കാഞ്ഞങ്ങാട്(കാസർകോട്)
കുട്ടികള്‍ ഓരോരുത്തരായി കുഴഞ്ഞുവീഴുന്നു. ശ്വാസം കിട്ടുന്നില്ലെന്ന് പറഞ്ഞ് കരയുന്നു.
ചിലർ ഛർദിച്ചു. പേടിച്ചും പകച്ചും നിന്നുപോയ നിമിഷങ്ങളെന്ന് അധ്യാപികമാർ. ദേഹാസ്വാസ്ഥ്യമനുഭവപ്പെട്ട കുട്ടികളെ വാരിയെടുത്ത് ആയമാരും അധ്യാപികമാരും ആസ്പത്രിയിലേക്കോടി. സ്ത്രീകളുടെയും കുട്ടികളുടെയും ആസ്പത്രിയുടെ തെക്കുപടിഞ്ഞാറെ മൂലയിലെ ജനറേറ്ററില്‍നിന്നുള്ള പുക ഹൊസ്ദുർഗ് ലിറ്റില്‍ ഫ്ളവർ ഹയർ സെക്കൻഡറി സ്കൂളിലേക്ക് പടർന്ന സമയത്തെ കാഴ്ചയായിരുന്നു ഇത്.
സ്കൂളിലേക്കും ആസ്പത്രികളിലേക്കും ആംബുലൻസുകള്‍ കുതിച്ചെത്തി. ജില്ലാ ആസ്പത്രിയില്‍നിന്നുള്ള ഡോക്ടർമാരെ കൂടിയെത്തിച്ച്‌ കുട്ടികള്‍ക്കുവേണ്ട ചികിത്സ നല്‍കി. ദേഹാസ്വാസ്ഥ്യമനുഭവപ്പെട്ട കുട്ടികളുടെ രക്ഷിതാക്കളെ വിവരമറിയിച്ചു. അടുത്തുള്ള വീടുകളിലെ രക്ഷിതാക്കള്‍ പെട്ടെന്നെത്തി. ആസ്പത്രിയിലെ അത്യാഹിതവിഭാഗത്തിലും വാർഡിലും അവരവരുടെ മക്കളെത്തേടിയുള്ള പരക്കംപാച്ചിലായിരുന്നു. കുട്ടികളുടെ അവസ്ഥ കണ്ട് അമ്മമാരും പൊട്ടിക്കരഞ്ഞു. ഒന്നോ രണ്ടോ മണിക്കൂറിനുള്ളില്‍ കുട്ടികള്‍ ആരോഗ്യം വീണ്ടെടുത്തു. പ്രശ്നങ്ങളൊന്നുമില്ലെന്ന് കണ്ട് സ്ത്രീകളുടെയും കുട്ടികളുടെയും ആസ്പത്രികളിലുള്ളവർ മൂന്നുമണിയോടെ വീടുകളിലേക്ക് മടങ്ങി. സ്കൂളിന് വെള്ളിയാഴ്ച അവധി നല്‍കി.
കളിച്ചും ചിരിച്ചുമെത്തി; പൊടുന്നനെ തളർന്നുവീണു
ആദ്യ രണ്ടു പീരിയഡ് കഴിഞ്ഞുള്ള ഇടവേളയ്ക്കുശേഷം തിരികെ ക്ലാസിലെത്തിയപ്പോഴാണ് സംഭവം. ക്ലാസില്‍ കയറുമ്ബോഴേ പുക പടരുന്നത് കുട്ടികള്‍ കണ്ടിരുന്നു. എന്നാല്‍ അതത്ര കാര്യമാക്കാതെ എല്ലാവരും ക്ലാസില്‍ കയറിയിരുന്നു. ഏതാനും മിനിട്ടുകള്‍ക്കുള്ളില്‍ പുക ക്ലാസിലാകെ പടർന്നു. മൂന്നാം പീരിയഡില്‍ അധ്യാപികമാരെത്തുമ്ബോഴേക്കും കുട്ടികള്‍ ചുമയ്ക്കുന്നതും മൂക്കുപിടിക്കുന്നതുമൊക്കെയാണ് കാണുന്നത്. ഉടൻ എല്ലാവരോടും പുറത്തേക്ക് പോകാൻ അതത് ക്ലാസിലെ അധ്യാപകർ പറഞ്ഞു. ക്ലാസില്‍നിന്ന് വരാന്തയിലേക്കിറങ്ങിയപ്പോള്‍ അവിടെയും പുകപടലം. അപ്പോഴേക്കും പല കുട്ടികളും കുഴഞ്ഞു വീണിരുന്നു.
പ്രിൻസിപ്പല്‍ സിസ്റ്റർ അനിതാ ജോസഫ്, പി.ടി.എ. പ്രസിഡന്റ് ബഷീർ ആറങ്ങാടി, പി.ടി.എ. വൈസ് പ്രസിഡന്റ് പി.വി.രാജേഷ് എന്നിവരും അവിടെയുണ്ടായിരുന്ന ചില രക്ഷിതാക്കളും കുട്ടികളെ ആസ്പത്രികളിലെത്തിക്കുന്നതിലേർപ്പെട്ടു. കാഞ്ഞങ്ങാട് നഗരസഭാധ്യക്ഷ കെ.വി.സുജാത, മുൻ അധ്യക്ഷൻ വി.വി.രമേശൻ, കാഞ്ഞങ്ങാട് സബ് കളക്ടർ സുഫിയാൻ അഹമ്മദ്, ഹൊസ്ദുർഗ് തഹസില്‍ദാർ എം.മായ, ജില്ലാ മെഡിക്കല്‍ ഓഫീസർ ഡോ. എ.വി.രാംദാസ്, ഹൊസ്ദുർഗ് ഡെപ്യൂട്ടി തഹസില്‍ദാർ എം.എസ്.ലിജിൻ, വിവിധ രാഷ്ട്രീയപ്പാർട്ടി നേതാക്കള്‍, നാട്ടുകാർ, രക്ഷിതാക്കള്‍ എന്നിവരെല്ലാം വിവരമറിഞ്ഞ് ആസ്പത്രിയിലെത്തി.
ഉണർന്നുപ്രവർത്തിച്ച്‌ ഡോക്ടർമാർ
കാഞ്ഞങ്ങാട്:പി.ടി.എ. പ്രസിഡന്റ് ബഷീർ ആറങ്ങാടിയും വൈസ് പ്രസിഡന്റ് പി.വി. രാജേഷും ചേർന്നാണ് ഗുരുതരാവസ്ഥയിലുള്ള കുട്ടികളെ ജില്ലാ ആസ്പത്രിയിലെത്തിച്ചത്. സ്ത്രീകളുടെയും കുട്ടികളുടെയും ആസ്പത്രിയിലെത്തിച്ച കുട്ടികളെ ഡോക്ടർമാരായ സൂര്യഗായത്രി, മൈഥിലി, അശ്വതി എന്നിവർ പരിശോധിച്ചു. വൈകാതെ ജില്ലാ ആസ്പത്രിയില്‍നിന്നുള്ള ഡോ. ഷർബാന, മിനി എന്നിവരും ഈ ആസ്പത്രിയിലെത്തി. കാര്യങ്ങള്‍ ഏകോപിപ്പിച്ച്‌ സൂപ്രണ്ട് ബി. സന്തോഷ് എല്ലാത്തിനും നേതൃത്വം നല്‍കി.
ജനറേറ്ററിന്റെ പുകക്കുഴല്‍ ഉയർത്തിയില്ല, അധികൃതരുടെ അനാസ്ഥയെന്ന് ആക്ഷേപം
സ്കൂള്‍ കെട്ടിടവും ആസ്പത്രി കെട്ടിടവും മതിലിന് ഇരുപുറവുമാണെങ്കിലും രണ്ടു കെട്ടിടങ്ങളുംതമ്മില്‍ മീറ്ററുകളുടെ അകലമേയുള്ളൂ. ആസ്പത്രിയുടെ ജനറേറ്റർ വെച്ചിരിക്കുന്നിടത്തുനിന്ന് ലിറ്റില്‍ ഫ്ളവർ സ്കൂളിലെ മുകള്‍ നിലയിലെ ക്ലാസ് മുറികളിലേക്ക് വെറും ആറു മീറ്റർ മാത്രം അകലം.
ഓരോ പ്രാവശ്യവും ജനറേറ്റർ പ്രവർത്തിപ്പിക്കുമ്ബോഴും ഇതില്‍ നിന്നുള്ള പുക സ്കൂളിലേക്കാണ് പടരുന്നത്. വ്യാഴാഴ്ച പുക അമിതമായതിനാലാണ് കുട്ടികള്‍ക്ക് ശ്വാസം മുട്ടലുണ്ടായത്. പുകക്കുഴല്‍ ഉയർത്തിയാലും മൂന്നു നിലകളിലുള്ള സ്കൂള്‍ കെട്ടിടത്തിനേക്കാള്‍ ഉയരത്തില്‍ സ്ഥാപിക്കുകയെന്നത് പ്രായോഗികമാകില്ല. അതിനാല്‍ ജനറേറ്ററിന്റെ സ്ഥാനം തന്നെ മാറ്റാൻ ആലോചിക്കുന്നുവെന്ന് ആസ്പത്രി സൂപ്രണ്ട് ബി. സന്തോഷ് പറഞ്ഞു.
ഒരു അഭിപ്രായം പോസ്റ്റ് ചെയ്യൂ