ഷോര്‍ണൂര്‍: നിരോധിതസംഘടനയായ പോപ്പുലര്‍ ഫ്രണ്ട് ഓഫ് ഇന്ത്യയുടെ (പിഎഫ്‌ഐ) നേതാക്കളെ കണ്ടെത്താൻ ഷൊര്‍ണൂരില്‍ എൻഐഎയുടെ ലുക്ക് ഔട്ട് നോട്ടീസ്.
വിവരങ്ങള്‍ നല്‍കുന്നവര്‍ക്ക് വൻപ്രതിഫലവും പ്രഖ്യാപിച്ചിട്ടുണ്ട്. പട്ടാമ്ബി, ചെര്‍പ്പുളശ്ശേരി സ്വദേശികളായ നാലുപേരും എറണാകുളം സ്വദേശിയായ ഒരാളും പേരും വിവരവും അറിയാത്ത ഒരാളുമാണ് ലിസ്റ്റിലുള്ളത്.
എൻഐഎ കൊച്ചി ഓഫീസില്‍ രജിസ്റ്റര്‍ ചെയ്ത പിഎഫ്‌ഐ കേസിലെ പ്രതികളാണിവര്‍.
പട്ടാമ്ബി ഞാങ്ങാട്ടിരി കിഴക്കേക്കര അബ്ദുള്‍ റഷീദ് (32), ചെര്‍പ്പുളശ്ശേരി നെല്ലായ പട്ടിശ്ശേരി മാരായമംഗലം സൗത്ത് കണ്ണീര്‍പള്ളിയാലില്‍ മുഹമ്മദാലി (42), കൂറ്റനാട് വാവന്നൂര്‍ ചാലിപ്പുറം കട്ടില്‍മാടം മാവറ വീട്ടില്‍ ഷാഹുല്‍ ഹമീദ് (54), മേലെ പട്ടാമ്ബി തെക്കുമുറി ജുമാമസ്ജിദിന് സമീപം ഇട്ടിലത്തൊടിയില്‍ മുഹമ്മദ് മൻസൂര്‍ (41), എറണാകുളം പറവൂര്‍ മുപ്പത്തടം എലൂര്‍ക്കര വാടക്കെയില്‍ അബ്ദുള്‍ വഹാബ് (36), പേരുവിവരങ്ങള്‍ ലഭിക്കാത്ത മറ്റൊരാള്‍ എന്നിവരാണ് കേസിലെ പിടികിട്ടാപ്പുള്ളികള്‍.
ഷൊര്‍ണൂര്‍ റെയില്‍വേ സ്റ്റേഷനിലെ വിവിധ ഭാഗങ്ങളില്‍ ഫോട്ടോയും വിവരങ്ങളും പ്രതിഫലത്തുകയും രേഖപ്പെടുത്തിയ പോസ്റ്ററുകള്‍ പതിച്ചിട്ടുണ്ട്. പേരും വിവരവും ലഭ്യമാകാത്തയാളെക്കുറിച്ച്‌ വിവരം നല്‍കുന്നവര്‍ക്ക് ഏഴുലക്ഷം രൂപയാണ് പ്രതിഫലം.
എറണാകുളം സ്വദേശി അബ്ദുള്‍ വഹാബിനെക്കുറിച്ചും പട്ടാമ്ബി ഞാങ്ങാട്ടിരി സ്വദേശി അബ്ദുള്‍റഷീദിനെക്കുറിച്ചും വിവരം നല്‍കുന്നവര്‍ക്ക് അഞ്ചുലക്ഷം വീതവും മറ്റുള്ളവരെക്കുറിച്ച്‌ വിവരം നല്‍കുന്നവര്‍ക്ക് മൂന്നുലക്ഷം വീതവുമാണ് പ്രതിഫലം ലഭിക്കുക.പ്രതികളെക്കുറിച്ച്‌ വിവരം നല്‍കുന്നവരുടെ വിവരങ്ങള്‍ രഹസ്യമായി സൂക്ഷിക്കുമെന്നും വ്യക്തമാക്കിയിട്ടുണ്ട്.
എൻഐഎ കൊച്ചി ഓഫീസിലെ ഫോണ്‍ നമ്ബറും നല്‍കിയിട്ടുണ്ട്. എൻഐഎ സംഘമെത്തിയാണ് പോസ്റ്ററുകള്‍ പതിച്ചതെന്ന് റെയില്‍വേ സുരക്ഷാസേന അധികൃതര്‍ പറഞ്ഞു.
ഒരു അഭിപ്രായം പോസ്റ്റ് ചെയ്യൂ