കോഴിക്കോട്
എഡിജിപി അജിത് കുമാറിനെതിരെ വീണ്ടും ആരോപണവുമായി പി വി അൻവർ എംഎല്‍എ. എഡിജിപി അവധിയില്‍ പോയത് തെളിവുകള്‍ അട്ടിമറിക്കാൻ എന്ന് അൻവർ ആരോപിച്ചു.
അജിത് കുമാറിനെ നെട്ടോറിയസ് ക്രിമിനല്‍ എന്നാണ് അൻവർ വിശേഷിപ്പിച്ചത്. മാമി തിരോധാനത്തില്‍ എഡിജിപി ഒളിഞ്ഞും തെളിഞ്ഞും പ്രവർത്തിച്ചെന്ന് പറഞ്ഞ അൻവർ തെളിവുകള്‍ ക്രൈം ബ്രാഞ്ച് അന്വേഷണ സംഘത്തിന് കൈമാറുമെന്നും അറിയിച്ചു. മാമി കൊല്ലപ്പെട്ടു എന്നാണ് സംശയിക്കുന്നതെന്നും അൻവർ കൂട്ടിച്ചേർത്തു.
എഡിജിപിയെ മാറ്റുമോ എന്ന ചോദ്യത്തിന് നല്ലതിനായി പ്രാർത്ഥിക്കാം എന്നായിരുന്നു അന്‍വറിന്‍റെ മറുപടി. എന്തായാലും അജിത് കുമാര്‍ മാറും. ഇപ്പോള്‍ രൂപീകരിച്ച ക്രൈം ബ്രാഞ്ച് അന്വേഷണത്തില്‍ വിശ്വാസം ഉണ്ട്. സിബിഐ വരണമെന്ന ആവശ്യത്തില്‍ നിന്നും തല്‍ക്കാലം പിന്മാറാൻ കുടുംബത്തോട് അഭ്യർത്ഥിച്ചിട്ടുണ്ടെന്നും പിവി അൻവര്‍ പറഞ്ഞു.
പി ശശിക്കെതിരായ ആരോപണത്തില്‍ നടപടിയൊന്നും ഇല്ലല്ലോ എന്ന ചോദ്യത്തിന് കാര്യങ്ങള്‍ വഴി തിരിച്ചു വിടേണ്ട എന്നായിരുന്നു അന്‍വറിന്‍റെ പ്രതികരണം. ഇനി രാഷ്ട്രീയ ആരോപണം ഉണ്ടാവില്ല. ഇനി രാഷ്ട്രീയം പറയാൻ ഇല്ല. പൊലീസ് അന്വേഷണത്തില്‍ മാത്രം ആണ് മറുപടിയെന്നും പിവി അന്‍വര്‍ പറഞ്ഞു. മാമിയുടെ കുടുംബത്തെ സന്ദര്‍ശിച്ചശേഷം മാധ്യമങ്ങളോട് സംസാരിക്കുകയായിരുന്നു അൻവര്‍.
ഒരു അഭിപ്രായം പോസ്റ്റ് ചെയ്യൂ