കൊല്‍ക്കത്ത: ആർ.ജി. കർ മെഡിക്കല്‍ കോളേജില്‍ വനിതാ ഡോക്ടറെ ബലാത്സംഗം ചെയ്ത് കൊലപ്പെടുത്തിയ സഞ്ജയ് റോയിയെ തൂക്കിക്കൊല്ലണമെന്ന് രണ്ടാം ഭാര്യയുടെ അമ്മ.
തന്റെ മകളെ സഞ്ജയ് മർദ്ദിക്കാറുണ്ടായിരുന്നെന്നും ദുർഗാദേവി വാർത്താ ഏജൻസിയായ എഎൻഐയോട് പറഞ്ഞു. ഗർഭിണിയായിരിക്കെ തന്റെ മകളെ ഇയാള്‍ മർദ്ദിച്ചതോടെ ഗർഭഛിദ്രമുണ്ടായെന്നും ദുർഗാദേവി വെളിപ്പെടുത്തി.
തന്റെ മകളുമായി സഞ്ജയുടെ രണ്ടാംവിവാഹമായിരുന്നുവെന്നാണ് ദുർഗാദേവി വെളിപ്പെടുത്തിയത്. രണ്ട് വർഷം ഇരുവരും ഒന്നിച്ച്‌ ജീവിച്ചു. തുടക്കത്തിലെ ആറുമാസം കുഴപ്പമില്ലായിന്നുവെങ്കിലും പിന്നീട് മർദിക്കാൻ തുടങ്ങി. മൂന്ന് മാസം ഗർഭിണിയായിരുന്ന മകളെ മർദിച്ചതോടെ മകള്‍ക്ക് ഗർഭച്ഛിദ്രമുണ്ടായി. ഇതോടെ അവളുടെ ആരോഗ്യസ്ഥിതി മോശമാകുകയായിരുന്നു. തുടർന്ന് മകളുടെ ചികിത്സാച്ചിലവുകളെല്ലാം താൻ തന്നെയാണ് വഹിച്ചതെന്നും ദുർഗാദേവി വെളിപ്പെടുത്തി.
അവന് ഒറ്റയ്ക്ക് ഇത് ചെയ്യാൻ കഴിയുമെന്ന് കരുതുന്നില്ലെന്നും ദുർഗാദേവി പറഞ്ഞു. സഞ്ജയ് റോയ് ഒന്നിലധികം വിവാഹം കഴിച്ചിരുന്നതായി നേരത്തെ റിപ്പോർട്ടുകളുണ്ടായിരുന്നു. അറസ്റ്റിലായ പ്രതിയുടെ മൊബൈല്‍ഫോണില്‍നിന്ന് നിരവധി അശ്ലീലവീഡിയോകളും പോലീസ് കണ്ടെടുത്തിരുന്നു.
ഒരു അഭിപ്രായം പോസ്റ്റ് ചെയ്യൂ