ഉദുമ
പ്രതിപക്ഷ നേതാവ് വി.ഡി. സതീശൻ സഞ്ചരിച്ച ഔദ്യോഗിക വാഹനം കാഞ്ഞങ്ങാട്- കാസർകോട് സംസ്ഥാനപാതയില്‍ അപകടത്തില്‍പ്പെട്ടു.
കാറിൻ്റെ മുൻഭാഗം ഭാഗികമായി തകർന്നു. യാത്രക്കാർക്ക് പരിക്കില്ല.
ശനിയാഴ്ച വൈകിട്ട് അഞ്ചരയോടെ സംസ്ഥാനപാതയില്‍ ബേക്കല്‍ ഫോർട്ട് റെയില്‍വേ സ്റ്റേഷൻ റോഡിലേക്ക് തിരിയുന്നിടത്താണ് അപകടം നടന്നത്. കാഞ്ഞങ്ങാട് നിന്ന് മംഗളൂരു ഭാഗത്തേക്ക് പോകുകയായിരുന്നു പ്രതിപക്ഷ നേതാവ്. ബേക്കല്‍ ഫോർട്ട് റെയില്‍വേ സ്റ്റേഷൻ റോഡിലേക്ക് തിരിയുന്നിടത്ത് വെച്ച്‌ ഔദ്യോഗിക വാഹനത്തിന് മുൻപില്‍ പോയ പൈലറ്റ് വാഹനത്തിന് കുറുകെ മറ്റൊരു വാഹനം എത്തിയതാണ് അപകടത്തിന് കാരണമെന്ന് ദൃക്സാക്ഷികള്‍ പറഞ്ഞു.
ഈ വാഹനത്തില്‍ ഇടിക്കാതിരിക്കാന് ഔദ്യോഗിക വാഹനത്തിന് മുന്നില് പോയിരുന്ന പൈലറ്റ് വാഹനം പെട്ടെന്ന് നിർത്തി. പിറകെ ഉണ്ടായിരുന്ന കാർ നിയന്ത്രണം വിട്ട് അകമ്ബടി വാഹനത്തിന്റെ പിന്നില് ഇടിക്കുകയായിരുന്നു. യാത്രക്കാരെല്ലാം സുരക്ഷിതരാണ്. പിന്നിലുണ്ടായിരുന്ന മറ്റൊരു വാഹനത്തില്‍ പ്രതിപക്ഷ നേതാവ് കാസർകോട് ഭാഗത്തേക്ക് യാത്ര തുടർന്നു. കൊല്ലൂർ മൂകാംബിക ക്ഷേത്രത്തിലേക്ക് പോവുകയായിരുന്നു വി.ഡി. സതീശൻ. ശനിയാഴ്ച വി.ഡി.സതീശന് ജില്ലയില്‍ പരിപാടികള്‍ ഉണ്ടായിരുന്നില്ല.
അപകടത്തെക്കുറിച്ച്‌ വി.ഡി. സതീശൻ ഫെയ്സ്ബുക്കില്‍ പങ്കുവെച്ച കുറിപ്പ്:
കണ്ണൂരില്‍ നിന്ന് കാസർകോട്ടേക്കുള്ള യാത്രാമധ്യേ കാഞ്ഞങ്ങാടിനടുത്ത് ബേക്കല്‍ പള്ളിക്കരയില്‍ വച്ച്‌ ഞാൻ സഞ്ചരിച്ചിരുന്ന വാഹനം അപകടത്തില്‍പ്പെട്ടു.
നല്ല മഴയായിരുന്നു. സമീപത്തെ പെട്രോള്‍ പമ്ബില്‍ നിന്ന് ഇറങ്ങിവന്ന വാഹനത്തില്‍ തട്ടാതിരിക്കാൻ പോലിസ് പൈലറ്റ് ജീപ്പിന് മുന്നിലുണ്ടായിരുന്ന കാറുകള്‍ പെട്ടെന്ന് നിർത്തി. തൊട്ട് മുന്നില് പോയിരുന്ന കാറില്‍ പൈലറ്റ് വാഹനം ഇടിച്ചു. ഞാൻ സഞ്ചരിച്ചിരുന്ന വാഹനം പൈലറ്റ് ജീപ്പിൻ്റെ പിൻഭാഗത്തും ഇടിച്ചു. ഞാനടക്കം വാഹനത്തില്‍ ഉണ്ടായിരുന്ന ആർക്കും പരിക്കില്ല.
മാധ്യമങ്ങളിലൂടെ വാർത്ത അറിഞ്ഞ് നിരവധി പേർ വിളിക്കുന്നത് കൊണ്ടാണ് ഈ കുറിപ്പ് ഇടുന്നത്.
നേരിട്ടും അല്ലാതെയും കാര്യങ്ങള്‍ അന്വേഷിച്ച എല്ലാവർക്കും നന്ദി. മറ്റൊരു വാഹനത്തില്‍ കൊല്ലൂർ മൂകാംബിക ക്ഷേത്രത്തിലേക്ക് യാത്ര തുടരുന്നു.
ഒരു അഭിപ്രായം പോസ്റ്റ് ചെയ്യൂ