മലയിൻകീഴില്‍ പതിനഞ്ചുകാരനെ ക്രൂരമായി വാഹനമിടിച്ച്‌ കൊലപ്പെടുത്തിയ പ്രതി പ്രിയരഞ്ജൻ കൃത്യത്തിന് ശേഷം സുഹൃത്തിനെ വിളിച്ച്‌ ആത്മഹത്യ ചെയ്യാൻ പോവുകയാണെന്ന് പറഞ്ഞതായി കൊല്ലപ്പെട്ട ആദിശേഖറിന്റെ ഇളയച്ഛൻ. ഒരു മാധ്യമത്തിന് നല്‍കിയ അഭിമുഖത്തിലായിരുന്നു അദ്ദേഹം ഇക്കാര്യം പ്രതികരിച്ചത്. പ്രിയരഞ്ജൻ നാട്ടില്‍ വെള്ളമടിച്ചു കറങ്ങി നടക്കുന്ന ആളെന്നാണ് പറഞ്ഞു കേട്ടത്. ജോലിയൊന്നുമില്ല. ആദ്യം ഈ മരണം കൊലപാതകമാണെന്നു വിചാരിച്ചില്ല.
സിസിടിവി ദൃശ്യം കണ്ടപ്പോള്‍ ആണ് ഞെട്ടിപ്പോയത്. രണ്ടു മൂന്ന് ദിവസം ക്ഷേത്രത്തിനു മുമ്ബില്‍ പ്രതി കുട്ടിയെ കാത്തു നിന്നിരുന്നു. നാട്ടില്‍ ഇയാള്‍ ആരുടെയോ കാല്‍ അടിച്ചൊടിച്ചെന്നു കേട്ടിട്ടുണ്ട്. പ്രിയരഞ്ജന് ഈ അടുത്ത കാലത്തായി അധികം സാമ്ബത്തിക സ്ഥിതിയുണ്ട്. അത് എങ്ങനെയാണെന്ന് അറിയില്ല. ജോലിയില്ലാതെ നാട്ടില്‍ വെറുതെ നടക്കുന്നതാണ് പതിവ്. ഭാര്യ ഗള്‍ഫിലാണ്. ഇയാളും ഇടക്കിടയ്ക്ക് ഗള്‍ഫില്‍ പോകാറുണ്ട്.
ആദിയെ കൊലപ്പെടുത്തിയ ശേഷം ഇയാള്‍ സുഹൃത്തിനെ വിളിച്ച്‌ താൻ ആത്മഹത്യ ചെയ്യുകയാണെന്നും പറഞ്ഞു. പിന്നീട് മൊബൈല്‍ സ്വിച്ച്‌ ഓഫ് ചെയ്തു കാര്‍ ലോക് ചെയ്ത ശേഷം ഓട്ടോയില്‍ രക്ഷപ്പെട്ടതായാണ് അറിയാൻ കഴിഞ്ഞത്. ആദിശേഖര്‍ മിടുക്കനായ ഒരു കുട്ടിയായിരുന്നു. എല്ലാവര്‍ക്കും മാതൃകയായിരുന്നു അവൻ. പഠനത്തിലും കലയിലും പെരുമാറ്റത്തിലും മിടുക്കനാണെന്നും ഇളയച്ഛൻ പറഞ്ഞു. കൃത്യം നടത്തുമ്ബോള്‍ ഇയാള്‍ മദ്യപിച്ചിരുന്നതായി സ്ഥലത്തുണ്ടായിരുന്നവര്‍ പൊലീസിനു വിവരം നല്‍കിയിരുന്നു. കാര്‍ പിന്നീട് പേയാടിന് സമീപം ഉപേക്ഷിച്ച നിലയില്‍ കണ്ടെത്തി.
അപകടത്തിനു മുൻപ് പ്രിയരഞ്ജൻ ക്ഷേത്രത്തിനു മുന്നില്‍ മൂത്രം ഒഴിച്ചിരുന്നു. ഇതു ചോദ്യം ചെയ്ത കുട്ടിയോട് പ്രിയരഞ്ജൻ കയര്‍ത്തു. ഇതിലുള്ള വൈരാഗ്യമാണ്കൊലയ്ക്ക് പിന്നിലെന്നാണ് ബന്ധുക്കളുടെ മൊഴി. സിസിടിവി ദൃശ്യങ്ങളില്‍ നിന്നും മനഃപൂര്‍വമാണ് കാര്‍ ഇടിപ്പിച്ചതെന്ന് വ്യക്തമാണ്. കഴിഞ്ഞ മാസം 30നാണ് ആദിശേഖര്‍ കാര്‍ ഇടിച്ചു മരിക്കുന്നത്.
വൈകിട്ട് അഞ്ചുമണിക്ക് സൈക്കിള്‍ ചവിട്ടുകയായിരുന്ന ആദിശേഖറിനെ തൊട്ടടുത്ത് നിര്‍ത്തിയിരുന്ന കാര്‍ അമിത വേഗതയില്‍ എത്തി ഇടിക്കുകയായിരുന്നു. കുട്ടിയുടെ ശരീരത്തിലൂടെ കാര്‍ കയറിയിറങ്ങി. പ്രതി പ്രിയ രഞ്ജനാണ് കാറോടിച്ചിരുന്നത്. ഇയാള്‍ക്കെതിരെ പൊലീസ് മനഃപൂര്‍വമല്ലാത്ത നരഹത്യക്കാണ് ആദ്യം കേസെടുത്തത്. പിന്നീട് സിസിടിവി ദൃശ്യങ്ങളുടെ അടിസ്ഥാനത്തില്‍ കുറ്റകരമായ നരഹത്യയ്ക്ക് ഐപിസി 304 ചുമത്തി.കുട്ടിയെ ഇടിച്ച ശേഷം കുറച്ചകലെ കാര്‍ നിര്‍ത്തിയ പ്രതി അമിത വേഗത്തില്‍ സ്ഥലത്തു നിന്ന് രക്ഷപ്പെട്ടു. അതേ സമയം വിദേശത്ത് ജോലി ചെയ്യുന്ന ഭാര്യക്ക് അടുത്തേക്ക് പ്രതി രക്ഷപ്പെട്ടതാണ് നാട്ടുകാര്‍ പറയുന്നത്. ആദിശേഖര്‍ കാട്ടാക്കട ചിന്മയ മിഷൻ സ്‌കൂളിലെ പത്താംക്ലാസ് വിദ്യാര്‍ത്ഥിയായിരുന്നു. പുളിങ്കോട് ക്ഷേത്രത്തിന് മുൻവശത്തായിരുന്നു അപകടം. അപകടത്തിന് 15 മിനിറ്റ് മുമ്ബ് പ്രിയരജ്ഞൻ സംഭവസ്ഥലത്തെത്തി കാറില്‍ കാത്തിരുന്നു.
സൈക്കിളുമായി ആദിശേഖര്‍ റോഡിലെത്തിയെന്ന് ഉറപ്പായ ശേഷം കാര്‍ മുന്നോട്ടെടുത്ത് ശരീരത്തിലൂടെ കയറ്റിയിറക്കുകയായിരുന്നു. ക്ഷേത്രപരിസരത്ത് മൂത്രം ഒഴിച്ചത് ചോദ്യം ചെയ്തതിന്റെ വൈരാഗ്യത്തിലാണ് കൊലപാതകമെന്ന് മാതാപിതാക്കള്‍ പരാതി നല്‍കിയ പരാതിയില്‍ പറയുന്നുണ്ട്.
സി സി ടിവി ദൃശ്യങ്ങള്‍ പരിശോധിക്കുമ്ബോള്‍ മനപ്പൂര്‍വം ഇടിച്ച്‌ വീഴ്‌ത്തിയതെന്നത് വ്യക്തമാകുന്നുമുണ്ട്.
പൂവച്ചല്‍ സ്വദേശിയായ പ്രിയരഞ്ജൻ നാലാഞ്ചിറയിലാണു താമസിക്കുന്നത്. വിദേശത്തുള്ള ഭാര്യ വിവരം അറിഞ്ഞു നാട്ടില്‍ എത്തിയിരുന്നു. സംഭവം ഒതുക്കിത്തീര്‍ക്കാൻ ഉന്നതതല നീക്കം നടക്കുന്നതായും ആരോപണം ഉണ്ട്. പ്രിയരഞ്ജൻ കുടുംബത്തോടൊപ്പം നാടുവിട്ടതായാണു സൂചന. മൊബൈല്‍ ഫോണ്‍ സ്വിച്ച്‌ഡ് ഓഫാണ്. ഒന്നര മാസം മുൻപ് പ്രിയരഞ്ജൻ ഉള്‍പ്പെടുന്ന സംഘത്തെ ലഹരിമരുന്നായ എംഡിഎംഎയുമായി എക്സൈസ് പിടികൂടിയതായും ഉന്നത ഇടപെടലിനെ തുടര്‍ന്നു തടിയൂരിയതായും പൊലീസിനു വിവരം ലഭിച്ചു.
ഒരു അഭിപ്രായം പോസ്റ്റ് ചെയ്യൂ