തൃശൂര്‍: പുതുപ്പള്ളി തെരഞ്ഞെടുപ്പുഫലം കോണ്‍ഗ്രസില്‍ പൊട്ടിത്തെറി സൃഷ്ടിക്കുമെന്ന് മന്ത്രി വി.എൻ. വാസവൻ. ബി.ജെ.പി വോട്ട് മറിച്ചില്ലെങ്കില്‍ എല്‍.ഡി.എഫ് ജയിക്കുമെന്നും അതോടെ കോണ്‍ഗ്രസില്‍ പൊട്ടിത്തെറി ഉണ്ടാകുമെന്നും അദ്ദേഹം മാധ്യമപ്രവര്‍ത്തകരോട് പ്രതികരിച്ചു.
യു.ഡി.എഫ് ക്യാമ്ബിനെ ഞെട്ടിക്കുന്ന ഫലമാണ് വരാൻ പോകുന്നത്. മണ്ഡലത്തില്‍ മുമ്ബ് ബി.ജെ.പി വോട്ട് മറിച്ച അനുഭവമുണ്ട്. അത് ഇത്തവണ നടന്നോ എന്ന് അറിയേണ്ടതുണ്ട്. വോട്ടെടുപ്പ് മനഃപൂര്‍വം വൈകിച്ചെന്ന കോണ്‍ഗ്രസിന്‍റെ ആരോപണം തള്ളിയ മന്ത്രി, വരിയില്‍ നിന്നവര്‍ക്കെല്ലാം വോട്ട് ചെയ്യാൻ അവസരമുണ്ടായെന്നും ബൂത്തുകളിലെ യന്ത്രത്തകരാര്‍ കാരണമാകാം നേരം വൈകിയതെന്നും പറഞ്ഞു.
ഉമ്മൻ ചാണ്ടിയുടെ ചികിത്സയുമായി ബന്ധപ്പെട്ട് പുറത്തുവന്ന ഓഡിയോ ക്ലിപ്പുമായി എല്‍.ഡി.എഫിന് ബന്ധമുണ്ടെന്ന വാദം അദ്ദേഹം തള്ളി. കോണ്‍ഗ്രസുകാരുടെ സംഭാഷണം എങ്ങനെ സി.പി.എം ചോര്‍ത്തുമെന്ന് ചോദിച്ച മന്ത്രി, വിഷയത്തില്‍ കോണ്‍ഗ്രസ് അന്വേഷണം ആവശ്യപ്പെട്ടാല്‍ പിന്തുണക്കുമെന്നും പറഞ്ഞു.
ഒരു അഭിപ്രായം പോസ്റ്റ് ചെയ്യൂ