തിരുവനന്തപുരം
ബാദ്ധ്യത സർക്കാർ ഏറ്റെടുക്കില്ലെന്ന് അറിയിച്ചതോടെ, ജീവനക്കാരും പെൻഷൻകാരും ഉള്‍പ്പെടെ ഗുണഭോക്താക്കളുള്ള മെഡിസെപ്പിന്റെ ഭാവി ആശങ്കയില്‍.
ഓറിയന്റല്‍ ഇൻഷ്വറൻസ് കമ്ബനിയുമായുള്ള കരാർ അവസാനിക്കാൻ ഇനി 9 മാസം മാത്രം.
സർക്കാർ ജീവനക്കാരില്‍ നിന്നും പെൻഷൻകാരില്‍ നിന്നുമായി ആദ്യരണ്ടു വർഷവും 600 കോടി വീതം ലഭിച്ചിരുന്നു. എന്നാല്‍, 700 കോടിയോളം ക്ലെയിം നല്‍കേണ്ടിവന്നതിനാല്‍ കരാർ തുക വർദ്ധിപ്പിക്കാതെ തുടരാനില്ലെന്നാണ് കമ്ബനിയുടെ നിലപാട്. ടെണ്ടർ നടപടി ആരംഭിച്ചിട്ടില്ല. അതേസമയം, റീഇംബേഴ്സ്മെന്റിലേക്ക് മടങ്ങുന്നതിനെ കുറിച്ച്‌ സർക്കാർ ആലോചിക്കുന്നതായി സൂചനയുണ്ട്. തീരുമാനത്തിലേക്ക് എത്തിയിട്ടില്ല.
145 സർക്കാർ ആശുപത്രികളും 408 സ്വകാര്യ ആശുപത്രികളുമാണ് മെഡിസെപ് ലിസ്റ്റിലുള്ളത്. മികച്ച സ്വകാര്യ ആശുപത്രികള്‍ ലിസ്റ്റില്‍ ഇല്ല, അംഗീകാരമുള്ള പല ആശുപത്രകളിലും ചികിത്സാ സംവിധാനങ്ങളില്‍ പോരായ്മ, ക്ലെയിം പൂർണമായി ലഭിക്കുന്നില്ല എന്നീ പരാതിയും വ്യാപകം. ഗുണഭോക്താക്കളും ഇൻഷ്വറൻസ് കമ്ബനിയും ഒരേസമയം പരാതികള്‍ ഉന്നയിക്കുന്ന സാഹചര്യത്തിലാണ് റീ-ഇംബേഴ്‌സ്‌മെന്റിലേക്കു മടങ്ങാൻ സർക്കാർ ആലോചിക്കുന്നത്.
ബില്‍തുക പെരുപ്പിച്ച്‌ സ്വകാര്യ ആശുപത്രികള്‍ കൊള്ള ലാഭമുണ്ടാക്കുന്നെന്ന ആക്ഷേപവും വ്യാപകമാണ്. മെഡിസെപ് പുതുക്കാനുള്ള ടെൻഡർ നടപടികളിലേക്ക് ധനവകുപ്പ് കടക്കാത്തതും ഇക്കാരണങ്ങളാലാണ്.
450 കോടി രൂപയാണ് ഇൻഷ്വറൻസ് കമ്ബനി പ്രതീക്ഷിച്ച ക്ലെയിം. എന്നാൽ 600-700 കോടിയോളം രൂപയാണ് ഓരോ വർഷവും കൊടുക്കേണ്ടിവരുന്നത്. നിലവിലെ പ്രീമിയം 500 രൂപയാണ്. 700 രൂപയാണ് ഇൻഷ്വറൻസ് കമ്ബനി ആവശ്യപ്പെടുന്ന പ്രീമിയം. 5.52 ലക്ഷം സർക്കാർ ജീവനക്കാരും 5.87 ലക്ഷം പെൻഷൻകാരുമാണ് പദ്ധതിയിലുള്ളത്. 1,485 കോടി രൂപയാണ് ഇതുവരെ ക്ലെയിം നല്‍കിയ തുക. മെഡിസെപിൻ്റെ കീഴിലുള്ള ആശുപത്രികള്‍ 553 എണ്ണമാണ്. സർക്കാർ മേഖലയില്‍-145 ഉം സ്വകാര്യ മേഖലയില്‍ 408 ഉം.
പദ്ധതിയിലെ പാളിച്ചകള്‍
ചികിത്സയ്ക്കു ചെലവാകുന്ന പണം മുഴുവൻ ഇൻഷ്വറൻസ് കമ്ബനി ആശുപത്രികള്‍ക്കു നല്‍കുന്നില്ല
രോഗി സ്വന്തമായി ബാക്കി പണം നല്‍കേണ്ടി വരുന്നു
ചികിത്സയ്ക്ക് കമ്ബനി നിശ്ചയിച്ച നിരക്ക് കുറവായതിനാല്‍ ചേരാൻ ആശുപത്രികള്‍ക്ക് താത്പര്യമില്ല.
ഒരു അഭിപ്രായം പോസ്റ്റ് ചെയ്യൂ