പാലക്കാട്: നാടും നഗരവും വൃത്തിയാക്കല്‍ മാത്രമല്ല ശേഖരിച്ച പാഴ്‌വസ്തുക്കളില്‍ നിന്ന് പുനരുപയോഗ വസ്തുക്കള്‍ നിര്‍മിച്ച്‌ പ്രതീക്ഷകളിലേക്കൊരു "ട്വിസ്റ്റ്' ഒരുക്കുകയാണ് പട്ടാന്പിയിലെയും എരിമയൂരിലെയും ഹരിതകര്‍മ സേനാംഗങ്ങള്‍.
വീട്ടമ്മയില്‍ നിന്ന് ഹരിതകര്‍മ സേനയിലേക്കുള്ള മാറ്റം വളരെ അഭിമാനത്തോടെയാണ് സേനാംഗങ്ങള്‍ കാണുന്നത്. ഹരിത കേരള മിഷന്‍റെയും ശുചിത്വ കേരള മിഷന്‍റെയും പ്രേത്സാഹനവും കൂടെയായപ്പോള്‍ സംഗതി ഉഷാറായി മുന്നോട്ടുപോകുന്നു.
തുടക്കത്തില്‍ ഹരിതകര്‍മസേനാംഗങ്ങളെ കല്ലുകടിയായി കണ്ടിരുന്നവര്‍ ഇന്ന് അവരെ വിളിച്ച്‌ പാഴ്‌വസ്തുക്കളും വീട്ടിലെ പാസ്റ്റിക് വേസ്റ്റുകളും നല്കുന്നു. ഇങ്ങനെ ശേഖരിച്ച വേസ്റ്റില്‍ നിന്ന് പുനരുപയോഗ സാധനങ്ങള്‍ നിര്‍മിച്ച്‌ മാതൃകയാവുകയാണ് പട്ടാന്പി നഗരസഭയിലെ 39 അംഗങ്ങള്‍ ഉള്‍പ്പെടുന്ന ഹരിത കര്‍മസേന.
വീടുകളില്‍ നിന്ന് ശേഖരിച്ച പഴകിയതല്ലാത്ത തുണിത്തരങ്ങള്‍ മറ്റും ശേഖരിച്ചാണ് വീടുകള്‍ക്ക് ഉപയോഗപ്രദമാകുന്ന ചവിട്ടി, തലമുടിയില്‍ ഇടുന്ന റിബണ്‍ എന്നിവ നിര്‍മിക്കുന്നത്.
സേനാംഗങ്ങള്‍ക്ക് ഒഴിവു സമയങ്ങള്‍ ലഭിക്കുന്പോഴാണ് ഇത്തരം സാധനങ്ങള്‍ നിര്‍മിക്കുന്ന പ്രവൃത്തിയില്‍ ഏര്‍പ്പെടുന്നത്. നിര്‍മിച്ച വസ്തുക്കള്‍ വീടുകളിലും കടകളിലും എത്തിച്ച്‌ വില്പന നടത്തുന്നു. പരിസ്ഥിതി സൗഹാര്‍ദമായതിനാല്‍ ആവശ്യക്കാര്‍ അന്വേഷിച്ചെത്താറുണ്ടെന്ന് അംഗങ്ങള്‍ പറഞ്ഞു.
ഉഷാറാക്കാൻ എക്സിബിഷൻ
സോപ്പ് നിര്‍മാണത്തിലും കുട നിര്‍മാണത്തിലും വ്യത്യസ്തരാവുകയാണ് എരിമയൂര്‍ പഞ്ചായത്തിലെ 18 അംഗങ്ങളുള്ള ഹരിതകര്‍മ സേന. പഞ്ചായത്തിന്‍റെ പൂര്‍ണമായ പിന്തുണയോടുകൂടിയാണ് ഈ സംരംഭം മുന്നോട്ട് പോകുന്നതെന്ന് എരിമയൂര്‍ പഞ്ചായത്ത് പ്രസിഡന്‍റ് സുഭാഷിണി പറഞ്ഞു.
സേനാംഗങ്ങള്‍ നിര്‍മിച്ച സാധനങ്ങള്‍ പ്രദര്‍ശിപ്പിച്ചുകൊണ്ട് പഞ്ചായത്ത് തലത്തില്‍ എക്സിബിഷൻ സംഘടിപ്പിച്ചിരുന്നു.
എക്സിബിഷനില്‍ ലഭിച്ച സ്വീകാര്യത കൂടുതല്‍ വസ്തുക്കള്‍ നിര്‍മിക്കാൻ സേനാംഗങ്ങള്‍ക്ക് പ്രചോദനമായി. കുട, സോപ്പ് നിര്‍മാണത്തിനായി തുടക്കത്തില്‍ ഐആര്‍ടിസിയുടെ ഫണ്ട് ലഭിച്ചിരുന്നു.
തുടര്‍ന്ന് കൂടുതല്‍ കുടകള്‍ നിര്‍മിക്കാനായി ഹരിത കര്‍മ സേനാംഗങ്ങള്‍ തന്നെ തൃശൂരില്‍ നിന്ന് കുട നിര്‍മിക്കാൻ ആവശ്യമായി സാമഗ്രികള്‍ വാങ്ങി കൊണ്ടുവന്ന് അംഗങ്ങള്‍ എല്ലാവരും ചേര്‍ന്നാണ് കുട നിര്‍മാണം.
വിപണന സാധ്യത
വീടുകള്‍ തോറും വേസ്റ്റ് ശേഖരിക്കാൻ പോകുന്ന സേനാംഗങ്ങള്‍ വീടുകളില്‍ നിന്ന് ജൈവ അജൈവ മാലിന്യങ്ങള്‍ വേര്‍തിരിച്ച്‌ ശേഖരിക്കുന്നതോടൊപ്പം തന്നെ അവര്‍ നിര്‍മിച്ച സോപ്പ്, കുട, ചവിട്ടി, റിബണ്‍ തുടങ്ങിയ ഉല്പന്നങ്ങളുടെ വില്പനയും നടത്തുന്നു.
ചവിട്ടി ഒന്നിന് 100 രൂപ നിരക്കിലാണ് പട്ടാന്പി നഗരസഭയിലെ ഹരിത കര്‍മസേനാംഗങ്ങള്‍ വില്പന നടത്തുന്നത്.
എന്നാല്‍ എരിമയൂര്‍ പഞ്ചായത്തിലെ സേനാംഗങ്ങള്‍ തങ്ങള്‍ നിര്‍മിച്ച വസ്തുക്കള്‍ വില്പനയ്ക്കായി വീടുകളില്‍ എത്തിക്കുന്നതിനു പുറമേ പഞ്ചായത്തിന്‍റെ തന്നെ കൃഷി വകുപ്പിന്‍റെ ഇക്കോ ഷോപ്പില്‍ എത്തിച്ച്‌ ആവശ്യക്കാര്‍ക്ക് വില്ക്കുകയാണ് പതിവ്.
ഒരു അഭിപ്രായം പോസ്റ്റ് ചെയ്യൂ