പാല/ കോട്ടയം
പഴം പൊരി+ ബീഫ് എന്ന ബോഡ് കണ്ട് ചാടിക്കേറി തട്ടുകടയിൽ ചെന്നാൽ പിന്നെ കുശാലാണ്. ഏറ്റുമാനൂർ പൂഞ്ഞാർ ഹൈവേയിൽ സെൻ്റ് തോമസ് കോളേജിനു സമീപം പുലിയന്നൂർ ജംഗ്ക്ഷനിൽ കെ ജെ തങ്കച്ചൻ നടത്തുന്ന ഒരു കുഞ്ഞു തട്ടുകടയുണ്ട്. പ്രതിസന്ധികളിലും തളരാതെ മനോധൈര്യം കൊണ്ട് പടുത്തുയർത്തിയ ജീവിത മാർഗമാണ് ഈ തട്ടുകട.
സ്ട്രോക്കിനും കോവിഡിനും തളർത്താൻ കഴിയാത്ത അത്മവീര്യം. കോട്ടയം മെഡിക്കൽ കോളജിലെ പിജി ഹോസ്റ്റൽ പാചകക്കാരനായിരുന്ന തങ്കച്ചൻ ചേട്ടന് പെട്ടെന്നുണ്ടായ സ്ട്രോക്ക് ഒരൽപ്പം പ്രതിസന്ധി സൃഷ്ടിച്ചെങ്കിലും മൂന്നു മാസത്തിനു ശേഷം വീണ്ടും രംഗത്തേക്ക് കടന്നുവന്നു. തുടർന്നു വന്ന കോവിഡ് ജീവിതത്തിൽ വില്ലനായെങ്കിലും അതിനേയും സദൈര്യം മറികടന്ന് ജോലി ഉപേക്ഷിച്ച് സ്വന്തം ഉപജീവനമാർഗമായ തട്ടുകടയിലേക്ക്.
ഉച്ചക്ക് ഒരു മണി മുതൽ രാത്രി ഒൻപത് മണി വരെ തട്ടുകടയിൽ സ്വാദിഷ്ടമായ വിഭവങ്ങൾ ഒരുക്കുകയാണ് അദ്ദേഹം. കോട്ടയത്തിൻ്റെ സ്വന്തം ഏത്തക്ക ബോളിയും ബീഫും തേടി ആളുകൾ ഇവിടെ എത്തുന്നുണ്ട്. പരിപ്പുവട, സവാള വട, കോളിഫ്ലെവർ, മുട്ടബജ്ജി, മുളക് ബജ്ജി തുടങ്ങിയ വിവിധ എണ്ണ കടികൾക്കൊപ്പം തങ്കച്ചൻ ചേട്ടൻ്റെ സ്നേഹം ചാലിച്ച മുളക് ചമ്മന്തിയും ഇവിടെ കിട്ടും. പഴംപൊരി മുതൽ എല്ലാ കടികളും ഈ ചമ്മന്തി കൂട്ടി കഴിക്കാനാണ് ആളുകളെത്തുന്നത്. വിവിധ സ്ഥലങ്ങളിൽ പാചകക്കാരനും തോട്ടം സൂപ്പർവൈസറായും മറ്റും ജോലി ചെയ്ത അദ്ദേഹത്തിൻ്റെ വരുമാന മാർഗം ഇപ്പോൾ തട്ടുകടയാണ്. ഇവിടെ നിന്നു ലഭിക്കുന്ന തുച്ഛമായ വരുമാനമാണ് ഇപ്പോൾ ജീവിതം മുന്നോട്ടു നയിക്കുന്നത്.
നല്ല ചൂട് ഏത്തക്ക ബോളിയും ബീഫും
സോഷ്യൽ മീഡിയ നമ്മുടെ ഭക്ഷണ സംസ്കാരത്തിൽ വരുത്തിയ മാറ്റം ചെറുതൊന്നുമല്ല. പുതിയ കോമ്പിനേഷനുകൾ ദിനം തോറും രൂപപ്പെടുന്നു. അതിലെ ഒരു സ്റ്റാറാണ് പഴംപൊരിയും ബീഫും. അലുവയും മത്തിക്കറിയും പോലെ കേക്കാൻ അത്ര സുഖമില്ലെങ്കിലും ഇവൻ സൂപ്പറാണ്. നല്ല ചൂട് പഴംപൊരിയും ബീഫും ഒരുക്കുകയാണ് തങ്കച്ചൻ ചേട്ടൻ. നല്ല ഒന്നാന്തരം ബീഫ് കറി+ പഴം പൊരി ഇത് ഒരു ഒന്നൊന്നര സാധനമാണ്. ആർക്കും ഇഷ്ടപെടുന്ന ഐറ്റം.
ഇനി മോമോസും
അറേബ്യൻ, ചൈനീസ് തുടങ്ങിയ വിവിധ ഭക്ഷണവിഭവങ്ങൾ ഒരുക്കിയിരുന്ന തങ്കച്ചൻ ചേട്ടൻ ഇനി തട്ടുകടയിൽ തിബറ്റിൻ്റെ ഭക്ഷണ വിഭവമായ മോമോസും ചൈനീസ് വിഭവമായ ന്യൂഡിൽസും ഉണ്ടാക്കി വിളമ്പാനുള്ള തയ്യാറെടുപ്പിലാണ്.
ഒരു അഭിപ്രായം പോസ്റ്റ് ചെയ്യൂ