ആഗോള കത്തോലിക്ക സഭയില്‍ പല ഉപവിഭാഗങ്ങളും സ്വതന്ത്രസഭകളുമുണ്ട്. അതിലൊന്നാണ് കേരളം ആസ്ഥാനമായ സീറോ മലബാർ സഭ. കേരളത്തില്‍ ആകെയുള്ള 61.6 ലക്ഷം ക്രൈസ്തവരില്‍ 23.5 ലക്ഷം, അതായതു 38 ശതമാനത്തോളംപേർ സീറോ മലബാർ സഭക്കാരാണ്.
സഭയെ നയപരമായി നയിക്കുന്ന വേദിയാണ് സഭാ നിയമപ്രകാരം അഞ്ചുവർഷത്തിലൊരിക്കല്‍ ചേരേണ്ട 'മേജർ ആർക്കി എപ്പിസ്കോപ്പല്‍ അസംബ്ലി'. 2016ലാണ് അവസാന അസംബ്ലി നടന്നത്. എറണാകുളം-അങ്കമാലി അതിരൂപതയിലെ എങ്ങോട്ടു തിരിഞ്ഞു കുർബാനചൊല്ലണമെന്ന വിവാദം കാരണമാണ് അഞ്ചുവർഷത്തിനു പകരം എട്ടാംവർഷം മേജർ ആർക്കി എപ്പിസ്കോപ്പല്‍ അസംബ്ലിയുടെ അഞ്ചാം സമ്മേളനം ആഗസ്റ്റ് 23ന് പാലായില്‍ തുടങ്ങിയത്.
സഭക്കും കൂടി അവകാശപ്പെട്ടതെന്നു കരുതുന്ന കേരള കോണ്‍ഗ്രസുകളെ പ്രതിനിധീകരിക്കുന്ന രണ്ട് എം.പിമാർ ഇന്ത്യൻ പാർലമെന്‍റിലുണ്ട്. ജോസ് കെ. മാണിയും ഫ്രാൻസിസ് ജോർജും. വിവിധ കേര ളകോണ്‍ഗ്രസുകളില്‍ നിന്നു നാലു എം.എല്‍.എമാർ നിയമസഭയിലുണ്ട്. അതിലൊന്ന് മന്ത്രി റോഷി അഗസ്റ്റ്യനാണ്. കോണ്‍ഗ്രസില്‍ നോക്കിയാല്‍ വേറെയുമുണ്ട് സഭാമക്കള്‍ കൂടിയായ എം.എല്‍.എമാർ. എന്നാല്‍, അവരെയൊക്കെ മറികടന്നു ഉദ്ഘാടന സമ്മേളന വേദിയിലെത്താൻ ഭാഗ്യംകിട്ടിയ ഏക അല്‍മായൻ (വൈദികനല്ലാത്ത സഭാവിശ്വാസി) കേന്ദ്ര മന്ത്രി ജോർജ് കുര്യനാണ്. നാല്‍പതുവർഷമായി ആർ.എസ്.എസിന്‍റെ കറതീർന്ന പ്രവർത്തകനും സംഘപരിവാറിനായി ജീവിതം മാറ്റിവെച്ചതിന്‍റെ അംഗീകാരമായി എം.പി അല്ലാതിരുന്നിട്ടും കേന്ദ്രമന്ത്രി സ്ഥാനം കിട്ടിയ അതേ ജോർജുകുര്യൻ.
സീറോമലബാർ സഭയുടെ രാഷ്ടീയ വിഭാഗമെന്ന് അറിയപ്പെടുന്ന കേരള കോണ്‍ഗ്രസുകളുടെ നേതാക്കളെ ഒഴിവാക്കി കടുത്ത ആർ.എസ്.എസ് പ്രവർത്തകനെ സമ്മേളനത്തില്‍ പങ്കെടുപ്പിച്ചതു സഭക്കുള്ളില്‍തന്നെ കടുത്ത എതിർപ്പിനു കാരണമായിട്ടുണ്ട്. റബറിനു 300 രൂപ നല്‍കിയാല്‍ കേരളത്തില്‍ നിന്നു ബി.ജെ.പിക്ക് എം.പിയെ നല്‍കാം എന്ന വിവാദ വാഗ്ദാനം നല്‍കിയ തലശേരി ആർച്ചു ബിഷപ്പും സിനഡ് സെക്രട്ടറിയുമായ മാർ ജോസഫ് പാംപ്ലാനിയുടെ നിർബന്ധത്തെ തുടർന്നാണ് ജോർജു കുര്യനു പ്രമുഖസ്ഥാനം നല്‍കിയതെന്ന് അല്‍മായ നേതാക്കള്‍ പറയുന്നു.
വിവാദകാരണം മധ്യപ്രദേശിലെ വികാരി ജനറാളിന്‍റെ അറസ്റ്റും
ജോർജ് കുര്യൻ ഡല്‍ഹി കേന്ദ്രമായി പ്രവർത്തിച്ചിരുന്നപ്പോള്‍ ചുമതലയുണ്ടായിരുന്ന സംസ്ഥാനമാണ് മധ്യപ്രദേശ്. ഇവിടം ഭരിക്കുന്നതു ബി.ജെ.പി സർക്കാറാണ്. മധ്യപ്രദേശിലെ മിക്ക നഗരങ്ങളിലെയും കോളജുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ നടത്തുന്നതു ക്രൈസ്തവ സഭകളാണ്. ഇത്തരം സ്ഥാപനങ്ങളെ പൂട്ടിക്കാനായി സംഘപരിവാർ നേതൃത്വത്തില്‍ വിദ്യാലയങ്ങള്‍ ആരംഭിച്ചെങ്കിലും കത്തോലിക്കാ സഭയുടെ മേധാവിത്വം തകർക്കാനായില്ല. മാത്രമല്ല, മികച്ച നിലവാരം പുലർത്തിയ സഭയുടെ വിദ്യാലയങ്ങളിലേക്ക് ബി.ജെ.പി പ്രവർത്തകർ പോലും കുട്ടികളെ ചേർക്കുന്ന അവസ്ഥയുണ്ടായി. ഈ അവസ്ഥ നേരിടാൻ ബി.ജെ.പി സർക്കാർ സഭയുടെ വിദ്യാഭ്യാസ സ്ഥാപനങ്ങളെ വിവിധ നിയമകുരുക്കുകളില്‍ പെടുത്താനാരംഭിച്ചു. ഇതിന്‍റെ ഭവിഷ്യത്ത് എറ്റവും കൂടുതല്‍ അനുഭവിക്കേണ്ടിവന്നതു ജബല്‍പൂർ രൂപതയിലെ വികാരി ജനറാളും 'പാലാക്കാരൻ' എന്ന വിളിപ്പേരില്‍ അറിയപ്പെടുന്ന കാഞ്ഞിരപ്പള്ളി രൂപതാംഗമായ ഫാദർ അബ്രഹാം താഴത്തേടത്താണ്.
കത്തോലിക്കാ സഭയെ സംബന്ധിച്ച്‌ സ്വയംഭരണാവകാശമുള്ള സാമ്രാജ്യങ്ങളാണ് രൂപതകള്‍. കാനോൻ നിയമവും ആലോചനാ യോഗങ്ങളും എടുത്തു കാട്ടാമെങ്കിലും അധികാരവും തീരുമാനങ്ങളും പൂർണമായും മെത്രാനു സ്വന്തമാണ്. മെത്രാൻ കഴിഞ്ഞാല്‍ രൂപതയിലെ ഏറ്റവും വലിയ അധികാര കേന്ദ്രമാണ് വികാരി ജനറാള്‍. ജബല്‍പൂർ രൂപതയിലെ വികാരി ജനറാള്‍ എന്ന നിലയില്‍ അവിടുത്തെ വിദ്യാഭ്യാസ സ്ഥാപനങ്ങള്‍ നടത്തുന്ന ട്രസ്റ്റിന്‍റെ വൈസ് ചെയർമാൻ കൂടിയാണ് ഫാദർ അബ്രഹാം താഴത്തേടത്ത്. ജബല്‍പൂരിലെ പ്രശസ്തമായ സെന്‍റ് അലോഷ്യസ് സീനിയർ സെക്കണ്ടറി സ്കൂള്‍ അടക്കമുള്ളവ ഈ ട്രസ്റ്റിനു കീഴിലാണ്. സ്കൂള്‍ നടത്തിപ്പുമായി നേരിട്ടു ബന്ധമില്ലാതിരുന്നിട്ടും 2024 മെയ് 27ന് ഫാദർ അബ്രഹാം താഴത്തേടത്തിനെ മധ്യപ്രദേശിലെ ബി.ജെ.പി സർക്കാർ അറസ്റ്റുചെയ്തു ജബല്‍പൂർ ജയിലില്‍ അടച്ചു. പാഠപുസ്തകങ്ങള്‍ വിറ്റതിലും സ്കൂള്‍ ഫീസ് വാങ്ങിയതിലും അപാകതയുണ്ടെന്ന് ആരോപിച്ചായിരുന്നു അറസ്റ്റ്.
ഫാദർ അബ്രഹാം താഴത്തേടത്തിന്‍റെ കുടുംബാംഗങ്ങളില്‍ നിന്നും വിവരമറിഞ്ഞ ജോസ് കെ. മാണി എം.പി 2024 ജൂലൈ ഒന്നിനു കേന്ദ്ര ആഭ്യന്തരമന്ത്രി അമിത് ഷാ, കേരളത്തില്‍ നിന്നുള്ള കേന്ദ്രമന്ത്രിമാരായ ജോർജ് കുര്യൻ, സുരേഷ് ഗോപി എന്നിവരെ നേരിട്ടു കണ്ടു ഫാദർ അബ്രഹാം താഴത്തേടത്തിന്‍റെ മോചനത്തിനായി ഇടപെടണമെന്ന് അഭ്യർഥിച്ചു. അനുകൂല മറുപടി കിട്ടാതായതോടെ പ്രശ്നം പാർലമെന്‍റിലും ഉന്നയിച്ചു. തുടർന്നു, ബി.ജെ.പി കോട്ടയം ജില്ല നേതൃത്വം പ്രശ്നത്തില്‍ ഇടപെട്ടു. 2024 ജലൈ 20നു ജോർജ് കുര്യനു മോചനം സംബന്ധിച്ച്‌ കത്തുനല്‍കി. ഒരു നടപടിയുമുണ്ടായില്ല. രാഷ്ട്രീയ ഇടപെടല്‍ ഫലംകാണാതെ വന്നതോടെ ഫാദർ അബ്രഹാം താഴത്തേടത്തിന്‍റെ ബന്ധുക്കള്‍ സുപ്രീംകോടതിയെ സമീപിച്ചു. (ക്രിമിനല്‍ അപ്പീല്‍ നമ്ബർ 9625/2024) കേസ് പരിഗണിച്ച ജസ്റ്റീസ് ബി.വി. നാഗരത്ന, ജസ്റ്റീസ് എൻ. കോട്ടീശ്വർ സിങ് എന്നിവരടങ്ങിയ ഡിവിഷൻബഞ്ച് ഫാദർ അബ്രഹാം താഴത്തേടത്തിനു ജാമ്യം നല്‍കി. ഉന്നത വിദ്യാഭ്യാസ സ്ഥാപനം നടത്തുന്ന വൈദികനെ നിസാര കാരണത്തിനു 85 ദിവസം ജയിലിലടച്ച സർക്കാറിനെ വിമർശിച്ചുകൊണ്ടാണ് ജാമ്യം അനുവദിച്ചതു.
ന്യായമായ കാര്യത്തിനുപോലും സഭക്കൊപ്പം നില്‍ക്കാതിരിക്കുകയും അധികാരമുണ്ടായിട്ടും വികാരി ജനറാള്‍ പദവിയിലുള്ള ഒരു വൈദികന്‍റെ മോചനത്തിനു പരിശ്രമിക്കാതിരിക്കുകയും ചെയ്ത ഒരാളെ 'സീറോമലബാർ സഭാംഗമായ കേന്ദ്രമന്ത്രി' എന്ന വിശേഷണത്തിന്‍റെ മാത്രം അടിസ്ഥാനത്തില്‍ മേജർ ആർക്കി എപ്പിസ്കോപ്പല്‍ അസംബ്ലിയില്‍ സുപ്രധാന പരിഗണന നല്‍കിയതാണ് സഭാംഗങ്ങളെ ചൊടിപ്പിച്ചിരിക്കുന്നത്. സീറോ മലബാർ സഭയിലെ അമ്ബതോളം മെത്രാൻമാർക്കും 100 ല്‍ ഏറെ വികാരി ജനറാള്‍മാർക്കും മുന്നിലേക്കാണ് പ്രത്യേക പരിഗണന നല്‍കി ജോർജ് കുര്യനെ ആനയിച്ചത്. ദേശീയ തലത്തില്‍ സംഘപരിവാർ അനുകൂലികള്‍ ക്രൈസ്തവരെ വ്യാപകമായി ആക്രമിക്കുമ്ബോള്‍ സംഘപരിവാറുകാരനെ തന്നെ വിശിഷ്ടാതിഥിയായി അവതരിപ്പിക്കുന്നതിലെ വൈരുധ്യമാണ് ഒരു വിഭാഗം ഉയർത്തിക്കാട്ടുന്നത്. മണിപ്പൂരിലടക്കം ക്രൈസ്തവരെ ആക്രമിക്കുന്നവരെ നേരിടുന്നത് കമ്യൂണിസ്റ്റു പാർട്ടിയില്‍പെട്ടവരാണ്. അവർ ഭരിക്കുന്ന കേരളത്തില്‍ സഭയുടെ സുപ്രധാന സമ്മേളനം നടന്നിട്ടും കമ്യൂണിസ്റ്റ് നേതാക്കളെ പങ്കെടുപ്പിക്കാത്തതിലും വിമർശനം ഉയരുന്നുണ്ട്.
അല്‍മായ പ്രതിനിധി സംഘത്തിലും ജനപ്രതിനിധികള്‍ക്കു സ്ഥാനമില്ല
മേജർ ആർക്കി എപ്പിസ്കോപ്പല്‍ അസംബ്ലിയില്‍ ആകെ പങ്കെടുക്കുന്നതു 348 പേരാണ്. അതില്‍ 80 വയസില്‍ താഴപ്രായമുള്ള 50 െമത്രാൻമാർ, 108 വൈദികർ, 37 സന്യാസിനിമാർ, ഏഴ് സന്യാസ സഹോദരങ്ങള്‍ എന്നിവരടക്കം 202 പേർ വൈദിക, സമർപ്പിത സമൂഹത്തില്‍ നിന്നുള്ളവരാണ്. ഈ വിഭാഗത്തില്‍ ആഗോള തലത്തില്‍ തന്നെ 25,000 ല്‍ താഴെ മാത്രമാണ് അംഗങ്ങളുള്ളത്. 2011ലെ സെൻസസ് പ്രകാരം സീറോ മലബാർ സഭയില്‍ വിശ്വസിക്കുന്ന ജനങ്ങളുടെ എണ്ണം 2346000 ആണ്. ഇത്രയുംപേരെ പ്രതിനിധീകരിച്ച്‌ 146 സാധാരണക്കരെ മാത്രമാണ് അസംബ്ലിയിലേക്ക് ക്ഷണിച്ചിരിക്കുന്നത്. ഇവരില്‍ സഭാവിശ്വാസികളായ എം.പിയോ എം.എല്‍.എയോ ഇല്ല. സമാപന ദിവസമായ ഞായറാഴ്ച രാവിലെ എം.പിമാരെയും എം.എല്‍.എമാരെയും പ്രത്യേകം ക്ഷണിച്ചിട്ടുണ്ട് എന്നതാണ് ഇക്കാര്യത്തില്‍ സംഘാടകർ നല്‍കുന്ന വിശദീകരണം.
ഒരു അഭിപ്രായം പോസ്റ്റ് ചെയ്യൂ