ആർഎസ്‌എസിനെയും ബിജെപിയെയും കടന്നാക്രമിച്ച്‌ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി. ആർഎസ്‌എസിനും ബിജെപിക്കും ഇന്ത്യയെന്താണെന്ന് മനസ്സിലാകുന്നില്ലെന്ന് അദ്ദേഹം യുഎസ് സന്ദർശനത്തിനിടെ പറഞ്ഞു.
ആർഎസ്‌എസ് പറയുന്നത് ചില സംസ്ഥാനങ്ങള്‍ മറ്റു സംസ്ഥാനങ്ങളേക്കാള്‍ താഴ്ന്നതാണെന്നാണ്. ഇന്ത്യയുടെ ബഹുസ്വരതയെ കുറിച്ച്‌ അറിയാത്തതുകൊണ്ടാണ് ആർഎസ്‌എസ് അങ്ങനെ പറയുന്നത്. വിർജീനിയയിലെ ഇന്ത്യൻ സമൂഹത്തോടു സംസാരിക്കുകയായിരുന്നു അദ്ദേഹം.
'ചില സംസ്ഥാനങ്ങള്‍ മറ്റു സംസ്ഥാനങ്ങളേക്കാള്‍ താഴ്ന്നതാണെന്നാണ് ആർഎസ്‌എസ് പറയുന്നത്. ചില ഭാഷകള്‍ മറ്റു ഭാഷകളേക്കാള്‍ താഴ്ന്നതാണെന്നും, ചില മതങ്ങള്‍ മറ്റു മതങ്ങളേക്കാള്‍ താഴെയാണെന്നും, ചില സമുദായങ്ങള്‍ മറ്റു സമുദായങ്ങളേക്കാള്‍ താഴ്ന്നതാണെന്നും അവർ പറയുന്നു. നിങ്ങള്‍ പഞ്ചാബില്‍ നിന്നോ ഹരിയാനയില്‍ നിന്നോ രാജസ്ഥാനില്‍ നിന്നോ മധ്യപ്രദേശില്‍ നിന്നോ ആകട്ടെ. നിങ്ങള്‍ക്കെല്ലാവർക്കും ചരിത്രവും പാരമ്ബര്യവും ഭാഷയുമുണ്ട്.
ഓരോ മനുഷ്യരും മറ്റൊരാളെ പോലെ പ്രാധാന്യമുള്ളവരാണ്. തമിഴ്, മണിപ്പുരി, മറാഠി, ബംഗാളി എന്നിവ താഴ്ന്ന ഭാഷകളാണെന്നാണ് ആർഎസ്‌എസിന്റെ പ്രത്യയശാസ്ത്രം. അതാണ് ഈ പോരാട്ടത്തിന്റെ ഉള്ളടക്കം. അത് അവസാനിക്കുന്നത് പോളിങ് ബൂത്തിലോ ലോക്‌സഭയിലോ ആണ്. എന്നാല്‍ നമുക്ക് എങ്ങനെയുള്ള ഇന്ത്യയാണ് വേണ്ടതെന്നുള്ളതാണ് യഥാർഥ പോരാട്ടം. ഇന്ത്യയെന്താണെന്ന് അവർക്കറിയില്ലെന്നതാണ് യഥാർഥ പ്രശ്‌നം.'- രാഹുല്‍ പറഞ്ഞു.
ആർഎസ്‌എസിനു മാത്രമല്ല ബിജെപിക്കും ഇന്ത്യയുടെ ബഹുസ്വരത മനസ്സിലാക്കാൻ സാധിച്ചിട്ടില്ലെന്ന് അദ്ദേഹം കുറ്റപ്പെടുത്തി. ''ഇന്ത്യ ഒരു യൂണിയനാണ്. ഭരണഘടനയില്‍ വ്യക്തമായി രേഖപ്പെടുത്തിയിട്ടുണ്ട്. ഇന്ത്യ അല്ലെങ്കില്‍ ഭാരതം എന്നുപറയുന്നത് സംസ്ഥാനങ്ങളുടെ യൂണിയനാണ് എന്ന്. ഭിന്ന ചരിത്രങ്ങളും പാരമ്ബര്യവും സംഗീതവും നൃത്തവും ഈ യൂണിയനില്‍ ഉള്‍പ്പെട്ടിരിക്കുന്നു. എന്നിട്ടും അവർ ഇതിനെ ഒരു യൂണിയനായി കാണുന്നില്ലെങ്കില്‍ അത് വ്യത്യസ്തമാണ്.''- രാഹുല്‍ പറഞ്ഞു.
ഒരു അഭിപ്രായം പോസ്റ്റ് ചെയ്യൂ