കൊല്ലം
മൈനാഗപ്പള്ളി ആനൂർക്കാവില്‍ വീട്ടമ്മയെ കാറിടിച്ച്‌ വീഴ്ത്തിയ ശേഷം ശരീരത്തിലൂടെ വാഹനം കയറ്റി കൊലപ്പെടുത്തിയ സംഭവത്തില്‍ പോലീസ് കസ്റ്റഡിയിലുളള വനിതാ ഡോക്ടർക്കെതിരേ നടപടി
അപകടത്തിനിടയാക്കിയ വാഹനം ഓടിച്ചിരുന്ന അജ്മലിന്റെ ഒപ്പമുണ്ടായിരുന്ന ഡോ. ശ്രീക്കുട്ടിയെ ജോലിയില്‍ നിന്ന് പുറത്താക്കി.കൊല്ലം കരുനാഗപ്പള്ളി വലിയത്ത് ആശുപത്രിയിലെ താല്‍ക്കാലിക ഡോക്ടറായിരുന്നു ശ്രീക്കുട്ടി. ശ്രീക്കുട്ടി കേസില്‍ ഉള്‍പ്പെട്ടതോടെ ഇവരെ ജോലിയില്‍ നിന്ന് പുറത്താക്കുകയായിരുന്നു.സംഭവത്തില്‍ പ്രതി അജ്മലിനെതിരേ കുറ്റകരമായ നരഹത്യക്ക് പോലീസ് കേസെടുത്തിട്ടുണ്ട്. ശാസ്താംകോട്ട പോലീസാണ് ഭാരതീയ ന്യായ സംഹിതയിലെ വകുപ്പുകള്‍ പ്രകാരം കേസെടുത്തത്. ഒപ്പമുണ്ടായിരുന്ന ഡോ. ശ്രീക്കുട്ടിക്കെതിരെയും പ്രേരണാക്കുറ്റത്തിന് കേസെടുക്കും.
മൈനാഗപ്പള്ളി ആനൂർക്കാവില്‍ ഞായറാഴ്ച വൈകിട്ട് 5.45നായിരുന്നു സംഭവം. അപകടത്തില്‍ മൈനാഗപ്പള്ളി സ്വദേശിനി കുഞ്ഞുമോള്‍ (45) ആണ് മരിച്ചത്.കാർ ഇടിച്ചയുടനെ വാഹനം നിർത്താൻ നാട്ടുകാർ ഡ്രൈവറായ അജ്മലിനോട് പറഞ്ഞെങ്കിലും ഇയാള്‍ അമിതവേഗത്തില്‍ കാർ കുഞ്ഞുമോളുടെ ദേഹത്തുകൂടി കയറ്റിയിറക്കി രക്ഷപ്പെടുകയായിരുന്നു. ഗുരുതരമായി പരിക്കേറ്റ കുഞ്ഞുമോളെ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല .
ഒരു അഭിപ്രായം പോസ്റ്റ് ചെയ്യൂ