പക്കയാണ് പരമേശ്വരൻ്റെ ഈ ചിക്കൻ പക്കാവട

പൂക്കോട്

എന്നും പൂക്കോട് നിന്ന് പാനൂർ ഭാഗത്തേക്ക് സഞ്ചരിക്കുമ്പോൾ പൂക്കോട് ടൗണിൽ നിന്ന് അൽപം മാറി ഒരാൾക്കൂട്ടം കാണാം. ഈ ആൾക്കൂട്ടമത്രയും ഇവിടെയെത്തിയത് പരമേശ്വരനെ തേടിയാണ്, പരമേശ്വരൻ്റെ ചിക്കൻ പക്കാവടക്കായി. ഒരു പക്കാ തമിഴ്നാട് സ്റ്റൈൽ ചിക്കൻ വറുത്തത്. അതും മിതമായ നിരക്കിൽ. ഈ രുചി തേടി ഇവിടെയെത്തുന്നവർക്ക് കുറച്ച് ക്ഷമയൊക്കെ ആവശ്യമാണ്. മൂന്ന് മണി മുതൽ തുടർച്ചയായി വറുത്തു കൊണ്ടിരിക്കുന്ന ചിക്കൻ പക്കാവടയുടെ വിപണനം രാത്രി 7.30 മണിയോടെ അവസാനിക്കും. ആവശ്യക്കാർ ഏറെയുള്ള ഈ ഐറ്റത്തിന് ശകലം കാത്തു നിൽക്കേണ്ടി വരും പലപ്പോഴും. എന്നാൽ ചുമ്മാതങ്ങ് നോക്കി നിൽക്കുകയും വേണ്ട. തമിഴ്നാടിൻ്റെ വിവിധ രുചി വിഭവങ്ങളായ കായ് ബജ്ജി, മുളക് ബജ്ജി, ഉഴുന്ന് വട, പരിപ്പ് വട തുടങ്ങി വിവിധ എണ്ണക്കടികൾ ചൂടോടെ പരമേശ്വരൻ്റെ ഭാര്യ ആനന്ദി തയാറാക്കുന്നുണ്ടാകും. രണ്ട് തരം ചട്ണിയും കൂട്ടി ഇതും ഒരു പിടി പിടിക്കാൻ അവസരമുണ്ട്. കൂടെ ഒന്നാന്തരം ഇഞ്ചി ചായയുമുണ്ട്. തമിഴ്നാട്ടിലെ കടലൂർ ജില്ലയിൽ നിന്ന് 23 വർഷം മുമ്പാണ് പരമേശ്വരൻ തലശേരിയിൽ എത്തിയത്. തലശേരിയിൽ താമസിച്ച് കോൺക്രീറ്റ് ജോലികൾ ചെയ്തു വന്ന പരമേശ്വരൻ ഒൻപത് വർഷം മുമ്പ് തൊഴിൽ കേന്ദ്രം പൂക്കോടേക്ക് മാറ്റി. തമിഴ്നാട്ടിലെ ചിലയിടങ്ങളിൽ വീടുകളിൽ ദീപാവലി, പൊങ്കൽ ഉൾപ്പെടെയുള്ള വിവിധ ആഘോഷ ദിവസങ്ങളിലും മറ്റും സ്ഥിരമായി ഉണ്ടാക്കാറുള്ള ഒരു വിഭമാണ് ചിക്കൻ പക്കാവട. വീടുകളിൽ ഉണ്ടാക്കിയാൽ അയൽവാസികൾക്കും കൊടുക്കുന്നത് പതിവാണ്. അങ്ങനെയാണ് പൂക്കോട് വാടക വീട്ടിൽ നിന്നുണ്ടാക്കിയ ചിക്കൻ പക്കാവട അയൽക്കാർക്കും നൽകുന്നത്. ഈ രുചി ഇഷ്ടപ്പെട്ടവരാണ് കട ആരംഭിക്കാൻ നിർദ്ദേശം നൽകിയത്. പകൽ മുഴുവൻ ചിക്കൻ പക്കാവടയുടെ കൂട്ടു തയാറാക്കലും മറ്റ് എണ്ണക്കടികൾക്കായുള്ള ഒരുക്കവുമാണ്. മൂന്ന് മണിയായാൽ ആരംഭിക്കുന്ന കടയിലേക്ക് പിന്നെ ആളുകളുടെ ഒഴുക്ക് തന്നെയാണ്. മക്കളായ ആർത്തികയും മുകേശ്വരനും വിദ്യാർഥികളാണ്. തമിഴ്നാട്ടിൽ പഠിക്കുന്ന അവർ അവധി ആഘോഷത്തിനായി ഇവിടേക്ക് വരാറുണ്ട്. ഇടയ്ക്ക് കടക്ക് അവധി നൽകി പരമേശ്വരനും ആനന്ദിയും നാട്ടിലേക്കും പോകും