കൊടുങ്ങല്ലുര്‍: ജീവിതത്തിലേക്ക് നടന്നുകയറിയ പിതാവിനൊപ്പം നന്ദി പറയാൻ പൊലീസ് സ്റ്റേഷനിലെത്തിയ മകന് രക്ഷകരായ പൊലീസിന്റെ അഭിനന്ദനം.
വിജനമായ നടുറോഡില്‍ ജീവനുവേണ്ടി പിടഞ്ഞപ്പോള്‍ സമയോജിതമായ രക്ഷാദൗത്യത്തിലൂടെ ജീവിതത്തിലേക്ക് കൈപിടിച്ചു നടത്തിയ പൊലീസ് ഉദ്യോഗസ്ഥരെ കാണാൻ അര്‍ജുനോടൊപ്പം കൊടുങ്ങല്ലൂര്‍ പൊലീസ് സ്റ്റേഷനില്‍ എത്തിയപ്പോഴാണ് മകൻ അഭിനവ് കൃഷ്ണൻ അഭിനന്ദനം ഏറ്റുവാങ്ങിയത്. ശനിയാഴ്ച അര്‍ധരാത്രി കൊടുങ്ങല്ലൂര്‍ ചേരമാൻ ജുമാ മസ്ജിദിന് മുൻവശം റോഡില്‍ കുഴഞ്ഞുവീണ കീഴ്ത്തളി സ്വദേശി അര്‍ജുനെ കൊടുങ്ങല്ലൂര്‍ സ്റ്റേഷനിലെ സബ് ഇൻസ്പെക്ടര്‍ ജയ്സന്റെ നേതൃത്വത്തിലുള്ള സംഘത്തിന്റെ സമയോചിത ഇടപെടലാണ് ജീവിതത്തിലേക്ക് തിരികെ എത്തിച്ചത്. കരുതലോടെ രക്ഷാദൗത്യം നടത്തിയ പൊലീസ് സംഘത്തെ മേലധികാരികള്‍ അഭിനന്ദിച്ചിരുന്നു.
അര്‍ജുനനോടൊപ്പം ഉണ്ടായിരുന്ന മകൻ അഭിനവ് കൃഷ്ണ പരിസരത്ത് വാഹന പരിശോധന നടത്തുകയായിരുന്ന പൊലീസിനടുത്തെത്തി വിവരം അറിയിച്ചതിനെ തുടര്‍ന്നാണ് സബ് ഇൻസ്പെക്ടര്‍ ജെയ്സന്റെ നേതൃത്വത്തില്‍ പൊലീസുകാര്‍ സ്ഥലത്തെത്തിയത്. 11 വയസ്സുകാരനായ അഭിനവ് കൃഷ്ണയുടെ അനിതരസാധാരണമായ കാര്യപ്രാപ്തിയാണ് സംഭവത്തില്‍ ഇടപെടാൻ ഇടയാക്കിയതെന്ന് പൊലീസ് പറഞ്ഞു. അഭിനവ് കൃഷ്ണയെ ഇൻസ്പെക്ടര്‍ ബൈജു ഇ.ആര്‍. പൊന്നാടയണിയിച്ച്‌ അഭിനന്ദിച്ചു. എസ്.സി.പി.ഒ ഗിരീഷ്, കെ.എ.പി ഒന്നാം ബറ്റാലിയൻ എസ്.പി.ഒ ഗിരീഷ് എന്നിവരും സന്നിഹിതരായി.
ഒരു അഭിപ്രായം പോസ്റ്റ് ചെയ്യൂ