കണ്ണൂർ/ ഇരിട്ടി
കയറിപ്പോ... അവിടെ ഇറങ്ങല്ലേ മക്കളെ... കണ്‍മുന്നില്‍ രണ്ട് പെണ്‍കുട്ടികള്‍ പുഴയിലിറങ്ങുന്നത് കണ്ട് മീൻപിടിക്കുകയായിരുന്ന പടിയൂരിലെ മുഹമ്മദലിയും ജബ്ബാറും പലതവണ അലറിവിളിച്ചു.
പഴശ്ശി പദ്ധതിയുടെ ഭാഗമായ പടിയൂർ പൂവ്വം പുഴയില്‍ സഹപാഠികളായ ഷഹർബാനയും (28) സൂര്യയും (23) കണ്‍മുന്നില്‍ ഒഴുകിപ്പോകുന്നതുകണ്ട വേദന പങ്കുവെക്കുകയായിരുന്നു ഇരുവരും.
ഇവർ മീൻപിടിക്കുന്നതിന് 200 മീറ്റർ അകലെയാണ് ഇരുവരും കളിക്കാനിറങ്ങിയത്. കുഴപ്പമില്ല ഞങ്ങള്‍ മുങ്ങില്ല. മറുപടി പറഞ്ഞ് ഏതാനും നിമിഷങ്ങള്‍ക്കുള്ളില്‍ തന്നെ ഇരുവരും ഒഴുക്കില്‍പ്പെടുകയായിരുന്നു. ആർത്തലച്ചുവരുന്ന ഒഴുക്കില്‍ ഒന്നുരണ്ടുതവണ ഒരാള്‍ മുങ്ങിത്താഴുന്നത് മുഹമ്മദലിയും ജബ്ബാറും കണ്ടെങ്കിലും നിമിഷങ്ങള്‍ക്കുള്ളില്‍ ചുഴിയില്‍പ്പെട്ട് അപ്രത്യക്ഷമായി. രണ്ടാമതൊരു കുട്ടി അല്പനിമിഷത്തിനുള്ളില്‍ ഇവർ വിരിച്ച വലയില്‍ കുടുങ്ങിയെങ്കിലും കൈയെത്തും അകലെവെച്ച്‌ ചുഴിയിലേക്ക് താഴുകയായിരുന്നുവെന്ന് മുഹമ്മദലി പറഞ്ഞു.
ഒരുമണിക്കൂറോളം പുഴക്കരയിലൂടെ നടന്ന് പുഴയുടെ ഭംഗി മൊബൈലില്‍ പകർത്തിയും സെല്‍ഫിയെടുത്തുമാണ് സൂര്യയും ഷഹർബാനയും പുഴയിലേക്ക് ഇറങ്ങിയത്. സഹപാഠിയായ പടിയൂരിലെ ജസീനയുടെ വീട്ടിലെത്തിയതായിരുന്നു ഇരുവരും. പുഴയില്‍ ഇറങ്ങി ഇരുവരും വെള്ളം കോരി കളിക്കുമ്ബോള്‍ ജസീന പുഴക്കരയിലുണ്ടായിരുന്നു. കണ്‍മുന്നില്‍ സഹപാഠികള്‍ മുങ്ങിത്താഴുമ്ബോള്‍ അലറിവിളിക്കാൻ പോലും കഴിയാത്ത വിധം ജസീന ബോധംകെട്ട് വീണു.
ഒരു അഭിപ്രായം പോസ്റ്റ് ചെയ്യൂ