തിരുവനന്തപുരം
മാതാപിതാക്കളും സഹോദരിയുമടക്കം കുടുംബത്തിലെ നാലുപേരെ കൊലപ്പെടുത്തിയ കേസില്‍ കുറ്റം നിഷേധിച്ച്‌ പ്രതിയായ കേഡല്‍ ജിൻസണ്‍ രാജ.കേസില്‍ വിചാരണ നവംബർ 13-ന് ആരംഭിക്കും.
മാനസികാസ്വാസ്ഥ്യം ഉണ്ടായിരുന്ന പ്രതി വിചാരണ നേരിടാൻ പാകത്തിനു മാനസികനില കൈവരിച്ചെന്ന മെഡിക്കല്‍ ബോർഡിന്റെ റിപ്പോർട്ടിനെത്തുടർന്നാണ് കോടതി പ്രതിയെ കുറ്റപത്രം വായിച്ച്‌ കേള്‍പ്പിച്ചതും പ്രതി കുറ്റം നിഷേധിച്ചതും. ആറാം അഡീഷണല്‍ ജില്ലാ സെഷൻസ് ജഡ്ജി കെ.വിഷ്ണുവാണ് കേസ് പരിഗണിച്ചത്.
നന്തൻകോട് ക്ലിഫ് ഹൗസിനു സമീപം ബെയില്‍സ് കോമ്ബൗണ്ട് 117-ല്‍ ഡോ. ജീൻ പദ്മ, ഭർത്താവ് റിട്ട. പ്രൊഫ. രാജ തങ്കം, മകള്‍ കരോലിൻ, ഡോക്ടറുടെ ബന്ധു ലളിത എന്നിവരെയാണ് ഡോക്ടറുടെ മകനായ കേഡല്‍ ജിൻസണ്‍ രാജ കൊലപ്പെടുത്തിയതെന്നാണ് പ്രോസിക്യൂഷൻ കേസ്.
ഓസ്ട്രേലിയയില്‍ ആർട്ടിഫിഷ്യല്‍ ഇന്റലിജൻസില്‍ കംപ്യൂട്ടർ പഠനം പൂർത്തിയാക്കി 2009-ല്‍ നാട്ടില്‍ എത്തിയയാളാണ് പ്രതിയായ കേഡല്‍ ജിൻസണ്‍ രാജ. ആത്മാവിനെ സ്വതന്ത്രസഞ്ചാരത്തിനു വിടാനുള്ള ആസ്ട്രല്‍ പ്രൊജക്ഷൻ എന്ന പൈശാചിക രീതി പരീക്ഷിച്ചുനോക്കിയതാണെന്ന് കേഡല്‍തന്നെ പോലീസിനോടു സമ്മതിച്ചിരുന്നു.
ആത്മാവിന്റെ യാത്ര സംബന്ധിച്ച്‌ ഇന്റർനെറ്റില്‍ നിന്നാണ് വിവരശേഖരണം നടത്തിയിരുന്നതെന്നും ഇയാള്‍ പോലീസിനോടു പറഞ്ഞിരുന്നു. 2017 ഏപ്രില്‍ എട്ടിനാകാം കൊലപാതകങ്ങള്‍ നടന്നതെന്നാണ് പോലീസ് നിഗമനം.
ഒരു അഭിപ്രായം പോസ്റ്റ് ചെയ്യൂ