കണ്ണൂർ
വൈസ് പ്രസിഡന്റ് പദവി രാജിവെച്ചിട്ടും തനിക്കെതിരെ നടക്കുന്ന സൈബർ ആക്രമണങ്ങള്‍ക്കെതിരെ നിയമനടപടികളുമായി യൂത്ത് കോണ്‍ഗ്രസ് വനിതാ നേതാവ്.
യൂത്ത് ലീഗ് പ്രവർത്തകനുമൊത്തുള്ള സ്വകാര്യ വീഡിയോ കോള്‍ ദൃശ്യങ്ങള്‍ വ്യാപകമായി പ്രചരിപ്പിക്കുന്നവർക്കെതിരെ നടപടി ആവശ്യപ്പെട്ടാണ് യുവതി കോടതിയെ സമീപിക്കുന്നത്. വൈസ് പ്രസിഡന്റ് സ്ഥാനം ഒഴിഞ്ഞിട്ടും സൈബർ ഇടങ്ങളില്‍ തനിക്കെതിരെ നടക്കുന്ന പ്രചാരണങ്ങള്‍ക്ക് കുറവില്ലെന്നും പൊലീസ് അന്വേഷണത്തില്‍ തൃപ്തിയില്ലെന്നും കാട്ടിയാണ് ഇവർ ഹൈക്കോടതിയെ സമീപിക്കുന്നത്.
വടക്കൻ കേരളത്തിലെ ഒരു തദ്ദേശഭരണ സ്ഥാപനത്തില്‍ യുവതിയായ വൈസ് പ്രസിഡന്റിന്റെ രാജി ആവശ്യപ്പെട്ട് സിപിഎം നേതൃത്വത്തിലുള്ള പ്രതിപക്ഷം നടത്തിയ സമരം ചർച്ചയായിരുന്നു. ലൈംഗിക അതിക്രമ കേസില്‍ ഇരയാണെങ്കിലും സമൂഹ മാധ്യമങ്ങളില്‍ അശ്ലീല പ്രചരണം നടക്കുന്ന സാഹചര്യത്തില്‍ ധാർമികത മുൻനിർത്തി ഇവർ സ്ഥാനം രാജിവെക്കണം എന്ന് ആവശ്യപ്പെട്ടായിരുന്നു സിപിഎം സമരം. സമരം ശക്തമായതോടെ സ്വന്തം പാർട്ടിയായ കോണ്‍ഗ്രസില്‍ നിന്നും സഖ്യകക്ഷിയായ ലീഗില്‍ നിന്നും സ്ഥാനം രാജിവയ്ക്കാൻ ഇവർക്ക് നിർദ്ദേശം കിട്ടി. തുടർന്നായിരുന്നു ഇവർ ഉപാധ്യക്ഷപദം ഒഴിഞ്ഞത്.
യുവതിയുടെ സ്വകാര്യ വീഡിയോ കോള്‍ ദൃശ്യങ്ങള്‍ പ്രചരിപ്പിച്ച കേസിലെ പ്രതി നിലവില്‍ വിദേശത്താണുള്ളത്. യൂത്ത് ലീഗ് പ്രവർത്തകനായ ഇയാള്‍ സൃഷ്ടിച്ച സന്ദേശം പ്രചരിപ്പിച്ച വ്യക്തികള്‍ക്കും ഗ്രൂപ്പുകള്‍ക്കുമെതിരെ പൊലീസ് അന്വേഷണം നടക്കുന്നുണ്ട്. സംഭവത്തില്‍ സംസ്ഥാന വനിതാ കമ്മീഷനും വനിതാ നേതാവ് പരാതി നല്‍കിയിട്ടുണ്ട്. അതേസമയം, സിപിഎം ആരോപണത്തില്‍ കഴമ്ബില്ലെന്നും വനിതാ നേതാവിന്റെ ഭാഗത്ത് പിഴവില്ലെന്നുമാണ് വിവാദം അന്വേഷിക്കാൻ കോണ്‍ഗ്രസ് നിയോഗിച്ച രണ്ടംഗ സമിതിയുടെ കണ്ടെത്തല്‍.
ഒരു അഭിപ്രായം പോസ്റ്റ് ചെയ്യൂ