ഏറെ വിവാദമായ മുട്ടില്‍ മരംമുറി കേസില്‍ എട്ടുകോടിയോളം രൂപ പിഴ ഈടാക്കാനുള്ള നടപടികളുമായി സര്‍ക്കാര്‍. സര്‍ക്കാരില്‍ നിക്ഷിപ്തമായ വീട്ടി മരങ്ങള്‍ മുറിച്ച വകയിലുണ്ടായ നഷ്ടം നികത്താനാണ് പിഴ ഈടാക്കുന്നത്.
കേരള ലാൻഡ് കണ്‍സര്‍വൻസി ആക്‌ട് പ്രകാരമാണ് നടപടി സ്വീകരിച്ചിരിക്കുന്നത്.
35 കേസുകളിലായാണ് എട്ടുകോടിയോളം രൂപ പിഴ ചുമത്തിയിരിക്കുന്നത്. മുഖ്യ പ്രതികളിലൊരാളായ വയനാട് വാഴവറ്റ സ്വദേശി റോജി അഗസ്റ്റിൻ ഉള്‍പ്പെടെ 35 പേര്‍ പിഴയൊടുക്കണം. മുറിച്ച്‌ കടത്തിയ മരത്തിന്‍റെ മൂന്നിരട്ടിവരെയാണ് പിഴ കണക്കാക്കിയിരിക്കുന്നത്. ഒരു മാസത്തിനകം തുക അടയ്ക്കണമെന്നാണ് നോട്ടീസില്‍ നിര്‍ദേശം. അല്ലെങ്കില്‍ സ്വത്ത് കണ്ടുകെട്ടല്‍ നടപടി ആരംഭിക്കുമെന്നു മുന്നറിയിപ്പുമുണ്ട്.
നിരവധി കര്‍ഷകരുടെ ഭൂമിയില്‍നിന്നു മുഖ്യ പ്രതികള്‍ ഇടപെട്ട് വീട്ടിമരം മുറിച്ചിരുന്നു. ഈ കര്‍ഷകര്‍ക്കും നോട്ടീസ് ലഭിച്ചിട്ടുണ്ട്. തങ്ങളെ തെറ്റിദ്ധരിപ്പിച്ച്‌ നിസാര വിലയ്ക്കാണ് മുഖ്യപ്രതികള്‍ മരം മുറിച്ചതെന്ന് പല കര്‍ഷകരും ആരോപിച്ചിരുന്നു. കേസില്‍കുടുങ്ങിയതിനു പിന്നാലെ ലക്ഷങ്ങള്‍ പിഴ അടയ്ക്കണമെന്ന് നോട്ടീസ് ലഭിക്കുക കൂടി ചെയ്തതോടെ കര്‍ഷകരാകെ ആശങ്കയിലാണ്.
മരങ്ങളുടെ വില നിര്‍ണയ സര്‍ട്ടിഫിക്കറ്റ് വനംവകുപ്പ് ലഭ്യമാക്കിയ കേസുകളിലാണ് കേരള ലാൻഡ് കണ്‍സര്‍വൻസി നിയമപ്രകാരം റവന്യൂ അധികൃതര്‍ നോട്ടീസ് അയച്ചു തുടങ്ങിയിരിക്കുന്നത്. പട്ടയ ഭൂമിയില്‍നിന്നു നിയമവിരുദ്ധമായി മുറിച്ച മരങ്ങളുടെ വിലയും ഇതിന്‍റെ മൂന്നിരട്ടിവരെ പിഴയും അടയ്ക്കണമെന്നാണ് നോട്ടീസില്‍ പറയുന്നത്. മുട്ടില്‍ സൗത്ത് വില്ലേജിലെ കരിങ്കണ്ണിക്കുന്ന്, വാഴവറ്റ പ്രദേശങ്ങളിലുള്ള 30 ഓളം കര്‍ഷകര്‍ക്ക് നിലവില്‍ നോട്ടീസ് ല ഭിച്ചിട്ടുണ്ട്. നോട്ടീസ് പ്രകാരമുള്ള മരവിലയും പിഴയും അടയ്ക്കാൻ കഴിയാത്ത അവസ്ഥയിലാണ് കര്‍ഷകരെല്ലാംതന്നെ. അത്യാവശ്യങ്ങള്‍ മുൻനിര്‍ത്തിയാണ് പലരും മരങ്ങള്‍ വിറ്റത്. ഇവരില്‍ ചിലര്‍ക്ക് അഡ്വാൻസ് മാത്രമാണ് ലഭിച്ചത്. നോട്ടീസ് പ്രകാരമുള്ള തുക എങ്ങനെ അടയ്ക്കുമെന്ന ആശങ്കയിലാണ് കര്‍ഷകര്‍.
മരംമുറിയ്ക്കാനിടയാക്കിയ സാഹചര്യം അധികൃതര്‍ക്ക് വ്യക്തമായി അറിയാമെന്നിരിക്കെ നിരപരാധികളായ കര്‍ഷകരെ റവന്യൂ അധികൃതര്‍ ദ്രോഹിക്കുകയാണെന്ന ആരോപണവുമായികര്‍ഷക സംഘടനകള്‍ രംഗത്തുവന്നിട്ടുണ്ട്. റവന്യൂ പട്ടയഭൂമിയിലെ വീട്ടി മരങ്ങള്‍ മുറിക്കാൻ സര്‍ക്കാര്‍ അനുമതിയുണ്ടെന്ന് മരം വ്യാപാരികളില്‍ ചിലരാണ് കര്‍ഷകരെ തെറ്റിദ്ധരിപ്പിച്ചത്.
വൈത്തിരി താലൂക്കില്‍ 61 ഉം സുല്‍ത്താൻ ബത്തേരി താലൂക്കില്‍ 14 ഉം അനധികൃത മരംമുറി കേസുകളാണ് റവന്യൂ വകുപ്പ് കണ്ടെത്തിയത്. രണ്ട് താലൂക്കുകളിലുമായി മുറിച്ചതില്‍ 186 മരങ്ങള്‍ വനം വകുപ്പ് കസ്റ്റഡിയിലെടുത്ത് കുപ്പാടി വനം വകുപ്പ് ഡിപ്പോയിലേക്ക് മാറ്റിയിരുന്നു.
ഒരു അഭിപ്രായം പോസ്റ്റ് ചെയ്യൂ