മമ്മാക്കുന്ന്
അഞ്ചരക്കണ്ടി പുഴയുടെ തീരങ്ങളിൽ ആവേശ തിരയുയർത്തി ഉത്തര മലബാറിലെ ചുരുളൻവള്ളങ്ങൾ. പുഴയുടെ ഓളപരപ്പിൽ ആർത്തിരമ്പാനെത്തിയത് 13 ചുരുൻ വള്ളങ്ങളാണ്. കാസർഗോഡ് ജില്ലയിൽ നിന്ന് 11 വള്ളങ്ങളും കണ്ണൂരിൽ നിന്ന് രണ്ട് വള്ളങ്ങളും ചേർന്നപ്പോൾ വള്ളംകളി പ്രേമികൾക്ക് ആവേശത്തിന്റെ തിരയടിയായി ജലോത്സവം. ചാമ്പ്യൻസ് ബോട്ട് ലീഗിന് കണ്ണൂർ ജില്ലയിൽ ആദ്യ വേദി ഒരുക്കിയിരിക്കുകയാണ് അഞ്ചരക്കണ്ടി പുഴ. ശാന്തമായും സൗമ്യമായും ഒഴുകിയ അഞ്ചരക്കണ്ടി പുഴ ഇന്നലെ ആഹ്ലാദത്തിന്റെയും ആവേശത്തിന്റെയും ആർത്തിരമ്പലിലായിരുന്നു. ഇരു കരകളിലായി ചാമ്പ്യൻസ് ബോട്ട് ലീഗിന് സാക്ഷിയാവാനെത്തിയത് പതിനായിരങ്ങളാണ്. മഴയെപ്പോലും അവഗണിച്ച് അഞ്ചരക്കണ്ടി പുഴ ആഥിത്യം വഹിച്ച ചാമ്പ്യൻസ് ബോട്ട് ലീഗ് വള്ളം കളി മത്സരം നാടൊന്നാകെ ഏറ്റെടുത്തു. മികച്ച സംഘാടനവും മത്സരത്തിന്റെ മാറ്റ് കൂട്ടി
വയൽക്കര മയ്യിച്ച, എകെജി മയ്യിച്ച, ശ്രീ വിഷ്ണുമൂർത്തി കുറ്റിവയൽ, ശ്രീ വയൽക്കര വെങ്ങാട്ട്, ഇഎംഎസ് മുഴക്കീൽ, റെഡ്സ്റ്റാർ കാര്യങ്കോട്, പാലിച്ചോൻ അച്ചാംതുരുത്തി എ ടീം, പാലിച്ചോൻ അച്ചാംതുരുത്തി ബി ടീം, എകെജി പോടോത്തുരുത്തി എ ടീം, എകെജി പോടോത്തുരുത്തി ബി ടീം, കൃഷ്ണപിള്ള കാവുംചിറ, നവോദയ മംഗലശ്ശേരി, മേലൂർ സുഗുണൻ മാസ്‌റ്റർ സ്മാരക ക്ലബ് തുടങ്ങിയ ചുരുളൻ വള്ളങ്ങളാണ് അങ്കത്തട്ടിൽ ആവേശ തിരയുയർത്തിയത്. മമ്മാക്കുന്ന് പാലത്തിന് സമീപത്തു നിന്നും ഫ്ലാഗ് ഓഫ് ചെയ്ത് ഓളങ്ങളിൽ പടവെട്ടി മുഴപ്പിലങ്ങാട് കടവിലാണ് വള്ളങ്ങൾ ഫിനിഷ് ചെയ്തത്.
നാല് ഹീറ്റ്സ് മത്സരങ്ങളും ഫൈനൽ എന്നിങ്ങനെ മൂന്ന് ഫൈനൽ മത്സരങ്ങളുമാണ് നടന്നത്. ഒന്നാം ഹീറ്റ് മത്സരത്തിൽ ശ്രീ വിഷ്ണുമൂർത്തി കുറ്റിവയൽ, എകെജി പോടോത്തുരുത്തി ബി ടീം, കൃഷ്ണപിള്ള കാവുംചിറ എന്നീ ടീമുകളാണ് മത്സരിച്ചത്. ഇതിൽ കൃഷ്ണപ്പിള്ള കാവും ചിറ ഒന്നാമതെത്തി. രണ്ടാം ഹീറ്റ്സിൽ മത്സരിച്ച റെഡ്സ്റ്റാർ കാര്യങ്കോട്, പാലിച്ചോൻ അച്ചാംതുരുത്തി എ ടീം, എകെജി മയിച്ച എന്നീ ടീമുകളിൽ നിന്ന് ശ്രീ പാലിച്ചോൻ അച്ചാം തുരുത്തി എ ടീം ആണ് ആദ്യം ഫിനിഷ് ചെയ്തത്. ശ്രീ വയൽക്കര വെങ്ങാട്ട്, എകെജി പോടോത്തുരുത്തി എ ടീം, പാലിച്ചോൻ അച്ചാംതുരുത്തി ബി ടീം എന്നിവർ തുഴയെറിഞ്ഞപ്പോൾ എകെജി പോടോത്തുരുത്തി ഒന്നാമതായി ഫിനിഷ് ചെയ്തു. നാല് ടീമുകളാണ് നാലാം ഹീറ്റ്സിൽ മത്സരിച്ചത്, ഇഎംഎസ് മുഴക്കീൽ,
വയൽക്കര മയ്യിച്ച, നവോദയ മംഗലശേരി, സുഗുണൻ സ്മാരക ക്ലബ് മേലൂർ എന്നീ ടീമുകളിൽ വയൽക്കര മയിച്ച ആദ്യം ഫിനിഷ് ചെയ്തു.
ഐപിഎൽ, ഐസിഎൽ മാതൃകയിലാണ് ചാമ്പ്യൻസ് ബോട്ട് ലീഗ് സംഘടിപ്പിച്ചത്. 13 ടീമുകളിൽ നിന്നുമായി ഏറ്റവും മികച്ച വേഗതയിൽ ഫിനിഷ് ചെയ്ത ടീമുകളാണ് ഫൈനലിൽ മത്സരിച്ചത്.
ആവേശോജ്ജ്വലമായ ഫൈനൽ മത്സരത്തിൽ മാറ്റുരച്ച എകെജി പോടോത്തുരുത്തി ബി ടീം, കൃഷ്ണപിള്ള കാവുംചിറ, ശ്രീ വിഷ്ണുമൂർത്തി കുറ്റിവയൽ ടീമുകളിൽ എകെജി പോടോത്തുരുത്തി ബി ടീം കപ്പിൽ മുത്തമിട്ടു. 5.40.13 മിനുട്ട് സമയക്രമം പാലിച്ചാണ് എകെജി പോടോത്തുരുത്തി ബി വിജയികളായത്. കൃഷ്ണപിള്ള കാവുംചിറ (5.41.66), ശ്രീ വിഷ്ണുമൂർത്തി കുറ്റിവയൽ (5.43.58) എന്നീ ടീമുകൾ രണ്ടും മൂന്നും സ്ഥാനങ്ങൾ നേടി.
20 ലക്ഷം രൂപയാണ് മൊത്തം സമ്മാനത്തുക. ജേതാക്കൾക്ക് ഒന്നരലക്ഷം രൂപയും രണ്ടാം സ്ഥാനക്കാർക്ക് ഒരു ലക്ഷം രൂപയും മൂന്നാം സ്ഥാനക്കാർക്ക് 50,000 രൂപയുമാണ് സമ്മാനത്തുക ലഭിച്ചത്. ജേതാക്കൾ ഉൾപ്പെടെ പങ്കെടുക്കുന്ന എല്ലാ ടീമുകൾക്കും ഒന്നേകാൽ ലക്ഷം രൂപ ബോണസായും ലഭിക്കും.
ഒരു അഭിപ്രായം പോസ്റ്റ് ചെയ്യൂ