കോഴിക്കോട്
ഭാരത് പെട്രോളിയം കോർപ്പറേഷന്റെ നേതൃത്വത്തില്‍ കോഴിക്കോട് സില്‍വർഹില്‍സ് പബ്ലിക് സ്കൂളില്‍ നടന്ന 'സ്വച്ഛത പഖ്വാഡാ' പ്രചാരണപരിപാടി ഇനിയാരും അത്രപെട്ടെന്നൊന്നും മറക്കില്ല.
എല്ലാവർക്കും ഓർമ്മയുണ്ടാകും ആ മുഖങ്ങള്‍. സില്‍വർഹില്‍സ് പബ്ലിക് സ്കൂള്‍ ശുചീകരണവിഭാഗത്തിലെ ജോലിക്കാരാണ് ഒറ്റദിവസംകൊണ്ട് സൂപ്പർതാരങ്ങളായത്. അവർക്ക് അത്രകണ്ട് പ്രാധാന്യമുണ്ടെന്ന് ഓർമ്മപ്പെടുത്തിയതാവട്ടെ സൂപ്പർസ്റ്റാർ കേന്ദ്രമന്ത്രി സുരേഷ് ഗോപിയും.
ശുചിത്വമാർന്ന ഇന്ത്യയെ കെട്ടിപ്പടുക്കുന്നതിനുള്ള പരിപാടിയുടെ ഉദ്ഘാടനത്തിന്റെ ഭാഗമായാണ് ശുചീകരണവിഭാഗം ജീവനക്കാരെ ആദരിക്കാൻ തീരുമാനിച്ചത്. ആദരം ഏറ്റുവാങ്ങി ഇവർ സ്റ്റേജില്‍ നില്‍ക്കെയാണ് പെട്ടെന്ന് കേന്ദ്രമന്ത്രിയുടെ അനൗണ്‍സ്മെന്റ് വന്നത് -ആദരം ഏറ്റുവാങ്ങിയവരെല്ലാം വേദിയില്‍ വിശിഷ്ടാതിഥികള്‍ക്കായി ഒരുക്കിയ സീറ്റുകളില്‍ ഇരിക്കുക, നിങ്ങളാണ് ഇന്നത്തെ താരങ്ങള്‍.
എന്തുചെയ്യണമെന്നറിയാതെ അവർ പരസ്പരം നോക്കി. എല്ലാവരും നോക്കിനില്‍ക്കാതെ വന്നിരിക്കൂ... പിന്നാലെവന്നൂ കേന്ദ്രമന്ത്രിയുടെ നിർബന്ധം. പതുക്കെവന്ന് സീറ്റുകളിലിരിക്കുമ്ബോഴും മിക്കവരുടെയും മുഖത്ത് ഞെട്ടല്‍മാറിയിരുന്നില്ല. അപ്പോഴേക്കും സൂപ്പർതാരം വന്ന് എല്ലാവരുടെയും സീറ്റിന് പിന്നിലായിനിന്നു. മറ്റ് വിശിഷ്ടാതിഥികളെയും വിളിച്ചുനിർത്തി. അതിഥികള്‍ക്കൊപ്പം സന്തോഷവും സംഭ്രമവും നിറഞ്ഞ മുഖത്തോടെ സില്‍വർഹില്‍സിന്റെ സ്വന്തം ചേട്ടനും ചേച്ചിമാരും ക്യാമറകളിലും മനസ്സുകളിലും നിറഞ്ഞു.
കെ. പ്രബീഷ്, സി. റോജ, കെ. ബിന്ദു, പി.ടി. അജിത, എം. സിന്ധു, ടി.കെ. ഷീജ, സുമ ഉണ്ണികൃഷ്ണൻ, കെ.പി. സുനിത, കെ.പി. ലിസി, കെ. സീന എന്നിവരാണ് ആദരമേറ്റുവാങ്ങിയ ജീവനക്കാർ.
നടുവേദന കാരണം കുഷ്യനില്ലാത്ത പ്രത്യേക കസേരയിലാണ് അദ്ദേഹം ഇരുന്നത്. അദ്ദേഹം ആവശ്യപ്പെട്ട പ്രകാരം സംഘാടകർ കസേര മാറ്റിനല്‍കുകയായിരുന്നു. വലിയ കസേരകള്‍ക്ക് നടുവിലെ ചെറിയ പ്ലാസ്റ്റിക് കസേര, കാര്യമറിയാത്തതിനാല്‍ എം.പി.യും എം.എല്‍.എ.യുമടക്കമുള്ളവർക്കിടയില്‍പ്പോലും ചർച്ചയുമായി.
വീണ്ടും വരും, ബീച്ച്‌ ശുചീകരിക്കാൻ
കോഴിക്കോട്: 'മനോഹരമായ തീരമാണ് കോഴിക്കോട് ബീച്ച്‌. ആ ബീച്ചിനെ നമുക്ക് സുന്ദരമായി സൂക്ഷിക്കേണ്ടേ. ചിങ്ങം പിറന്നുകഴിഞ്ഞ്, വലിയ മഴ പോയാല്‍ ഒരുദിവസം ആ തീരം ശുചീകരിക്കാൻ നമുക്കൊന്നിച്ച്‌ കൂടിക്കൂടേ. ഞാൻ വരും നിങ്ങളോടൊപ്പം ചേരാൻ' -കേന്ദ്രമന്ത്രി സുരേഷ് ഗോപി ചോദിച്ചപ്പോള്‍ സദസ്സില്‍നിന്ന് ഹർഷാരവമുയർന്നു. ഒപ്പം ഞങ്ങളുണ്ടാവുമെന്ന മറുപടിയും.
ഭാരത് പെട്രോളിയം കോർപ്പറേഷന്റെ നേതൃത്വത്തില്‍ സില്‍വർഹില്‍സ് പബ്ലിക് സ്കൂളില്‍ നടന്ന 'സ്വച്ഛത പഖ്വാഡ' പ്രചാരണം ഉദ്ഘാടനംചെയ്യുകയായിരുന്നു അദ്ദേഹം. എം.കെ. രാഘവൻ എം.പി. അധ്യക്ഷനായി. തോട്ടത്തില്‍ രവീന്ദ്രൻ എം.എല്‍.എ. മുഖ്യപ്രഭാഷണം നടത്തി. കളക്ടർ സ്നേഹില്‍കുമാർ സിങ്, ഭാരത് പെട്രോളിയം കോർപ്പറേഷന്റെ സംസ്ഥാന മേധാവി കെ.വി. രമേഷ്കുമാർ, ജനറല്‍ മാനേജർ എം. രാജൻ, സില്‍വർഹില്‍സ് പബ്ലിക് സ്കൂള്‍ പ്രിൻസിപ്പല്‍ ഫാ. മാത്യു കളപ്പുരയില്‍ എന്നിവർ സംസാരിച്ചു. കേന്ദ്രമന്ത്രിയുടെ നേതൃത്വത്തില്‍ സ്വച്ഛതാപ്രതിജ്ഞയും വൃക്ഷത്തൈ നടലും നടന്നു.
ഒരു അഭിപ്രായം പോസ്റ്റ് ചെയ്യൂ