ന്യൂ ഡല്‍ഹി
കേന്ദ്രബജറ്റിലെ അവഗണനയില്‍ ഇൻഡ്യ സഖ്യത്തിന്റെ പ്രതിഷേധം. എല്ലാ സംസ്ഥാനങ്ങള്‍ക്കും തുല്യ പരിഗണന വേണമെന്ന് എം.പിമാർ പാർലമെന്റില്‍ ആവശ്യപ്പെട്ടു.
ഒരുപാട് സംസ്ഥാനങ്ങള്‍ക്ക് ബജറ്റില്‍ നീതി കിട്ടിയില്ലെന്നും നീതി ലഭിക്കുന്നതു വരെ പോരാട്ടം തുടരുമെന്നും കോണ്‍ഗ്രസ് പ്രസിഡന്റ് മല്ലികാർജുൻ ഖാർഗെ മാധ്യമങ്ങളോട് പറഞ്ഞു.
എല്ലാ ബജറ്റിലും രാജ്യത്തെ എല്ലാ സംസ്ഥാനങ്ങളുടെയും പേരുകള്‍ പ്രതിപാദിക്കാൻ സാധിക്കില്ലെന്നായിരുന്നു പ്രതിപക്ഷത്തിന്റെ ആരോപണങ്ങള്‍ക്ക് നിർമല സീതാരാമന്റെ മറുപടി. വടവനയില്‍ തുറമുഖം സ്ഥാപിക്കാൻ മന്ത്രിസഭ യോഗം തീരുമാനിച്ചിരുന്നു. എന്നാല്‍ മഹാരാഷ്ട്രയുടെ പേര് ബജറ്റില്‍ പരാമർശിച്ചതേയില്ല. മഹാരാഷ്ട്രയെ അവഗണിച്ചുവെന്നാണോ അതിനർഥം? ബജറ്റില്‍ പ്രത്യേക സംസ്ഥാനങ്ങളുടെ പേര് പരാമർശിച്ചിട്ടുണ്ട് എന്നതിനാല്‍ എല്ലാ സഹായങ്ങളും ആ സംസ്ഥാനങ്ങള്‍ക്ക് മാത്രമാണ് എന്നാണോ അർഥം? തീർത്തും അടിസ്ഥാന രഹിതമായ ആരോപണമാണിത്.-നിർമല സീതാരാമൻ വിമർശിച്ചു.
രണ്ട് സംസ്ഥാനങ്ങള്‍ക്ക് വേണ്ടി മാത്രമാണ് ബജറ്റ് അവതരിപ്പിച്ചതെന്ന് ജെബി മേത്തർ എം.പി ആരോപിച്ചു. ക്രെച്ചസില്‍ നടക്കുന്ന സർക്കാരിനെ താങ്ങിനിർത്തുന്നത് ബിഹാറും ആന്ധ്രപ്രദേശുമാണ്. എന്നാല്‍ അവർക്കു മാത്രം സർവതും വാരിക്കോരി കൊടുത്തത് ഭരണഘടനക്ക് വിരുദ്ധമാണ്. അതിനാലാണ് ഇൻഡ്യ സഖ്യം പ്രതിഷേധിക്കുന്നത്.-ജെബി മേത്തർ പറഞ്ഞു.
സാധാരണക്കാർക്കും കർഷകർക്കും തൊഴിലാളികള്‍ക്കും വൻ പ്രഹരമാണ് കസേര സംരക്ഷിക്കാൻ ലക്ഷ്യമിട്ട ബജറ്റെന്ന് കോണ്‍ഗ്രസ് നേതാവ് മണിക്കം ടാഗോർ പറഞ്ഞു. തീർത്തും വിവേചനപരമായ ബജറ്റാണിത്. നമുക്കെല്ലാവർക്കും അറിയാം കസേര സംരക്ഷിക്കാൻ ലക്ഷ്യമിട്ടുള്ള ബജറ്റാണിതെന്ന്.-മണിക്കം ടാഗോർ പറഞ്ഞു. ബജറ്റിനെതിരായ പ്രതിഷേധത്തോടനുബന്ധിച്ച്‌ പ്രതിപക്ഷ നേതാവ് രാഹുല്‍ ഗാന്ധി കർഷക സംഘടനകളുമായി കൂടിക്കാഴ്ച നടത്തിയിരുന്നു.
ഒരു അഭിപ്രായം പോസ്റ്റ് ചെയ്യൂ