ബസിനു തടസ്സമുണ്ടാക്കി യാത്ര; ഹോൺ അടിച്ചതോടെ വടിവാൾ വീശി ഓട്ടോക്കാരൻ

കൊണ്ടോട്ടി
ബസിനു മുൻപില്‍ വടിവാള്‍ വീശി ഓട്ടോ യാത്ര. ദേശീയപാതയില്‍ കൊട്ടപ്പുറം മുതല്‍ എയർപോർട്ട് ജംക്‌ഷൻ വരെ ആയിരുന്നു ഓട്ടോയുടെ പേടിപ്പിക്കുന്ന യാത്ര.

സംഭവത്തില്‍ ബസ് ജീവനക്കാർ കൊണ്ടോട്ടി പൊലീസില്‍ പരാതി നല്‍കി. കോഴിക്കോട്ടുനിന്നു മഞ്ചേരിയിലേക്കു പോകുകയായിരുന്ന സ്വകാര്യ ബസിനു മുൻപിലാണ് വടിവാള്‍ വീശി ഓട്ടോഡ്രൈവറുടെ അഭ്യാസം. ഇതിന്റെ വിഡിയോ ദൃശ്യം പുറത്തുവന്നു.

വെള്ളിയാഴ്ച വൈകിട്ട് ആറരയോടെയാണു സംഭവം. ബസ് ജീവനക്കാർ പറയുന്നതിങ്ങനെ: ''പുളിക്കലില്‍ ബസ് നിർത്തിയപ്പോള്‍ പ്രായമായ സ്ത്രീ ഉള്‍പ്പെടെ 2 സ്ത്രീകള്‍ ഇറങ്ങാനുണ്ടായിരുന്നു. അവർ സാവധാനം സമയമെടുത്താണ് ഇറങ്ങിയത്. ഇതിനിടെ, പിറകില്‍നിന്ന് ഒരു ഓട്ടോറിക്ഷ ഹോണടിക്കുന്നുണ്ടായിരുന്നു. പെട്ടെന്നു ബസ് മുന്നോട്ടെടുക്കാൻ പറ്റാത്ത സാഹചര്യമായിരുന്നു. സ്ത്രീകള്‍ ഇറങ്ങിയ ശേഷം ബസ്സെടുത്തപ്പോള്‍, മുൻപോട്ടു വന്ന ഓട്ടോറിക്ഷ ബസിനു തടസ്സമുണ്ടാക്കുന്ന രീതിയിലാണ് ആദ്യം ഓടിച്ചത്.

പിന്നീട് ഓട്ടോയില്‍നിന്നു വടിവാള്‍ പുറത്തേക്കിട്ടു വീശിക്കാണിച്ചു. തലേക്കര മുതല്‍ കൊളത്തൂർ എയർപോർട്ട് റോഡ് ജംക്‌ഷൻ വരെ ഇതു തുടർന്നു. പിന്നീട് ഓട്ടോറിക്ഷ എയർപോർട്ട് റോഡിലേക്കു പോയി. കൊണ്ടോട്ടിയില്‍ എയ്ഡ് പോസ്റ്റിലെത്തി പൊലീസില്‍ പരാതിപ്പെട്ടാണ് യാത്ര തുടർന്നത്. ഇന്നു പൊലീസില്‍ വിശദമായ മൊഴി നല്‍കി.

Post a Comment

വളരെ പുതിയ വളരെ പഴയ