്. ദ്വീപിന്റെ മൂന്നു കിലോമീറ്റർ ചുറ്റളവിനുള്ളിൽ ആർക്കും പ്രവേശമില്ല. എട്ട് കിലോമീറ്റർ നീളവും ഏഴു കിലോമീറ്റർ മാത്രം വീതിയും ഉള്ള ഈ ചെറു ദ്വീപിലേക്കുള്ള പ്രവേശനം ഇന്ത്യൻ സർക്കാർ നിയമംമൂലം നിരോധിച്ചിട്ടുള്ളതാണ്. ഇന്ത്യയുടെ സംരക്ഷിത പ്രദേശമാണ് ഈ ദ്വീപ്.
ഗോത്രവർഗ സംരക്ഷണം മുൻനിർത്തിയാണ് ഈ തീരുമാനം.
ദ്വീപിൽ പ്രവേശിച്ചാൽ
അറിഞ്ഞും അറിയാതെയും ഈ ദ്വീപിനടുത്തെത്തിയവരെ വരവേൽക്കുക ദ്വീപ് നിവാസികളുടെ അമ്പുകളും കുന്തങ്ങളുമാണ്. തങ്ങളുടെ പരിമിതമായ അതിജീവന വിഭവങ്ങൾ കവരാൻ വരുന്നവരായാണ് മറ്റുള്ളവരെ ദ്വീപ് നിവാസികൾ കണ്ടിരുന്നത്. താഴ്ന്നുപറക്കുന്ന വിമാനങ്ങളോ ദ്വീപിന് മുകളിലൂടെ വട്ടമിട്ടുപറക്കുന്ന ഹെലികോപ്ടറുകളോ കണ്ടാൽ ഇവർ അമ്പെയ്യുകയും കല്ലെറിയുകയും ചെയ്യുന്നത് സാധാരണയാണ്. ദ്വീപിന് സമീപമെത്തുന്ന ബോട്ടുകളും മറ്റും ആയുധമേന്തിയ സെൻ്റിനൽസ് യോദ്ധാക്കൾ ആക്രമിക്കുകയും പതിവാണ്.
സുനാമിയുടെ സർവ്വനാശം
ആന്തമാൻ ദ്വീപുകളിൽ സർവ്വനാശം വിതച്ച 2004 ലെ സുനാമിയിൽ ദ്വീപ് സമൂഹങ്ങളാകെ തകർന്ന് തരിപ്പണമായപ്പോൾ സെൻ്റിനൽ ദ്വീപിലെ ഗോത്ര സമൂഹവും സമ്പൂർണമായി നശിച്ചിരിക്കാം എന്നാണ് ഭരകൂടം കരുതിയിരുന്നത്. എന്നാൽ എല്ലാ കണക്ക് കൂട്ടലുകളും തെറ്റിച്ച് ഇവർ അതി സമർഥമായി അതിനെ അതിജീവിച്ചു. പ്രകൃതിയുമായി ആഴത്തിൽ ഇണങ്ങി ദ്വീപിൻ്റെ തീരദേശങ്ങളിൽ അധിവസിച്ച് വന്നിരുന്ന ഇവർ, കടലിലുണ്ടായ അസ്വഭാവിക മാറ്റങ്ങൾ മുൻകൂട്ടി മനസിലാക്കി ദ്വീപിൻ്റെ സുരക്ഷിത സ്ഥാനങ്ങളിലേക്ക് മുമ്പേ മാറിയതായിരുന്നു സുനാമിയിൽ നിന്ന് രക്ഷ നേടാൻ കാരണമായത്.
ചരിത്രം
ബ്രിട്ടീഷ് ഈസ്റ്റ് ഇന്ത്യാ കമ്പനിയുടെ സർവേ ഉദ്ദ്യോഗസ്ഥനായ ജോൺ റിച്ചി 1771 ഈ ദ്വീപിനടുത്ത് കൂടി കപ്പലിൽ സഞ്ചരിച്ചപ്പോഴാണ് ഇവിടെ മനുഷ്യവാസമുണ്ടെന്ന് ആദ്യമായി കണ്ടെത്തിയത്. 1867-ൽ ഒരു ഇന്ത്യൻ കച്ചവടക്കപ്പൽ ഈ തീരത്തിനടുത്ത് മണ്ണിലുറച്ച് തകർന്നിരുന്നു. അതിലെ ജോലിക്കാരും ക്രൂ മെംമ്പർമാരും അടങ്ങിയ 106 പേർ കരയിലെക്ക് നീന്തി. പക്ഷെ കടുത്ത ആക്രമണമാണ് അവർക്ക് കരയിൽ നിന്ന് നേരിടേണ്ടി വന്നത്. തിരിച്ചോടിക്കപ്പെട്ട അവരിൽ കുറേപ്പേറെ റോയൽ നേവിയുടെ രക്ഷാ സംഘമാണ് കണ്ടെത്തി രക്ഷിച്ചത്. ഇതോടു കൂടി നാവികരുടെ ഒരു പേടി സ്വപ്നമായി സെന്റിനൽ ദ്വീപ് മാറി.
ഈ ദ്വീപിനേയോ മനുഷ്യരേയോ പറ്റി പഠിക്കാൻ പോയവരിൽ പലരും തിരിച്ചു വന്നിട്ടില്ല എന്നതു തന്നെയാണ് ദ്വീപിനെ നിഗൂഡമാക്കുന്നത്. നരവംശശാസ്ത്ര പഠന രീതികളൊന്നും പ്രാവർത്തികമാക്കാൻ കഴിയാത്ത ഒരിടമാണിത്. പുറത്തു നിന്നുള്ള ആളുകളുടെ കടന്നുവരവിനെ ബലപ്രയോഗത്തിലൂടെ നേരിട്ട് ഒറ്റപ്പെട്ട് കഴിയുന്ന ഒരു വിഭാഗം. തങ്ങളൊഴികെ പുറത്തുനിന്നുള്ള ആരും ഇവർക്ക് ശത്രുക്കളാണ്. രാജ്യത്ത് നിലനിൽക്കുന്ന മറ്റേതു നിയമങ്ങൾക്കും അഥീതമായി മറ്റുള്ളവരെ അമ്പും വില്ലും കുന്തവും ഉപയോഗിച്ച് പേടിപ്പിച്ച് ഓടിക്കുന്നതു മുതൽ വേണ്ടി വന്നാൽ അവരെ കൊല്ലാനുള്ള നിയമം വരെയും കൈമുതലാക്കിയവർ.
1960 ൽ യു എൻ ദേബർ കമ്മീഷൻ ശുപാർശ പ്രകാരം 1975 ൽ ഗവൺമെൻ്റ് പുറത്തിറക്കിയ പർട്ടിക്കുലർലി വൾണറബിൾ ട്രെബൽ ഗ്രൂപ്പിൽ ഇടം നേടിയ 75 ട്രെബൽ ഗ്രൂപ്പിൽ ഒന്നാണ് സെൻ്റിനെൽസും. എന്നിരുന്നാലും മറ്റു പിവിടിജി ഗ്രൂപ്പുകളെ അപേക്ഷിച്ച് പുറം ലോകവുമായുള്ള ബന്ധം വിഛേദിച്ച് സ്വയം പര്യാപ്തമായി കഴിയുന്ന വിഭാഗം.
1956 ലാണ് സെൻ്റിനെൽസിൻ്റെ സംരക്ഷണത്തിനു വേണ്ടി സർക്കാർ ആൻ്റമാൻ ആൻ്റ് നിക്കോബാർ അയലൻ്റ്സ് പ്രൊട്ടക്ഷൻ ആൻ്റ് അബോറിജിനൽ ട്രെബ്സ് റെഗുലേഷൻ നിയമം പാസാക്കുന്നത്. 2011ലെ സെൻസസ് പ്രകാരം 40 ഗോത്ര ജന വംശജർ ഇവിടെ അധിവസിക്കുന്നു എന്നതാണ് കണക്ക്, അതിൽ പൂർണമായും വ്യക്തയില്ല. ഇപ്പോഴത്തെ ജനസംഖ്യയുടെ കാര്യത്തിലും വ്യക്തമായ കണക്കുകൾ ലഭ്യമല്ല.
ശിലായുഗ മനുഷ്യരായാണ് സെന്റിനലുകൾ അറിയപ്പെടുന്നത്. 60,000 വർഷത്തിലേറെയായി അവർ ദ്വീപിൽ ഏകാന്തതയിലാണ് ജീവിക്കുന്നതെന്നാണ് നരവംശശാസ്ത്രജ്ഞരുടെ അഭിപ്രായം. 1880-ൽ ബ്രിട്ടിഷ് ഉദ്യോഗസ്ഥനായ മോറിസ് പോർട്മാൻ ഇവിടെ ആദ്യമായി കാലുകുത്തി. പഠനത്തിന്റെ ഭാഗമായെത്തിയ അദ്ദേഹത്തിന് നിരവധി ചെറുഗ്രാമങ്ങൾ കാണാൻ സാധിച്ചു. ഇവിടെനിന്ന് രണ്ട് പ്രായമുള്ള ദമ്പതികളേയും നാല് കുട്ടികളേയും പോർട്മാൻ പുറത്തുകടത്തി പോർട്ട് ബ്ലെയറിലെത്തിച്ചു. എന്നാൽ പുറംലോകത്തെ കാലാവസ്ഥയുമായി ഇണങ്ങാൻ സാധിക്കാതിരുന്ന വൃദ്ധദമ്പതികൾ മരണത്തിന് കീഴടങ്ങി. കുട്ടികളെ ദ്വീപിലേക്ക് തിരിച്ചയയ്ക്കുകയും ചെയ്തു. 1883-ൽ പോർട്മാൻ വീണ്ടും ദ്വീപ് സന്ദർശിച്ചു. 1885 ജനുവരിക്കും 1887 ജനുവരിക്കുമിടയിൽ നിരവധി തവണ പോർട്മാൻ നോർത്ത് സെന്റിനൽ ദ്വീപ് സന്ദർശിച്ചു. 1867-മാർച്ചിൽ ഹോംഫ്രേ എന്നയാളും ദ്വീപിലെത്തിയിരുന്നു.
അവസാന വാർത്ത 2018 ൽ
2018-ലാണ് ദ്വീപ് വീണ്ടും വാർത്തകളിൽ നിറഞ്ഞത്. മിഷനറി പ്രവർത്തനങ്ങൾ നടത്തുന്ന ജോൺ അലൻ ചൗ എന്ന 26-കാരനായ അമേരിക്കക്കാരനാണ് അന്ന് കൊല്ലപ്പെട്ടത്. ദ്വീപിലെത്തിയ ഇദ്ദേഹത്തെ കൊന്ന് മണലിൽ കുഴിച്ചിടുകയായിരുന്നെന്നാണ് പിന്നീട് പുറത്തുവന്ന വിവരം. സംഭവവുമായി ബനധപ്പെട്ട് അക്കാലത്ത് പുറത്തുവന്ന വാർത്തകളിലെല്ലാം ഞെട്ടിക്കുന്ന വിവരങ്ങളാണുണ്ടായിരുന്നത്.
സെന്റിനലുകൾ എത്രമാത്രം അപകടകാരികളാണെന്ന് അറിയാവുന്നതുകൊണ്ട് ആക്രമണത്തെ ചെറുക്കാൻ ഷീൽഡുകളടക്കം ശരീരത്തിൽ ഘടിപ്പിച്ചാണ് ജോൺ അലൻ ചൗ ദ്വീപിലിറങ്ങിയത്. വൈറ്റമിൻ ഗുളികകളും രക്തം പെട്ടെന്ന് കട്ടപിടിക്കാനുള്ള മരുന്നുകളും ജോൺ കൈയിൽ കരുതിയിരുന്നു. ശാരീരികമായ ആക്രമണങ്ങളെ ചെറുക്കാൻ നെഞ്ചിലും വയറിലും ഷീൽഡുകളും ധരിച്ചു. ഇതിനുപുറമേ ഗോത്രവർഗക്കാരെ സന്തോഷിപ്പിക്കാനായി ചില സമ്മാനങ്ങളും അദ്ദേഹം കൈയിൽകരുതി. ചൂണ്ടകളും തൂവാലകളും റബർ ട്യൂബുകളുമാണ് സമ്മാനമായി നൽകാൻ കൊണ്ടുപോയിരുന്നത്. എന്നാൽ ദ്വീപിലിറങ്ങിയ ഉടൻ ഗോത്രവർഗക്കാർ അദ്ദേഹത്തിനുനേരേ തുരുതരാ അമ്പെയ്യുകയായിരുന്നു. കൊല്ലപ്പെട്ടതിന്റെ തലേദിവസവും ജോൺ അലൻ ചൗവു സെന്റിനൽ ദ്വീപിലെത്തിയിരുന്നു. മത്സ്യത്തൊഴിലാളികളുടെ സഹായത്തോടെ ദ്വീപിലിറങ്ങിയ ജോണിനെ ദ്വീപിലെ ഒരു ആൺകുട്ടി അമ്പെയ്ത് ആക്രമിച്ചതോടെ ഇദ്ദേഹം തിരികെമടങ്ങി. ഇക്കാര്യത്തെക്കുറിച്ച് ജോൺ തന്റെ ഡയറിയിൽ കുറിക്കുകയും ചെയ്തു. എന്തുകൊണ്ടാണ് ഒരു ചെറിയ കുട്ടി എനിക്ക് നേരെ അമ്പെയ്‌തതെന്നും, ആക്രമണത്തിൽ തന്റെ കൈയിലുണ്ടായിരുന്ന ബൈബിളിന് കേടുപാടുണ്ടായെന്നുമാണ് അദ്ദേഹം ഡയറിയിൽ കുറിച്ചിരുന്നത്.
സംഭവശേഷം പോലീസ് ഉദ്യോഗസ്ഥരും സർക്കാർ അധികൃതരും സെൻ്റിനൽ ദ്വീപിന് സമീപം നിരീക്ഷണം നടത്തിയെങ്കിലും അക്രമസാധ്യത ഭയന്ന് തിരികെമടങ്ങി. ഇതോടെ ജോണിൻ്റെ മൃതദേഹം വീണ്ടെടുക്കാനുള്ള ശ്രമങ്ങൾ വിഫലമായി.
ഒരു അഭിപ്രായം പോസ്റ്റ് ചെയ്യൂ