മേപ്പാടി
വയനാട് മേപ്പാടി മുണ്ടക്കൈയിലെ ഉരുള്‍പൊട്ടല്‍ ദുരന്തഭൂമിയില്‍ നിന്നും ഹൃദയഭേദക വാർത്തകളാണ് ഓരോ നിമിഷവും പുറത്തുവരുന്നത്.
നാട് ഉറങ്ങിയ രാവില്‍ ഭീമാകാരമായ ഉരുള്‍പൊട്ടലിന്റെ രൂപത്തില്‍ അപ്രതീക്ഷിതമായി ഒരു പ്രദേശമൊന്നാകെ കവർന്ന ദുരന്തത്തില്‍ നിരവധി ജീവനുകള്‍ക്കൊപ്പം ഒരു ജനതയുടെ ജീവിതവും കൂടിയാണ് ഒലിച്ചുപോയത്. ഒരുമിച്ചിരുന്ന് സൊറ പറഞ്ഞിരുന്ന കൂട്ടുകാരും വിശേഷങ്ങളും സ്വപ്നങ്ങളും പങ്കുവച്ച ശേഷം ഉറങ്ങാൻ കിടന്ന കുടുംബങ്ങളുമെല്ലാം പെട്ടെന്നൊരു നിമിഷം ഇല്ലാതായപ്പോള്‍ സ്നേഹനിധിയായ കുറെ മനുഷ്യരുടെ നാട് കൂടിയാണ് തുടച്ചുനീക്കപ്പെട്ടത്. അവരിലൊരാളായിരുന്നു മുണ്ടക്കൈ മസ്ജിദ് ഇമാം ശിഹാബ് ഫൈസി കയ്യൂന്നി.
പട്ടിക്കാട് ജാമിഅ നൂരിയ്യ പൂർവ വിദ്യാർഥിയായ ശിഹാബ് ഫൈസിയുടെ വേർപാടിനു പിന്നാലെ സുഹൃത്തും എഴുത്തുകാരനുമായ ലത്തീഫ് നെല്ലിച്ചോട് ഫേസ്ബുക്കിലെഴുതിയ കുറിപ്പ് ഉള്ളുലയ്ക്കുന്നതും ആരുടേയും കണ്ണുനനയിക്കുന്നതുമാണ്. വയനാട്ടിലെത്തുമ്ബോള്‍ വിരുന്നൂട്ടിയിരുന്ന ശിഹാബ് ഫൈസിയുമായി അവസാനമായി കണ്ടപ്പോള്‍ നടത്തിയ സംഭാഷണവും അദ്ദേഹത്തിന്റെ വാക്കുകളുമൊക്കെ ഓർത്തെടുത്ത് അങ്ങേയറ്റത്തെ ഹൃദയവേദനയുടെ ഗദ്ഗദത്താല്‍ കുറിക്കുന്ന വരികള്‍.
'വയനാട്ടിലേക്ക് വെറുതെ വണ്ടിയോടിച്ച്‌ വരുന്ന ദിനങ്ങളില്‍ നെല്ലിച്ചോടേന്ന് വിളിച്ച്‌ വിരുന്നൂട്ടാൻ ഇനി നീയില്ലല്ലോടാ' എന്നാണ് കുറിപ്പ് തുടങ്ങുന്നത്. മുണ്ടക്കൈ മസ്ജിദിന്റെ വരാന്തയില്‍ വർത്തമാനം പറഞ്ഞിരുന്ന വൈകുന്നേരങ്ങളെ കുറിച്ചും നേരമിരുട്ടും മുമ്ബ് ചുരമിറങ്ങണമെന്ന് വാശിപിടിക്കുമ്ബോള്‍ ഇന്നിവിടെ കൂടാമെന്ന സ്നേഹ സൗഹൃദത്തിന്റെ സമ്മർദത്തെ കുറിച്ചും പറഞ്ഞു തീരാത്ത വിശേഷങ്ങളുടെ പങ്കുവയ്ക്കലുകളെ കുറിച്ചും സമ്മാനമായി ലഭിച്ച അത്തർ കുപ്പികളെ കുറിച്ചുമൊക്കെ ലത്തീഫ് നെല്ലിച്ചോട് ഓർത്തെടുക്കുന്നു.
'ശിഹാബേ, അമർത്തിയടച്ചിട്ടും അനുവാദമില്ലാതെ എന്റെ കണ്ണു നിറയുന്നെടാ. കേട്ടത് സത്യാവരുതേന്ന് സുജൂദില്‍ കിടന്ന് കരഞ്ഞു പറഞ്ഞിട്ടും പടച്ചോൻ കേട്ടില്ല. നിലമ്ബൂരിലെ മോർച്ചറിയില്‍ നീയുണ്ടെന്നറിഞ്ഞപ്പോ മരവിച്ചു പോയതാണ് ഞാൻ. അവസാനമായി കണ്ടപ്പോ തലയിലും താടി രോമങ്ങളിലും പടർന്ന വെള്ളി നൂലുകളെ നോക്കി നീ പറഞ്ഞില്ലേ. നെല്ലിച്ചോടും നരച്ചൂന്ന്. നാല്‍പത് കഴിഞ്ഞാ മനുഷ്യന്റെ മേനിക്ക് മയ്യത്തിന്റെ മണമാണെന്ന എന്റെ പ്രതികരണത്തിന് പ്രാർഥനയായിരുന്നല്ലോ നിന്റെ മറുപടി. അല്ലാഹു ആഫിയത്തുള്ള ആയുസ് തരട്ടേന്ന്. എന്നിട്ട് നീ ആദ്യമങ്ങ് പോയി. ദൂരേക്ക് നോക്കി നമ്മളാസ്വദിച്ച പ്രകൃതി തന്നെ നിന്നെ വിളിച്ചോണ്ട് പോയി'- കുറിപ്പില്‍ പറയുന്നു.
'മഹല്ല് നിവാസികള്‍ക്ക് ആദരണീയ പണ്ഡിതൻ. കുട്ടികള്‍ക്ക് പ്രിയപ്പെട്ട ഉസ്താദ്. സൗമ്യത കൊണ്ട് ചേർത്തു പിടിക്കുന്ന സഹൃദയൻ. കല്ലും ചെളിയും വേരും മരവും കലർന്ന കലക്കു വെള്ളത്തില്‍ ഒഴുകിയൊഴുകി മരണത്തെ പുണർന്നവനേ'- ലത്തീഫ് കുറിപ്പ് അവസാനിപ്പിക്കുന്നു...
ഒരു അഭിപ്രായം പോസ്റ്റ് ചെയ്യൂ