മിനിമം ബാലൻസ് തുക! ബാങ്ക് അക്കൗണ്ട് ഉടമകള്‍ പലപ്പോഴും ആശങ്കയോടെ സമീപിക്കുന്ന വിഷയമാണിത്. ഈ പരിധിയില്‍ കുറവാണ് അക്കൗണ്ടിലുള്ളതെങ്കില്‍ ബാങ്ക് പിഴ ചുമത്തും എന്നതാണ് ഇതിനുള്ള കാരണം.
പിന്നീട് അക്കൗണ്ടിലേയ്ക്ക് എന്തെങ്കിലും നിര്‍ദ്ദിഷ്ട കാര്യത്തിന് പണം നിക്ഷേപിക്കുമ്ബോഴായിരിക്കും ചിലപ്പോള്‍ ബാങ്ക് പിഴ തുക ഈടാക്കുക. ഇഎംഐ പിഴ കൂടാതെ അടയ്ക്കേണ്ട അവസാന ദിവസമാണ് ഇങ്ങനെ സംഭവിക്കുന്നതെങ്കില്‍ അധിക തുക നഷ്ടമാകുമെന്നത് തീര്‍ച്ചയാണ്.
എന്നാല്‍ അപ്രതീക്ഷിതമായി സേവിംഗ് അക്കൗണ്ട് ഉടമകളില്‍ നിന്ന് ഇത്തരത്തിലുള്ള പിഴ ഈടാക്കാനാകില്ല എന്നാണ് ആര്‍ബിഐ വ്യക്തമാക്കുന്നത്. മിനിമം ബാലൻസ് സംബന്ധിച്ച്‌ പിഴ ഈടാക്കുകയാണെങ്കില്‍ അത് ഏതെങ്കിലും മാര്‍ഗം മുഖേനെ അക്കൗണ്ട് ഉടമയെ അറിയിക്കണമെന്നാണ് ബാങ്കുകളോട് ആര്‍ബിഐ നിര്‍ദേശിക്കുന്നത്.
സേവിംഗ്സ് അക്കൗണ്ട് തുറക്കുന്ന സമയത്ത് തന്നെ മിനിമം ബാലൻസിനെക്കുറിച്ചും അത് നിലനിര്‍ത്തിയില്ലെങ്കില്‍ ഈടാക്കുന്ന പിഴയെക്കുറിച്ചും ബാങ്കുകള്‍ ഉപഭോക്താക്കള്‍ക്ക് കൃത്യമായ അവബോധം നല്‍കണമെന്നാണ് ആര്‍ബിഐ അറിയിക്കുന്നത്. കൂടാതെ പിഴ ഈടാക്കി ബാലൻസ് നെഗറ്റീവാക്കരുതെന്നും നിര്‍ദേശിക്കുന്നുണ്ട്.
നിശ്ചിത സമയപരിധിയ്ക്കുള്ളില്‍ അക്കൗണ്ട് ഉടമ മിനിമം ബാലൻസ് വീണ്ടെടുത്തില്ലെങ്കില്‍, (അക്കൗണ്ടിലെ തുക മിനിമം ബാലൻസിലും കുറവായി കുറഞ്ഞത് ഒരു മാസത്തിനുള്ളില്‍) ഉടമയുടെ അറിവോടെ പിഴ തുക ഈടാക്കാവുന്നതാണ്.
പെനാല്‍റ്റി തുക ഈടാക്കുന്നതിനായുള്ള നയം ബാങ്ക് ബോര്‍ഡിന് തീരുമാനിക്കാവുന്നതാണ്. ഇക്കാര്യത്തില്‍ ആര്‍ബിഐ കൈകടത്തില്ലെങ്കിലും ഇങ്ങനെ ഈടാക്കുന്ന പിഴ, മിനിമം ബാലൻസ് നിലനിര്‍ത്തുന്നതിന് അക്കൗണ്ടില്‍ എത്ര തുകയാണോ വേണ്ടത് അതില്‍ കുറവുവരുത്തിയിട്ടുള്ള തുകയുമായി ആനുപാതികമായിരിക്കണം. അതായത് ബാങ്ക് നിശ്ചയിച്ചിട്ടുള്ള മിനിമം ബാലൻസ് തുകയും അക്കൗണ്ടിലുള്ള യഥാര്‍ത്ഥ തുകയുമായുള്ള വ്യത്യാസത്തിന് ആനുപാതികമായിരിക്കണം. ഇതിന് അനുയോജ്യമായ സ്ളാബ് ഘടന ബാങ്കിന് തിരഞ്ഞെടുക്കാം.
കൂടാതെ പിഴയായി ഈടാക്കുന്ന നിരക്ക് ന്യായമായതും സേവനങ്ങള്‍ക്കായി ബാങ്കിനുണ്ടാകുന്ന ശരാശരി ചിലവിന് ആനുപാതികവുമായിരിക്കണം.
ആര്‍ബിഐയുടെ മാര്‍ഗനിര്‍ദേശങ്ങള്‍
https://www.rbi.org.in/commonperson/English/Scripts/Notification.aspx?Id=1500
ഒരു അഭിപ്രായം പോസ്റ്റ് ചെയ്യൂ