കൊച്ചി: റോഡ് സുരക്ഷാ നിയമങ്ങള്‍ കര്‍ശനമാക്കുന്നതിന്‍റെ ഭാഗമായി നടപടികള്‍ കടുപ്പിക്കാനൊരുങ്ങി ഗതാഗത വകുപ്പ്.
ഇതിന്‍റെ ഭാഗമായി അലക്ഷ്യമായി വാഹനമോടിച്ച്‌ അപകടം ഉണ്ടാക്കുന്നവരുടെ ഡ്രൈവിംഗ് ലൈസന്‍സ് മൂന്നു മാസത്തേക്ക് റദ്ദാക്കും. തുടര്‍ന്ന് ഇവ തിരികെ കിട്ടാന്‍ ചില്ലറ പണിയല്ല വേണ്ടത്.
മോട്ടോര്‍ വാഹന വകുപ്പിന്‍റെ സംസ്ഥാനത്തെ പ്രഫഷണല്‍ ട്രെയിനിംഗ് സ്ഥാപനമായ ഇന്‍സ്റ്റിറ്റ്യൂട്ട് ഓഫ് ഡ്രൈവേഴ്‌സ് ട്രെയിനിംഗ് ആന്‍ഡ് റിസര്‍ച്ച്‌ (ഐഡിടിആര്‍) സെന്‍ററില്‍ കോഴ്‌സില്‍ പങ്കെടുക്കുകയും റോഡപകടങ്ങളില്‍ ഗുരുതരമായി പരിക്കേറ്റ് പാലിയേറ്റീവ് കെയറില്‍ കഴിയുന്നവരെ ഇവര്‍ പരിചരിക്കുകയും വേണം. ഗതാഗത കമ്മീഷണര്‍ എസ്. ശ്രീജിത്ത് ആണ് ഇതുസംബന്ധിച്ച പ്രതികരണം നടത്തിയത്. ഇതിനു പുറമെ പുത്തന്‍ നടപടികളും ഗതാഗതവകുപ്പ് മുന്നോട്ടു വയ്ക്കുന്നുണ്ട്.
അപകടം ഉണ്ടാക്കാതെ, മാന്യമായ രീതിയില്‍ ഉപയോഗിക്കുന്ന വാഹനങ്ങളുടെ ഇന്‍ഷ്വറന്‍സ് തുക കുറയ്ക്കുകയും പതിവായി നിയമലംഘനം നടത്തുന്ന വാഹനങ്ങളുടെ പ്രീമിയം വര്‍ധിപ്പിക്കുകയും ചെയ്യുന്നതിനുള്ള ശ്രമവും ഗുരുതരമായ കുറ്റകൃത്യങ്ങളില്‍ ഉപയോഗിക്കുന്ന വാഹനങ്ങളുടെ ആര്‍സി റദ്ദാക്കുന്നതിനെക്കുറിച്ചും ഇന്‍ഷ്വറന്‍സ് പുതുക്കാതിരിക്കുന്നതും വകുപ്പ് ആലോചിച്ചുവരികയാണ്. രണ്ടു വാഹനങ്ങളുടെ ആര്‍സി ഇതിനകം റദ്ദാക്കിയതായി കളക്ടറേറ്റില്‍ നടന്ന യോഗത്തില്‍ കമ്മീഷണര്‍ അറിയിച്ചു.
കഴിഞ്ഞ മൂന്നു മാസത്തിനിടെ സംസ്ഥാനത്തെ റോഡപകട മരണങ്ങളില്‍ 10 ശതമാനം കുറവുണ്ടായി. വാഹനങ്ങളില്‍ തീപിടിത്തമുണ്ടാകുന്ന പല സംഭവങ്ങളും സംസ്ഥാനത്ത് റിപ്പോര്‍ട്ട് ചെയ്യുന്നുണ്ട്. ഇതിന്‍റെ പശ്ചാത്തലത്തില്‍ വിദഗ്ധ സമിതിയുടെ നേതൃത്വത്തില്‍ പ്രത്യേക പഠനം നടത്തും. നിരത്തുകളിലെ നിയമ ലംഘനങ്ങള്‍ക്കെതിരെ കര്‍ശന നടപടി സ്വീകരിക്കുമെന്നും കമ്മീഷണര്‍ മുന്നറിയിപ്പ് നല്‍കി.
ഐഡിടിആര്‍ എക്സ്റ്റന്‍ഷന്‍ സെന്‍റര്‍ കറുകുറ്റി എസ്‌സിഎംഎസിലെ ഇന്‍സ്റ്റിറ്റ്യൂട്ട് ഫോര്‍ റോഡ് സേഫ്റ്റി ആന്‍ഡ് ട്രാന്‍സ്‌പോര്‍ട്ടേഷനില്‍ ആരംഭിക്കും. ഒരു മാസത്തിനകം സെന്‍റര്‍ പ്രവര്‍ത്തന സജ്ജമാകും. സെന്‍ററിന്‍റെ ഉദ്ഘാടനം നാളെ രാവിലെ 10ന് മന്ത്രി ആന്‍റണി രാജു നിര്‍വഹിക്കും.
ഒരു അഭിപ്രായം പോസ്റ്റ് ചെയ്യൂ