പുല്‍പ്പള്ളി
പാടങ്ങള്‍ പച്ചപ്പണിഞ്ഞതോടെ വയനാട് പുല്‍പ്പള്ളി പഞ്ചായത്തിലെ ഒന്നാം വാർഡിലുള്ള ചേകാടിയില്‍ സന്ദർശകത്തിരക്കേറി.
200 ഏക്കറിലായി പരന്നുകിടക്കുന്ന ചേകാടിയിലെ നെല്‍വയലുകളുടെ മനോഹാരിത ആസ്വദിക്കാൻ ദിനേന നൂറുകണക്കിനു ആളുകളാണ് എത്തുന്നത്. മൂന്നു വശങ്ങളില്‍ വനവും ഒരു വശത്തു കബനി നദിയും അതിരിടുന്ന ഗ്രാമമാണ് ചേകാടി.
ജില്ലയില്‍ സുഗന്ധ നെല്ലിനമായ ഗന്ധകശാല ഏറ്റവും കൂടുതല്‍ കൃഷി ചെയ്യുന്നത് ചേകാടിയിലാണ്. നെല്ല് വളർന്നുതുടങ്ങിയതോടെ പച്ചക്കടല്‍ പോലെ പരന്നുകിടക്കുകയാണ് ചേകാടിയിലെ പാടങ്ങള്‍.
പഞ്ചായത്തില്‍ ഏറ്റവുമധികം ഗോത്രകർഷകരുള്ളതും ഈ ഗ്രാമത്തിലാണ്. ഗന്ധകശാലയ്ക്കൊപ്പം പരന്പരാഗത നെല്ലിനമായ വലിച്ചൂരിയും ചേകാടിയില്‍ ധാരാളമായി കൃഷി ചെയ്യുന്നുണ്ട്. ലാഭനഷ്ടം നോക്കാതെയാണ് ചേകാടിയിലെ കർഷകർ പതിറ്റാണ്ടുകളായി നെല്‍ക്കൃഷി ചെയ്യുന്നത്. പാടങ്ങളുടെ മനോഹരിതയും ഏറുമാടങ്ങളും കബനി നദിയും പാലവും വനത്തിലൂടെയുള്ള യാത്രയുമാണ് സഞ്ചാരികളെ ചേകാടിയിലേക്ക് ആകർഷിക്കുന്നത്. കർണാടക അതിർത്തിയോട് ചേർന്നുകിടക്കുന്ന ചേകാടിയില്‍ പ്രതിസന്ധികളെ അതിജീവിച്ചാണ് കർഷകർ നെല്‍ക്കൃഷിയിറക്കുന്നത്.
ഒരു അഭിപ്രായം പോസ്റ്റ് ചെയ്യൂ