ജോലി ഒഴിവ്/ വിദ്യാഭ്യാസം/ സീറ്റ് ഒഴിവ്/ വിവിധ അറിയിപ്പുകൾ/ ക്വട്ടേഷൻ/ ലേലം

പാരമ്പര്യേതര ട്രസ്റ്റി നിയമനം

തളിപ്പറമ്പ് ചെങ്ങളായി ശ്രീ മഹാവിഷ്ണു ക്ഷേത്രത്തിൽ നാല് പാരമ്പര്യേതര ട്രസ്റ്റിമാരുടെ ഒഴിവുകളിലേക്ക് അപേക്ഷ ക്ഷണിച്ചു. മലബാർ ദേവസ്വം ബോർഡ്, കാസർകോട് ഡിവിഷൻ നീലേശ്വരം അസി. കമ്മീഷണറുടെ ഓഫീസിൽ സെപ്റ്റംബർ 13 ന് വൈകീട്ട് അഞ്ച് മണിക്ക് മുമ്പായി അപേക്ഷ ലഭിക്കണം. അപേക്ഷാഫോം മലബാർ ദേവസ്വം ബോർഡ് വെബ്‌സൈറ്റിലോ നീലേശ്വരം അസിസ്റ്റന്റ് കമ്മീഷണറുടെ ഓഫീസിലോ തളിപ്പറമ്പ് ഇൻസ്പെക്ടറുടെ ഓഫീസിലോ എല്ലാ പ്രവൃത്തി ദിവസങ്ങളിലും സൗജന്യമായി ലഭിക്കും.

രേഖകൾ ഹാജരാക്കണം

മലബാർ ദേവസ്വം ബോർഡ് കാസർഗോഡ് ഡിവിഷനിൽ നിന്നും നിലവിൽ ധനസഹായം കൈപ്പറ്റുന്ന ആചാരസ്ഥാനികർ/കോലധാരികൾ എന്നിവർക്ക് 2023 ഏപ്രിൽ മുതലുള്ള വേതനം ലഭിക്കാനായി ക്ഷേത്രഭരണാധികാരികളുടെ സാക്ഷ്യപത്രം, മലബാർ ദേവസ്വം ബോർഡിൽ നിന്നും അനുവദിച്ച ഐഡന്റിറ്റി കാർഡിന്റെ പകർപ്പ്, ഗുണഭോക്താക്കളുടെ ബാങ്ക് പാസ് ബുക്കിന്റെ പകർപ്പ്, മൊബെൽ നമ്പർ എന്നിവ മലബാർ ദേവസ്വം ബോർഡ് നീലേശ്വരം ഡിവിഷൻ ഓഫീസിൽ സെപ്റ്റംബർ അഞ്ചിന് മുമ്പായി ഹാജരാക്കണമെന്ന് അസി.കമ്മീഷണർ അറിയിച്ചു.

കരിയർ ഏജന്റ് നിയമനം

ജില്ലയിലെ ഒരു കേന്ദ്ര അർധസർക്കാർ (എൽ ഐ സി ഓഫ് ഇന്ത്യ) സ്ഥാപനത്തിൽ കരിയർ ഏജന്റ് (സ്ത്രീകൾ മാത്രം) തസ്തികയിൽ 50 ഒഴിവുണ്ട്. യോഗ്യത എസ് എസ് എൽ സി, പ്രായപരിധി 18-65. യോഗ്യതയുള്ള ഉദ്യോഗാർഥികൾ എല്ലാ അസ്സൽ സർട്ടിഫിക്കറ്റുകളും രജിസ്ട്രേഷൻ കാർഡും സഹിതം പേര് രജിസ്റ്റർ ചെയ്ത എംപ്ലോയ്മെന്റ് എക്സ്ചേഞ്ചുകളിൽ സെപ്റ്റംബർ ഏഴ്, എട്ട്, ഒൻപത് തീയതികളിൽ ഹാജരാകണമെന്ന് ജില്ലാ എംപ്ലോയ്മെന്റ് ഓഫീസർ അറിയിച്ചു.ഫോൺ : കണ്ണൂർ 0497 2700831, തളിപ്പറമ്പ് 0460 2209400, തലശ്ശേരി 0490 2327923, മട്ടന്നൂർ 0490 2474700

ഇന്റർവ്യൂ

സർക്കാർ ഹോമിയോ ഡിസ്പെൻസറി/ആശുപത്രികളിൽ അറ്റൻഡർ, ഡിസ്പെൻസർ, നഴ്സിംഗ് അസിസ്റ്റന്റ് തസ്തികകളിൽ താൽക്കാലിക ഒഴിവുകളിലേക്ക് റാങ്ക് ലിസ്റ്റ് തയ്യാറാക്കുന്നതിന് യോഗ്യതയുള്ള ഉദ്യോഗാർഥികളിൽ നിന്ന് അപേക്ഷ ക്ഷണിച്ചു. അപേക്ഷകർ 1970 ഡിസംബർ ഒന്നിന് ശേഷം ജനനതീയതി ഉള്ളവരും സർക്കാർ ഹോമിയോ ആശുപത്രി/ഡിസ്പെൻസറി / ടി സി എം സി എ ക്ലാസ് രജിസ്ട്രേഷൻ ഉള്ള അംഗീകൃത ഹോമിയോ ഡോക്ടറുടെ കീഴിൽ മൂന്ന് വർഷത്തെ പ്രവൃത്തി പരിചയം, എസ് എസ് എൽ സി അടിസ്ഥാന യോഗ്യത എന്നിവ ഉള്ളവരുമായിരിക്കണം. ഉദ്യോഗാർഥികൾ അസ്സൽ സർട്ടിഫിക്കറ്റ് സഹിതം സിവിൽ സ്റ്റേഷനിലെ ജില്ലാ മെഡിക്കൽ ഓഫീസ് (ഹോമിയോ) എഫ് ബ്ലോക്കിൽ സെപ്റ്റംബർ അഞ്ചിന് രാവിലെ 10.30 ന് ഹാജരാവുക. ഫോൺ : 0497 2711726

എൻഡ്യൂറൻസ് ടെസ്റ്റ്

കണ്ണൂർ ജില്ലയിൽ എക്സൈസ് വകുപ്പിൽ സിവിൽ എക്സൈസ് ആഫീസർ (ട്രെയിനി-പുരുഷൻ) തസ്തികയുടെ നേരിട്ടുള്ള നിയമനത്തിന് (കാറ്റഗറി നമ്പർ 307/2023) ചുരുക്കപ്പട്ടികയിൽ ഉൾപ്പെട്ട ഉദ്യോഗാർഥികൾക്ക് സെപ്റ്റംബർ നാലിന് കോഴിക്കോട് ജില്ലയിലെ ഭട്ട് റോഡ് ജംഗ്ഷൻ (തെക്കുഭാഗം), ആയുർവേദ ഹോസ്പിറ്റലിന് സമീപം, ബീച്ച് റോഡ്, കോഴിക്കോട് റോഡിൽ എൻഡ്യൂറൻസ് ടെസ്റ്റ് നടത്തും. അറിയിപ്പ് ഉദ്യോഗാർഥികൾക്ക് പ്രൊഫൈലിലും, എസ് എം എസ് മുഖേനയും നൽകിയിട്ടുണ്ട്. പ്രൊഫൈലിൽ നിന്നും ഡൗൺലോഡ് ചെയ്ത അഡ്മിഷൻ ടിക്കറ്റും കമ്മീഷൻ നിർദേശിച്ച ഏതെങ്കിലും ഒരു തിരിച്ചറിയൽ രേഖയുമായി നേരിട്ട് ഹാജരാവുക. ഫോൺ: 0497 2700482

കമ്പ്യൂട്ടർ കോഴ്സുകൾ

കെൽട്രോണിന്റെ തളിപ്പറമ്പ് നോളജ് സെന്ററിൽ ഒരു വർഷത്തെ വിവിധ കമ്പ്യൂട്ടർ കോഴ്സുകളിലേക്ക് അപേക്ഷ ക്ഷണിച്ചു. പ്രൊഫഷണൽ ഡിപ്ലോമ ഇൻ ലോജിസ്റ്റിക്സ് ആൻഡ് സപ്ലൈ ചെയിൻ മാനേജ്മെന്റ്, പ്രൊഫഷണൽ ഡിപ്ലോമ ഇൻ ഫയർ ആൻഡ് സേഫ്റ്റി, പ്രൊഫഷണൽ ഡിപ്ലോമ ഇൻ പ്രീ സ്‌കൂൾ ടീച്ചേഴ്‌സ് ട്രെയിനിംഗ് എന്നിവയാണ് കോഴ്സുകൾ. ഫോൺ: 0460 2205474, 0460 2954252.

മണ്ണെണ്ണ സബ്സിഡി: ലൈസൻസ് പുതുക്കണം

2024 ഒക്ടോബർ ഒന്ന് മുതൽ നിലവിൽ മത്സ്യത്തൊഴിലാളികളുടെ മത്സ്യബന്ധന ലൈസൻസുള്ള യാനങ്ങൾക്ക് മാത്രമേ സബ്സിഡി മണ്ണെണ്ണ വിതരണം ചെയ്യൂ എന്ന് ഫിഷറീസ് ഡെപ്യൂട്ടി ഡയറക്ടർ, കണ്ണൂർ അറിയിച്ചു. അർഹതപ്പെട്ട മത്സ്യബന്ധന യാനങ്ങൾക്ക് മണ്ണെണ്ണ സബ്സിഡി ലഭിക്കുന്നതിന് ജില്ലയിലെ നിലവിൽ ലൈസൻസ് ഉണ്ടായിരിക്കണം. കാലാവധി കഴിഞ്ഞ ലൈസൻസ് ഉടനെ പുതുക്കണമെന്നും അറിയിച്ചു.

മെഡിക്കൽ ഓഫീസർ നിയമനം.

ജില്ലാ ആശുപത്രിയുടെ കീഴിലെ ജില്ലാ മാനസികാരോഗ്യ പദ്ധതിയിലേക്കുള്ള മെഡിക്കൽ ഓഫീസർ തസ്തികയിലേക്ക് വാക്-ഇൻ-ഇന്റർവ്യൂ സെപ്റ്റംബർ ആറിന് രാവിലെ 10 മണിക്ക് ജില്ലാ ആശുപത്രി സൂപ്രണ്ടിന്റെ ചേംബറിൽ നടക്കും. യോഗ്യത എം ബി ബി എസ് (സൈക്യാട്രിയിൽ മുൻ പരിചയം ഉള്ളവർക്ക് മുൻഗണന). ഫോൺ : 0497 2734343, ഇ-മെയിൽ : dmhpkannur@gmail.com

തൊഴിലധിഷ്ഠിത കോഴ്സുകൾ

കണ്ണൂർ ഗവ. വനിതാ ഐ ടി ഐ യിൽ ഐ എം സി നടത്തുന്ന ഹ്രസ്വകാല തൊഴിലധിഷ്ഠിത കോഴ്സുകളിലേക്ക് വിദ്യാർഥി/വിദ്യാർഥിനികളിൽ നിന്നും അപേക്ഷ ക്ഷണിച്ചു. സർട്ടിഫിക്കറ്റ് കോഴ്സ് ഇൻ ടാലി (രണ്ട് മാസം), ഡിപ്ലോമ ഇൻ ഇന്ത്യൻ ആന്റ് ഫോറിൻ അക്കൗണ്ടിംഗ് (ആറു മാസം), ഡിപ്ലോമ ഇൻ മൊബൈൽ ഫോൺ ടെക്നോളജി (നാല് മാസം), സർട്ടിഫിക്കറ്റ് കോഴ്സ് ഇൻ സി സി ടി വി (രണ്ട് മാസം), എം എസ് എക്സൽ (ഒരു മാസം), എം എസ് ഓഫീസ് (മൂന്ന് മാസം), ടോട്ടൽ സ്റ്റേഷൻ (രണ്ട് മാസം), ഡിപ്ലോമ ഇൻ ഡിജിറ്റൽ ലാൻഡ് സർവേ ടെക്നോളജി (എട്ട് മാസം), ഡിപ്ലോമ ഇൻ ഇന്റീരിയൽ ഡിസൈനിംഗ് (മൂന്ന് മാസം) എന്നീ കോഴ്സുകളിലേക്കാണ് അഡ്മിഷൻ ആരംഭിച്ചിട്ടുള്ളത്. സീറ്റുകൾ പരിമിതം. ഫോൺ: 9745479354, 0497 2835987

ഡോക്ടർമാരുടെ അഡ്‌ഹോക് നിയമനം: വാക് ഇൻ ഇൻറർവ്യു

ജില്ലയിൽ ആരോഗ്യ വകുപ്പിന് കീഴിലെ സ്ഥാപനങ്ങളിൽ നിലവിലുള്ളതും വരാനിടയുള്ളതുമായ ഒഴിവുകളിൽ അഡ്ഹോക് വ്യവസ്ഥയിൽ താൽക്കാലിക എം ബി ബി എസ് ഡോക്ടർമാരെ നിയമിക്കുന്നതിന് വാക്-ഇൻ-ഇന്റർവ്യൂ നടത്തും. ജില്ലയിൽ ആരോഗ്യ വകുപ്പിന് കീഴിലുള്ള ഏത് സ്ഥാപനങ്ങളിലും ജോലി ചെയ്യുവാൻ താൽപര്യമുള്ള എം ബി ബി എസ് ഡോക്ടർമാർ വിദ്യാഭ്യാസ യോഗ്യത തെളിയിക്കുന്ന അസ്സൽ സർട്ടിഫിക്കറ്റുകളും പകർപ്പും ബയോഡാറ്റയും സഹിതം സെപ്റ്റംബർ അഞ്ചിന് രാവിലെ 10.30 മണിക്ക് മുമ്പായി ജില്ലാ മെഡിക്കൽ ഓഫീസ് (ആരോഗ്യം) കണ്ണൂരിൽ ഹാജരാകണമെന്ന് ഡി എം ഒ അറിയിച്ചു. ഫോൺ : 0497 2700709

സഹായഹസ്തം: അപേക്ഷ ക്ഷണിച്ചു

സാമ്പത്തികമായി പിന്നോക്കം നിൽക്കുന്ന വിധവകൾക്ക് സ്വയം തൊഴിൽ ചെയ്യുന്നതിനുള്ള ധനസഹായ പദ്ധതിയായ സഹായഹസ്തത്തിലേക്ക് (2024-25) ഓൺലൈനായി അപേക്ഷ ക്ഷണിച്ചു. അപേക്ഷകൾ അതാത് സ്ഥലത്തെ ഐ സി ഡി എസ് ഓഫീസിലെ ശിശുവികസന പദ്ധതി ഓഫീസർമാർക്ക് ഓൺലൈനായി ഒക്ടോബർ 15 നകം സമർപ്പിക്കണമെന്ന് ജില്ലാ വനിതാ ശിശുവികസന ഓഫീസർ അറിയിച്ചു. അപേക്ഷ സമർപ്പിക്കുന്നതിന് https://schemes.wcd.kerala.gov.in/ എന്ന വെബ്‌സൈറ്റ് സന്ദർശിക്കുക. ഫോൺ: 0497 2700708

ധനസഹായം

ജില്ലയിലെ സ്വകാര്യ ഭൂമിയിൽ വൃക്ഷത്തൈകൾ നട്ടുവളർത്തുന്നതിനുള്ള പ്രോത്സാഹന ധനസഹായം ലഭിക്കുന്നതിനുള്ള അപേക്ഷകൾ കൈവശാവകാശ രേഖ സഹിതം സെപ്റ്റംബർ 30 നകം കണ്ണൂർ കണ്ണോത്തുംചാൽ സോഷ്യൽ ഫോറസ്ട്രി ഡിവിഷൻ ഓഫീസിൽ സമർപ്പിക്കണമെന്ന് അസി. ഫോറസ്റ്റ് കൺസർവേറ്റർ അറിയിച്ചു. നിശ്ചിത മാതൃകയിലുള്ള അപേക്ഷാഫോറം വനം വകുപ്പ് വെബ്സൈറ്റിൽ നിന്നോ സോഷ്യൽ ഫോറസ്ട്രി ഡിവിഷൻ ഓഫീസിൽ നിന്നോ ലഭിക്കും. വെബ്സൈറ്റ് : www.forest.kerala.gov.in ഫോൺ : 0497 2705105

മന്ദഹാസം പദ്ധതി: അപേക്ഷ ക്ഷണിച്ചു

ബി പി എൽ വിഭാഗത്തിൽപ്പെടുന്ന മുതിർന്ന പൗരന്മാർക്ക് സൗജന്യമായി ദന്തനിരകൾ വെച്ച് നൽകുന്ന മന്ദഹാസം പദ്ധതിയിലേക്ക് ഓൺലൈനായി അപേക്ഷ ക്ഷണിച്ചു. അക്ഷയ മുഖേന സുനീതി പോർട്ടൽ വഴി ഓൺലൈനായാണ് അപേക്ഷിക്കേണ്ടത്. അപേക്ഷകർ ബി പി എൽ കുടുംബാംഗം ആയിരിക്കണം, കൃത്രിമ പല്ലുകൾ വെക്കുന്നതിന് അനുയോജ്യമെന്ന് യോഗ്യത നേടിയ ഡെൻറിസ്റ്റിന്റെ നിശ്ചിത ഫോറത്തിലുള്ള സാക്ഷ്യപത്രം ഹാജരാക്കേണ്ടതാണ്, അപേക്ഷകൾ സെപ്റ്റംബർ 12 നകം സമർപ്പിക്കേണ്ടതാണ്. ഫോൺ : 0497 2997811, 8281999015

താൽക്കാലിക ഒഴിവുകൾ

മാടായി ഐ ടി ഐ ബോയ്സ് ഹോസ്റ്റലിൽ കെയർ ടേക്കർ, നൈറ്റ് വാച്ച്മാൻ, ഫുൾ ടൈം സ്വീപ്പർ (ഓരോ ഒഴിവുകൾ) എന്നീ തസ്തികകളിൽ താൽക്കാലിക നിയമനം നടത്തുന്നതിന് പുരുഷൻമാരിൽ നിന്നും അപേക്ഷ ക്ഷണിച്ചു. യോഗ്യരായ ഉദ്യോഗാർഥികൾ സ്വയം തയ്യാറാക്കിയ അപേക്ഷ, ബയോഡാറ്റയും യോഗ്യതാ സർട്ടിഫിക്കറ്റുകളുടെ പകർപ്പും സഹിതം സെപ്റ്റംബർ രണ്ടിന് വൈകുന്നേരം അഞ്ച് മണിക്ക് മുമ്പായി പട്ടികജാതി വികസന വകുപ്പ് ഐ ടി ഐ യിൽ നേരിട്ട് സമർപ്പിക്കണം.

പ്ലസ് ടു/പ്രീ ഡിഗ്രി അല്ലെങ്കിൽ തത്തുല്യം, കേരള സംസ്ഥാന പിന്നോക്ക സാമൂഹ്യ ക്ഷേമ വകുപ്പിന്റെ അംഗീകാരമുള്ള ഏതെങ്കിലും ചൈൽഡ് കെയർ സ്ഥാപനത്തിൽ ഒരു വർഷത്തെ പ്രവൃത്തി പരിചയം, പ്രായ പരിധി 35- 55 വയസ്സ് എന്നിവയാണ് കെയർ ടേക്കർക്ക് വേണ്ട യോഗ്യത. ഏഴാം ക്ലാസ്സ് പാസ്സ്, പ്രായ പരിധി 18-55 വയസ്സ് എന്നിവയാണ് നൈറ്റ് വാച്ച്മാന് വേണ്ട യോഗ്യത.

ഏഴാം ക്ലാസ്സ് പാസ്സായിരിക്കണം (ബിരുദധാരി ആയിരിക്കരുത്), പ്രായ പരിധി 35-55 വയസ്സ് എന്നിവയാണ് ഫുൾ ടൈം സ്വീപ്പറുടെ യോഗ്യത. ഫോൺ: 0497 2877300

ക്വട്ടേഷൻ ക്ഷണിച്ചു

കണ്ണൂർ ഗവ.എഞ്ചിനീയറിംഗ് കോളേജിലെ ഇലക്ട്രോണിക്സ് ആന്റ് കമ്യൂണിക്കേഷൻ എഞ്ചിനീയറിംഗ് വകുപ്പിലെ റാക്ക് / ഷെൽഫ് വാങ്ങുന്നതിന് മുദ്രവച്ച ക്വട്ടേഷനുകൾ ക്ഷണിച്ചു. കൂടുതൽ വിവരങ്ങൾക്ക് ഗവ.എഞ്ചിനീയറിംഗ് കോളേജ് വെബ്സൈറ്റ് (www.gcek.ac.in) സന്ദർശിക്കുക. അവസാന തീയ്യതി സെപ്റ്റംബർ ഒൻപത് 12.30 വരെ. ഫോൺ : 0497 2780226.  

കമ്മ്യൂണിക്കേറ്റീവ് ഇംഗ്ലീഷ് ട്രെയിനർ കോഴ്‌സ്

അഡീഷണൽ സ്‌കിൽ അക്വിസിഷൻ പ്രോഗ്രാം (അസാപ്) നടത്തുന്ന കമ്മ്യൂണിക്കേറ്റീവ് ഇംഗ്ലീഷ് ട്രെയിനർ കോഴ്സിന്റെ ബാച്ചുകളിലേക്ക് പ്രവേശനം ആരംഭിച്ചു. 400 മണിക്കൂർ ആണ് കോഴ്‌സിന്റെ കാലാവധി. ബിരുദവും ഇംഗ്ലീഷ് ഭാഷാ പ്രാവീണ്യവുമാണ് കുറഞ്ഞ യോഗ്യത. പാലയാട് അസാപ് കമ്മ്യൂണിറ്റി സ്‌കിൽ പാർക്കിൽ കോഴ്സ് നടത്തും. വാരാന്ത്യ ബാച്ച് ആയി സെപ്റ്റംബർ 28ന് ക്ലാസുകൾ ആരംഭിക്കും. താൽപ്പര്യമുള്ളവർക്ക് താഴെ നൽകിയിട്ടുള്ള ലിങ്ക് വഴി അപേക്ഷിക്കാവുന്നതാണ്. ഫീസ് 14750 രൂപ. സ്‌കിൽ ലോൺ ലഭ്യമാണ്. താൽപ്പര്യമുള്ളവർക്ക്

https://forms.gle/5A9WVrFSWFDRpAWt7 എന്ന ലിങ്ക് വഴി അപേക്ഷിക്കാം. ഫോൺ: 9495999712, 7025347324.

ഐ ടി ഐ കോഴ്സ്

കണ്ണൂർ ഗവ.ഐ ടി ഐ യും ഐ എം സി യും സംയുക്തമായി നടത്തുന്ന വെൽഡർ ടി ഐ ജി ആന്റ് എം ഐ ജി യുടെ മൂന്ന് മാസത്തെ കോഴ്സിലേക്ക് അപേക്ഷ ക്ഷണിച്ചു. ഫോൺ : 7560865447

അപ്പാരൽ ട്രെയിനിംഗ് ആന്റ് ഡിസൈൻ സെന്റർ സ്പോട്ട് അഡ്മിഷൻ

കേന്ദ്ര ടെക്സ്റ്റൈൽ മന്ത്രാലയത്തിനു കീഴിലുള്ള അപ്പാരൽ ട്രെയിനിംഗ് ആന്റ് ഡിസൈൻ സെന്റർ തളിപ്പറമ്പ് സെന്ററിൽ മൂന്ന് വർഷം ദൈർഘ്യമുള്ള ബി-വി ഒ സി ഫാഷൻ ഡിസൈനർ ആന്റ് റീട്ടെയിൽ (ബി വിഒസി എഫ് ഡി ആർ) എന്ന ഡിഗ്രി കോഴ്സിലേക്കും ഒരു വർഷത്തെ ഫാഷൻ ഡിസൈൻ ടെക്നോളജി (എഫ് ഡി ടി) ഡിപ്ലോമ കോഴ്സിലേക്കും ഒഴിവുള്ള സീറ്റുകളിലേക്ക് സ്പോട്ട് അഡ്മിഷൻ നടക്കും. യോഗ്യത പ്ലസ് ടു. ഫോൺ : 8301030362, 9995004269

സ്പോട്ട് അഡ്മിഷൻ

കണ്ണൂർ ഗവ.എഞ്ചിനീയറിംഗ് കോളേജിലെ 2024-25 അധ്യയന വർഷത്തിലെ ബി ടെക് ലാറ്ററൽ എൻട്രി അഡ്മിഷന്റെ ഭാഗമായി സിവിൽ ഡിപ്പാർട്ട്മെന്റിൽ നിലവിലുള്ള ഒരു ഒഴിവിലേക്കും തുടർന്ന് ഉണ്ടായേക്കാവുന്ന മറ്റ് ഒഴിവുകളിലേക്കുമായി സ്പോട്ട് അഡ്മിഷൻ നടത്തത്തും താല്പര്യമുള്ള വിദ്യാർഥികൾ ടി സി, യോഗ്യത സർട്ടിഫിക്കറ്റുകൾ സഹിതം സെപ്റ്റംബർ നാലിന് ഒൻപത് മണിക്ക് കോളേജിൽ ഹാജരാകണം.

താൽക്കാലിക ഒഴിവ്

മാങ്ങാട്ടുപറമ്പ് കെ എ പി നാലാം ബറ്റാലിയനിൽ ക്യാമ്പ് ഫോളോവർ തസ്തികയിൽ നിലവിലുള്ള 57 ഒഴിവുകളിലേക്ക് താൽക്കാലികാടിസ്ഥാനത്തിൽ നിയോഗിക്കുന്നതിന് യോഗ്യരായ ഉദ്യോഗാർഥികളെ തെരഞ്ഞെടുക്കുന്നതിനുള്ള കൂടിക്കാഴ്ച സെപ്റ്റംബർ മൂന്നിന് 10.30ന് നടത്തും. ഒഴിവുകൾ: കുക്ക് (23 എണ്ണം), ധോബി (14), സ്വീപ്പർ (ഏഴ്), ബാർബർ (എട്ട്), വാട്ടർ ക്യാരിയർ (അഞ്ച്). മുൻ പരിചയം ഉള്ളവർ അന്നേ ദിവസം മാങ്ങാട്ടുപറമ്പ് കെ എ പി നാലാം ബറ്റാലിയൻ ആസ്ഥാനത്ത് ആധാർ കാർഡിന്റെ പകർപ്പുമായി എത്തിച്ചേരേണം.

ലേലം

ആർ ആർ നിയമ പ്രകാരം ജപ്തി ചെയ്ത പഴശ്ശി അംശം മട്ടന്നൂർ ദേശത്ത് റീ സർവ്വെ 104/102 ൽ പ്പെട്ടതുമായ 0.0040 ഹെക്ടർ ഭൂമിയും അതിൽ ഉൾപ്പെട്ട സകലതും സെപ്റ്റംബർ 13 ന് രാവിലെ 11.30 ന് പഴശ്ശി വില്ലേജ് ഓഫീസിൽ പരസ്യമായി ലേലം ചെയ്യും. ഫോൺ : 0490 2494910

ലേലം

കോടതി കുടിശ്ശിക ഈടാക്കുന്നതിനായി തലശ്ശേരി താലൂക്ക് കോട്ടയം അംശം കിണവക്കൽ ദേശത്ത് റി.സ. 73/3എ യിൽപ്പെട്ട 0.0496 ഹെക്ടർ വിസ്തൃതിയിലുള്ള വസ്തുവും, അതിലുൾപ്പെട്ട സകല ഉഭയ ചമയങ്ങളും ഒക്ടോബർ എട്ടിന് 11 മണിക്ക് കോട്ടയം വില്ലേജ് ഓഫീസിൽ പരസ്യമായി ലേലം ചെയ്യും. ഫോൺ : 0490 2322090

ലേലം

ആർ ആർ നിയമ പ്രകാരം ജപ്തി ചെയ്ത വിളമന അംശം ദേശത്ത് റീ സർവ്വെ 424/2 ൽ പ്പെട്ടതുമായ 0.0260 ഹെക്ടർ ഭൂമിയും അതിൽ ഉൾപ്പെട്ട സകലതും സെപ്റ്റംബർ 12 ന് രാവിലെ 11.30 ന് വിളമന വില്ലേജ് ഓഫീസിൽ പരസ്യമായി ലേലം ചെയ്യും. ഫോൺ : 0490 2494910

കിറ്റ്സിൽ എം ബി എ

സംസ്ഥാന ടൂറിസം വകുപ്പിന്റെ കീഴിലുള്ള കിറ്റ്സിൽ എം ബി എ (ട്രാവൽ ആന്റ് ടൂറിസം) കോഴ്സിൽ ഒഴിവുള്ള സീറ്റിലേക്ക് സെപ്റ്റംബർ നാല്, അഞ്ച് തീയതികളിൾ സ്പോട്ട് അഡ്മിഷൻ നടത്തും.അംഗീകൃത സർവ്വകലാശാലയിൽ നിന്നും ഏതെങ്കിലും വിഷയത്തിൽ 50 ശതമാനം മാർക്കോടു കൂടിയ ഡിഗ്രി ഉള്ളവർക്ക് അഡ്മിഷനിൽ പങ്കെടുക്കാം. കൂടുതൽ വിവരങ്ങൾക്ക് www.kittsedu.orgഫോൺ : 9446529467, 9447079763, 0471 2327707, 0471 2329468

ഭിന്നശേഷി അവാർഡ്: നാമനിർദേശം 12 വരെ നൽകാം

ഭിന്നശേഷിയുമായി ബന്ധപ്പെട്ട് വിവിധ മേഖലകളിൽ നൈപുണ്യം തെളിയിച്ച വ്യക്തികൾ , സ്ഥാപനങ്ങൾ, തദ്ദേശ സ്വയംഭരണ സ്ഥാപനങ്ങൾ എന്നിവയ്ക്കായി സാമൂഹ്യനീതി വകുപ്പ് ഏർപ്പെടുത്തിയ സംസ്ഥാന ഭിന്നശേഷി അവാർഡ് 2024 നുള്ള നാമനിർദേശം ലഭ്യമാക്കേണ്ട അവസാന തീയതി സെപ്റ്റംബർ 12 ലേക്ക് നീട്ടി. ഫോൺ : 0471 2306040