വീടുകള്‍, ആരാധനാലയങ്ങള്‍, ലൈബ്രറി, ബാർ, ഹോട്ടലുകള്‍ തുടങ്ങി ഒരു നഗരത്തിലെ മിക്കവാറും സൗകര്യങ്ങള്‍ എല്ലാം തന്നെ ഭൂമിക്കടിയിലും ഉണ്ടെങ്കിലോ.
നൂറു വർഷം മുമ്ബ് നിർമിച്ച ഒരു ഭൂഗർഭ നഗരത്തില്‍ ഇന്നും ആളുകള്‍ താമസിക്കുന്നുണ്ട്. അങ്ങ് ഓസ്ട്രേലിയയില്‍. സൗത്ത് ഓസ്ട്രേലിയയില്‍ നിന്നും ഏകദേശം 850 കിലോമീറ്റർ ദൂരത്തായി സ്ഥിതിചെയ്യുന്ന കൂബർ പെഡി എന്ന ഭൂഗർഭ നഗരത്തെ വിശേഷിപ്പിക്കുന്നത് ലോകത്തിന്റെ ഓപല്‍ തലസ്ഥാനം എന്നാണ്. ഓപല്‍ രത്നം ഖനനം ചെയ്യുന്ന ഇടമായതിനാലാണ് ഇവിടം അങ്ങനെ അറിയപ്പെടുന്നത്. പല ഭൂഗർഭ നഗരങ്ങളെക്കുറിച്ചും നമ്മള്‍ കേട്ടിട്ടുണ്ട്. എന്നാല്‍ ഭൂമിക്കടിയില്‍ നൂറ്റാണ്ടുകള്‍ക്കിപ്പുറം ആളുകള്‍ താമസിക്കാൻ ഉപയോഗിക്കുന്ന ഒരു നഗരമാണിത്. വീടുകള്‍ മാത്രമല്ല എയർ ബിഎൻപി അടക്കമുള്ള ലോകോത്തര ഹോട്ടല്‍ ശൃംഖലകള്‍ വാടകയ്ക്ക് കൊടുക്കുന്ന താമസസ്ഥലങ്ങള്‍ വരെ ഭൂമിക്കടിയിലുള്ള ഈ നഗരത്തിലുണ്ട്.
ആലിസ് സ്പ്രിംഗ്സിനും അഡ്‌ലെയ്ഡിനും ഇടയിലുള്ള മരുഭൂമിക്കടിയിലാണ് ഈ ഭൂഗർഭ നഗരം സ്ഥിതി ചെയ്യുന്നത്. നൂറ്റാണ്ടുകള്‍ക്കു മുമ്ബ് ആദിവാസികളായിരുന്നു ഇവിടെ താമസിച്ചിരുന്നത്. പിന്നീട് ഓപല്‍ രത്നം കണ്ടെത്തിയതിനെത്തുടർന്ന് ഖനനം ആരംഭിച്ചതോടുകൂടി തൊഴിലാളികള്‍ ഇവിടേക്ക് താമസം മാറി. എന്നാല്‍ മരുഭൂമിയിലെ കടുത്ത ചൂട് സഹിക്കാനാവാതെയാണ് തൊഴിലാളികള്‍ താമസം ഭൂമിക്കടിയിലേക്ക് മാറ്റാൻ തീരുമാനിച്ചത്. അങ്ങനെ ഭൂഗർഭ നഗരമായ കൂബർ പെഡി രൂപംകൊണ്ടു. കൂബർ പെഡിയില്‍ താമസിക്കുന്ന ഭൂരിഭാഗം ആളുകളും മണ്ണിനടിയിലാണ് താമസിക്കുന്നത്. കൂബർ പെഡി 1915 ലാണ് സ്ഥാപിതമായതെങ്കിലും 1980 കളില്‍ മാത്രമാണ് ഈ നഗരം ലോകമെമ്ബാടും അറിയപ്പെടാൻ തുടങ്ങിയത്. 1981-ല്‍ ഇവിടുത്തെ ഒരു നാട്ടുകാരൻ പട്ടണത്തിലെ ആദ്യത്തെ ഹോട്ടല്‍ നിർമ്മിച്ചു. ഇന്ന്, അന്തർദ്ദേശീയ വിനോദസഞ്ചാരികള്‍ കൂബർ പെഡിയിലേക്ക് ഒഴുകിയെത്തുന്നു. ഡെസേർട്ട് കേവ് ഹോട്ടലിലോ മറ്റ് നിരവധി പ്രാദേശിക ഇന്നുകളിലോ സ്വകാര്യ ഭൂഗർഭ വീടുകളിലോ താമസിക്കാൻ തിരഞ്ഞെടുക്കുന്നു.
മറ്റെന്തിനെക്കാളും വിനോദ സഞ്ചാരികളെ ആകർഷിക്കുന്നത് ഇരുണ്ടതും തണുത്തതും വിശാലമായതുമായ മുറികളില്‍ മണ്ണിനടിയില്‍ ഉറങ്ങാനുള്ള സവിശേഷ അവസരമാണ്. ഇന്റീരിയറുകള്‍ പാറയുടെ ചുവപ്പ് നിറങ്ങള്‍ പ്രതിഫലിപ്പിക്കുന്ന തരത്തില്‍ രൂപകല്‍പ്പന ചെയ്ത കൂബർ പെഡിയുടെ ഭൂഗർഭ താമസസൗകര്യങ്ങള്‍ ഒരിക്കലും നിരാശപ്പെടുത്തില്ല. ഈ വീടുകളില്‍ സംഭരണ സ്ഥലങ്ങള്‍, വാക്ക്-ഇൻ-ക്ലോസറ്റുകള്‍, കിടപ്പുമുറികള്‍, സുഖപ്രദമായ അടുക്കളകള്‍ എന്നിവയുണ്ട്. ഭൂഗർഭ ഷോപ്പുകള്‍, ബാറുകള്‍, മ്യൂസിയങ്ങള്‍ എന്നിവയും ഈ നഗരത്തിലുണ്ട്. കൂബർ പെഡിയില്‍ 2 ഭൂഗർഭ പള്ളികളുണ്ട്. അവ മനോഹരമായ ഒരു കാഴ്ചയാണ്. പള്ളിയുടെ ഇന്റീരിയറുകള്‍ ആരേയും വിസ്മയിപ്പിക്കും, അവ ഒരു ശില്‍പ സൗന്ദര്യമാണ് എന്ന് പറയാതെ വയ്യ. കൂബർ പെഡിയില്‍ 1500 കുടുംബങ്ങള്‍ക്ക് താമസിക്കാനുള്ള വീടുകളുണ്ട്. ഈ വിശാലമായ, സ്വയം രൂപകല്‍പ്പന ചെയ്ത, സ്വപ്ന ഭവനങ്ങള്‍ എൻജിനീറിങ്ങിന്റെ അദ്ഭുതങ്ങളില്‍ ഒന്നാണ്. നഗരത്തിനു മുകളിലെ മരുഭൂമി ഗോള്‍ഫ് കോഴ്സ് ആയിട്ടും ഉപയോഗിക്കുന്നു. മാഡ് മാക്സ് അടക്കമുള്ള പ്രശസ്ത ഹോളിവുഡ് സിനിമകളുടെ ലൊക്കേഷനും ആയിരുന്നു ഇവിടം.
ഒരു അഭിപ്രായം പോസ്റ്റ് ചെയ്യൂ