അറിയിപ്പ്, ജോലി ഒഴിവ്, വിദ്യാഭ്യാസം, സ്കോളർഷിപ്, അപേക്ഷ ക്ഷണിച്ചു, പട്ടയ കേസ്, വിവിധ വായ്പാ പദ്ധതികൾ

കണ്ണൂർ >

ദേശീയ കൈത്തറി ദിനം

ദേശീയ കൈത്തറി ദിനാഘോഷത്തിന്റെ ഭാഗമായി ആഗസ്ത് ഏഴിന്  ജില്ലയില്‍ വിവിധ പരിപാടികള്‍ നടക്കും. ഓണ്‍ലൈനായി നടക്കുന്ന പരിപാടി വൈകിട്ട് മൂന്നിന്  കെ സുധാകരന്‍ എം പി ഉദ്ഘാടനം ചെയ്യും. മേയര്‍ അഡ്വ ടി ഒ മോഹനന്‍, രാമചന്ദ്രന്‍ കടന്നപ്പള്ളി എം എല്‍ എ, ജില്ലാ പഞ്ചായത്ത് പ്രസിഡണ്ട് പി പി ദിവ്യ, ജില്ലാ കളക്ടര്‍ ടി വി സുഭാഷ് എന്നിവര്‍ പങ്കെടുക്കും.

കൊവിഡ് മരണം; പട്ടികജാതിക്കാര്‍ക്ക് വായ്പാ പദ്ധതി

കൊവിഡ് മൂലം മരണമടഞ്ഞ പട്ടികജാതിയില്‍പ്പെട്ടവരുടെ ആശ്രിതര്‍ക്കായി സംസ്ഥാന പട്ടികജാതി-പട്ടികവര്‍ഗ്ഗ വികസന കോര്‍പ്പറേഷന്‍ നടപ്പാക്കുന്ന പ്രത്യേക വായ്പാ പദ്ധതിയിലേക്ക് അപേക്ഷ ക്ഷണിച്ചു. മുഖ്യ വരുമാനദായകന്റെ മരണം മൂലം ഉപജീവനമാര്‍ഗ്ഗമില്ലാതായ കുടുംബങ്ങളിലെ തൊട്ടടുത്ത ആശ്രിതന് വായ്പക്ക് അപേക്ഷിക്കാം.  കേന്ദ്ര സാമൂഹിക നീതി ശാക്തീകരണ മന്ത്രാലയത്തിന്റെ ആഭിമുഖ്യത്തില്‍ രൂപം നല്‍കിയ വായ്പാ പദ്ധതി ദേശീയ പട്ടികജാതി ധനകാര്യ വികസന കോര്‍പറേഷന്റെ വായ്പയും, നിശ്ചിത നിരക്കില്‍ നല്‍കുന്ന സബ്സിഡിയും സമന്വയിപ്പിച്ചാണ് നടപ്പാക്കുന്നത്. 
മരണമടഞ്ഞയാള്‍ കുടുംബത്തിന്റെ മുഖ്യ വരുമാനദായകനാണെങ്കില്‍ അയാളുടെ പരമാവധി അഞ്ചു ലക്ഷം രൂപ വരെ മുതല്‍ മുടക്ക് ആവശ്യമുള്ള സ്വയംതൊഴില്‍ സംരംഭങ്ങള്‍ ക്കാണ് വായപ. വായ്പയുടെ 20 ശതമാനം അല്ലെങ്കില്‍ ഒരു ലക്ഷം രൂപ ഇതില്‍ കുറഞ്ഞത് ഏതാണോ അതിനെ സബ്സിഡിയായി കണക്കാക്കും. ആറു ശതമാനമാണ് പലിശ നിരക്ക് . മരിച്ചയാളിന്റെ പ്രായം 18 നും 60 മധ്യേ ആയിരിക്കണം. അപേക്ഷകന്റെ കുടുംബ വാര്‍ഷിക വരുമാനം മൂന്നു ലക്ഷം  രൂപയില്‍ കവിയരുത്. അപേക്ഷയോടൊപ്പം കൊവിഡ് മൂലമാണ് മരിച്ചത് എന്നു തെളിയിക്കുന്ന രേഖകള്‍, വായ്പാ തുകക്ക് കോര്‍പറേഷന്റെ നിബന്ധനകള്‍ക്കനുസരിച്ച്  ആവശ്യമായ  ഉദ്യോഗസ്ഥ ജാമ്യം/വസ്തു ജാമ്യം എന്നിവ ഹാജരാക്കണം. അപേക്ഷ പട്ടികജാതി-പട്ടികവര്‍ഗ്ഗ വികസന കോര്‍പറേഷന്റെ ജില്ലാ ഓഫീസില്‍ ആഗസ്ത് 10നകം സമര്‍പ്പിക്കണം. ഫോണ്‍: 0497 2705036, 8921158858.                                                                       

വിദ്യാഭ്യാസ ആനുകൂല്യം നല്‍കുന്നു

മത്സ്യത്തൊഴിലാളികളുടെ മക്കള്‍ക്കുളള 2021-22 അധ്യയന വര്‍ഷത്തെ പ്രീമെട്രിക്, ഐ ടി ഐ വിദ്യാഭ്യാസ ആനുകൂല്യത്തിന് അപേക്ഷ ക്ഷണിച്ചു. അപേക്ഷാ ഫോം ഫിഷറീസ് ഡെപ്യൂട്ടി ഡയറക്ടറുടെ കാര്യാലയത്തില്‍ ലഭിക്കും. പൂരിപ്പിച്ച അപേക്ഷ മത്സ്യത്തൊഴിലാളി സാക്ഷ്യപത്രം സഹിതം ജില്ലാ ഫിഷറീസ് ഡെപ്യൂട്ടി ഡയറക്ടറുടെ ഓഫീസില്‍ ആഗസ്ത് 31 നകം സമര്‍പ്പിക്കണം. അപേക്ഷയില്‍ സ്‌കൂളിന്റെ ഡി ഡി ഒ കോഡ്, ഫോണ്‍ നമ്പര്‍, സ്ഥാപന മേധാവിയുടെ മൊബൈല്‍ നമ്പര്‍ എന്നിവ നിര്‍ബന്ധമായും രേഖപ്പെടുത്തണം. സര്‍ക്കാര്‍/എയ്ഡഡ് സ്‌കൂളില്‍ പഠിക്കുന്ന വിദ്യാര്‍ഥികളുടെ അപേക്ഷകള്‍ ബന്ധപ്പെട്ട സ്ഥാപന മേധാവിയുടെയും, അണ്‍ എയ്ഡഡ് സ്‌കൂളിലെ വിദ്യാര്‍ഥികളുടെ അപേക്ഷകള്‍ എ ഇ ഒ/ ഡി ഇ ഒ യുടെയും ശുപാര്‍ശയോടു കൂടി സമര്‍പ്പിക്കണം. ഫോണ്‍ 0497 2731081.

മത്സ്യത്തൊഴിലാളികള്‍ ജാഗ്രത പാലിക്കണം

വിഴിഞ്ഞം മുതല്‍ കാസര്‍കോട് വരെയുള്ള കേരളാ തീരത്ത് വെള്ളിയാഴ്ച(ആഗസ്ത് 6) ഉയര്‍ന്ന തിരമാലക്ക് സാധ്യതയുള്ളതിനാല്‍ മത്സ്യത്തൊഴിലാളികള്‍ ജാഗ്രത പാലിക്കണം. 

മദ്രസാധ്യാപക  ക്ഷേമനിധി;
അംശദായം സബ് പോസ്റ്റോഫീസുകള്‍ വഴി അടക്കണം

കേരള മദ്രസാധ്യാപക ക്ഷേമനിധി ബോര്‍ഡ് അംഗങ്ങളുടെ അംശദായം സബ് പോസ്റ്റോഫീസുകള്‍ വഴി ഓണ്‍ലൈനായാണ് സ്വീകരിക്കുന്നതെന്ന് ചെയര്‍മാന്‍ അറിയിച്ചു. ക്ഷേമനിധിയില്‍ അംശദായം അടക്കുന്നതിനും മറ്റുമായി കമ്മീഷനായി ചിലര്‍ വലിയ തുകകള്‍ വാങ്ങുന്നത് ശ്രദ്ധയില്‍പ്പെട്ടിട്ടുണ്ട്.  ഓഫീസ് നേരിട്ട് അംശദായം സ്വീകരിക്കില്ലെന്നും അംശദായം സ്വീകരിക്കുന്നതിന് ഏതെങ്കിലും വ്യക്തികളെയോ യൂണിയനുകളെയോ ഏജന്‍സികളെയോ ഏല്‍പ്പിച്ചിട്ടില്ലെന്നും അദ്ദേഹം അറിയിച്ചു. പ്രതിമാസം 100 രൂപ നിരക്കില്‍ വര്‍ഷത്തില്‍ ഒന്നിച്ചോ തവണകളായോ അടക്കാം.

അപേക്ഷ ക്ഷണിച്ചു

കര്‍ഷക തൊഴിലാളി ക്ഷേമനിധിയില്‍ അംഗങ്ങളായ തൊഴിലാളികളുടെ മക്കളില്‍ 2020-21 അധ്യയന വര്‍ഷം കേരള സിലബസില്‍ ആദ്യ അവസരത്തില്‍ എസ് എസ് എല്‍ സി/ടി എച്ച് എസ് എല്‍ സി പരീക്ഷയില്‍ 80 ശതമാനത്തില്‍ കുറയാത്ത മാര്‍ക്ക് നേടിയവര്‍ക്കും ഹയര്‍ സെക്കണ്ടറി/വൊക്കേഷണല്‍ ഹയര്‍ സെക്കണ്ടറി അവസാന വര്‍ഷ പരീക്ഷയില്‍ 90 ശതമാനത്തില്‍ കുറയാത്ത മാര്‍ക്ക് നേടിയവര്‍ക്കും വിദ്യാഭ്യാസ ധനസഹായം നല്‍കുന്നതിന് അപേക്ഷ ക്ഷണിച്ചു.  നിര്‍ദ്ദിഷ്ട ഫോറത്തിലുള്ള അപേക്ഷ ആഗസ്ത് 31 ന് വൈകിട്ട് മൂന്ന് മണിക്കകം ക്ഷേമനിധി ഓഫീസില്‍ ലഭിക്കണം.  അപേക്ഷാ ഫോറം www.agriworkersfund.org ല്‍ ലഭിക്കും.  ഫോണ്‍: 0497 2712549.

തീയതി നീട്ടി

ഐഎച്ച്ആര്‍ഡിയുടെ കീഴില്‍ എറണാകുളം, ചെങ്ങന്നൂര്‍, അടൂര്‍, കരുനാഗപ്പള്ളി, കല്ലൂപ്പാറ, ചേര്‍ത്തല എന്നിവിടങ്ങളില്‍ പ്രവര്‍ത്തിക്കുന്ന ആറ് എഞ്ചിനീയറിംഗ് കോളേജുകളിലേക്ക് 2021-22 അധ്യയന വര്‍ഷത്തില്‍ എന്‍ ആര്‍ ഐ സീറ്റുകളില്‍ ഓണ്‍ലൈന്‍ വഴി അപേക്ഷിക്കാനുള്ള കാലാവധി ആഗസ്ത് ഒമ്പത് വൈകിട്ട് അഞ്ചു മണി വരെ നീട്ടി. ഓണ്‍ലൈനായി സമര്‍പ്പിച്ച അപേക്ഷയുടെ പകര്‍പ്പും അനുബന്ധങ്ങളും അതത് കോളേജുകളില്‍ ആഗസ്ത് 11ന് വൈകിട്ട് അഞ്ചു മണി വരെ സമര്‍പ്പിക്കാം. അപേക്ഷ www.ihrd.kerala.gov.in/enggnri എന്ന വെബ്സൈറ്റ് അല്ലെങ്കില്‍ കോളേജുകളുടെ വെബ്സൈറ്റ് വഴി (പ്രോസ്പെക്ടസ് പ്രകാരമുള്ള) ഓണ്‍ലൈനായി സമര്‍പ്പിക്കണം. വിശദവിവരങ്ങള്‍ www.ihrd.ac.in, ihrd.itd@gmail.com എന്ന ഇമെയിലിലോ ലഭിക്കും.

അപേക്ഷ ക്ഷണിച്ചു

സ്റ്റേറ്റ് റിസോഴ്സ് സെന്ററിന്റെ എസ് ആര്‍ സി കമ്മ്യൂണിറ്റി കോളേജ് യോഗ അസോസിയേഷന്‍ ഓഫ് കേരളയുടെ സഹകരണത്തോടെ ജൂലൈയില്‍ ആരംഭിക്കുന്ന ഡിപ്ലോമ ഇന്‍ യോഗ ടീച്ചര്‍ ട്രെയിനിംഗ് പ്രോഗ്രാമിലേക്ക് അപേക്ഷ ക്ഷണിച്ചു. യോഗ്യത പ്ലസ് ടു അല്ലെങ്കില്‍ തത്തുല്യം. അപേക്ഷകര്‍ 18 വയസ് പൂര്‍ത്തിയാക്കിയിരിക്കണം. ഉയര്‍ന്ന പ്രായപരിധിയില്ല. കോളേജ് നടത്തുന്ന സര്‍ട്ടിഫിക്കറ്റ് ഇന്‍ യോഗ വിജയകരമായി പൂര്‍ത്തിയാക്കിയവര്‍ക്ക് ഡിപ്ലോമ പ്രോഗ്രാമിന്റെ രണ്ടാം സെമസ്റ്ററില്‍ അഡ്മിഷന്‍ എടുക്കാം.
അപേക്ഷാ ഫോറവും പ്രോസ്‌പെക്ടസും തിരുവനന്തപുരത്ത് നന്ദാവനം പോലീസ് ക്യാമ്പിന് സമീപമുള്ള എസ് ആര്‍ സി ഓഫീസില്‍ നിന്നോ https://srccc.in/ എന്ന ലിങ്കില്‍ നിന്നോ ലഭിക്കും. പൂരിപ്പിച്ച അപേക്ഷകള്‍ ആഗസ്ത് 31 നകം ഡയറക്ടര്‍, സ്റ്റേറ്റ് റിസോഴ്‌സ് സെന്റര്‍, നന്ദാവനം, വികാസ് ഭവന്‍ പി ഒ, തിരുവനന്തപുരം-33 എന്ന വിലാസത്തില്‍ ലഭിക്കണം. വിശദവിവരങ്ങള്‍ക്ക് www.srccc.in എന്ന വെബ്‌സൈറ്റ് സന്ദര്‍ശിക്കുക. ഫോണ്‍ 0471 2325101, 2325102, 8281114464. കണ്ണൂര്‍ : 7560899201, 9387291438.

പ്രാദേശിക അവധി

ആറളം ഗ്രാമപഞ്ചായത്ത് പത്താം വാര്‍ഡ് വീര്‍പ്പാട് നിയോജക മണ്ഡലം ഉപതെരഞ്ഞെടുപ്പ് ദിവസമായ ആഗസ്ത് 11 ന് മണ്ഡല പരിധിയിലെ സര്‍ക്കാര്‍ ഓഫീസുകള്‍ക്കും                      വിദ്യാഭ്യാസ സ്ഥാപനങ്ങള്‍ക്കും ജില്ലാ കലക്ടര്‍ പ്രാദേശിക അവധി പ്രഖ്യാപിച്ചു.