കാല്‍മുട്ട് ചികിത്സയ്ക്കെത്തിയ 63 -കാരന്‍റെ ഇടുപ്പിന്‍റെ എക്സ്-റേ പരിശോധിച്ച ഡോക്ടര്‍മാര്‍ അക്ഷരാര്‍ത്ഥത്തില്‍ ഞെട്ടി.
അദ്ദേഹത്തിന് അപൂര്‍വ്വങ്ങളില്‍ അപൂര്‍വ്വമായ ജനനേന്ദ്രിയ അസ്ഥിയായി രൂപം മാറുന്ന അസാധാരണമായ രോഗമായ 'പെനൈല്‍ ഓസിഫിക്കേഷൻ' (Penile Ossification) ആയിരുന്നു ഡോക്ടര്‍മാര്‍ സ്ഥിരീകരിച്ചത്. 2019-ല്‍ നടപ്പാതയില്‍ വീണ് കാല്‍മുട്ടിന് അസ്വസ്ഥത അനുഭവപ്പെട്ടതിനെ തുടർന്നാണ് പേര് വെളിപ്പെടുത്താത്ത 63 -കാരനായ രോഗി ന്യൂയോർക്ക് സിറ്റി ഹോസ്പിറ്റലിലെത്തിയത്. വീഴ്ചയില്‍ ബോധക്ഷയമോ തലയ്ക്ക് പരിക്കുകളോ ഒന്നും സംഭവിച്ചിരുന്നില്ല. എങ്കിലും ഭാവിയില്‍ കാല്‍ മുട്ടുവേദനയ്ക്ക് കാരണമായേക്കാവുന്ന ഒടിവോ മറ്റ് പ്രശ്‌നങ്ങളോ ഒഴിവാക്കാനായി ഡോക്ടർമാർ ഇടുപ്പിന്‍റെ എക്സ് റേ എടുക്കാന്‍ പറഞ്ഞപ്പോഴാണ് ഈ അസാധരണ രോഗം സ്ഥിരീകരിച്ചതെന്ന് ലാഡ്ബൈബിളില്‍ റിപ്പോര്‍ട്ട് ചെയ്യുന്നു.
എക്സ്-റേ സ്കാനില്‍ ജനനേന്ദ്രിയം മൃദുവായ ടിഷ്യൂകളില്‍ ഗുരുതരമായ കാല്‍സിഫിക്കേഷൻ സംഭവിച്ചതായി ഡോക്ടര്‍മാര്‍ കണ്ടെത്തി. "എക്സ്ട്രാസ്കെലെറ്റല്‍ ബോണ്‍" (Extraskeletal Bone) എന്നാണ് ഈ പ്രതിഭാസം വൈദ്യശാസ്ത്ര മേഖലയില്‍ അറിയപ്പെടുന്നത്. കാല്‍സ്യം ലവണങ്ങള്‍ ജനനേന്ദ്രിയത്തില്‍ ഒരു ഫലകത്തോട് സാമ്യമുള്ള രീതിയില്‍ നിക്ഷേപിക്കപ്പെടുന്ന അസ്ഥയാണിത്. അത്തരം സന്ദർഭങ്ങള്‍ അത്യപൂര്‍വ്വമാണ്. യൂറോളജി കേസ് റിപ്പോർട്ട് പ്രകാരം ഇത്തരത്തിലുള്ള വെറും 40 ല്‍ താഴെ കേസുകള്‍ മാത്രമാണ് ഇതുവരെ ലോകത്ത് റിപ്പോര്‍ട്ട് ചെയ്യപ്പെട്ടിട്ടുള്ളത്.
പെനൈല്‍ ഓസിഫിക്കേഷൻ എന്നത് ജനനേന്ദ്രിയം പാത്തോഫിസിയോളജിക്ക് കാരണമായി മാറുന്ന ഒരു രോഗമാണ്. ഈ അവസ്ഥയില്‍ അസ്ഥി പോലുള്ള ടിഷ്യു ജനനേന്ദ്രിയത്തില്‍ രൂപപ്പെടുന്നു. ട്രോമ, പ്രമേഹം, അവസാനഘട്ട വൃക്കസംബന്ധമായ രോഗം തുടങ്ങിയ തുടങ്ങിയ മറ്റ് പല രോഗങ്ങളുമായി ഈ രോഗാവസ്ഥ ബന്ധപ്പെട്ടിരിക്കുന്നുവെന്ന് സയന്‍സ് റിപ്പോര്‍ട്ടുകള്‍ പറയുന്നു. എന്നാല്‍ രോഗ നിര്‍ണ്ണയത്തിന് ശേഷം ഇയാള്‍ ഡോക്ടര്‍മാരുടെ നിര്‍ദ്ദേശത്തിന് വിരുദ്ധമായി ആശുപത്രിയില്‍ നിന്നും നിര്‍ബന്ധ ഡിസ്ചാര്‍ജ്ജ് വാങ്ങിപ്പോയെന്നും റിപ്പോര്‍ട്ടുകള്‍ പറയുന്നു. അതേസമയം ഈ രോഗത്തിന് കുത്തിവെയ്പ്പുകളും ശസ്ത്രക്രിയകളുമാണ് പരിഹാരമെന്ന് മെഡിക്കല്‍ ജേണലുകള്‍ റിപ്പോര്‍ട്ട് ചെയ്യുന്നു.
ഒരു അഭിപ്രായം പോസ്റ്റ് ചെയ്യൂ