കേരള പോലീസ് സേനയില്‍ ഉയരുന്ന ആത്മഹത്യാ നിരക്ക് ആശങ്കജനിപ്പിക്കുന്നതാണെന്ന് വ്യക്തമാക്കുന്നതാണ് കഴിഞ്ഞ ദിവസം നിയമസഭയില്‍ നടന്ന ചർച്ചകള്‍.
കഴിഞ്ഞ ഒരാഴ്ചക്കിടെ സംസ്ഥാനത്ത് അഞ്ച് പോലീസുകാരാണ് ആത്മഹത്യചെയ്തത്. കഠിനമായ ജോലിഭാരം കൊണ്ടുള്ള മാനസിക സമ്മർദമാണ് മിക്കവരുടെയും ആത്മഹത്യക്ക് കാരണമെന്നാണ് സേനാംഗങ്ങള്‍ പറയുന്നത്. മറ്റ് കാരണങ്ങളുണ്ടെങ്കിലും അതിലേക്ക് എല്ലാം നയിക്കുന്നതും ജോലിസമ്മർദം തന്നെ.
പോലീസുകാരുടെ ജോലിസമ്മർദ്ദം കുറയ്ക്കാൻ കൊണ്ടുവന്ന കൗസിലിങ്ങും യോഗയും കൊണ്ട് കാര്യമുണ്ടായില്ലെന്ന് വ്യക്തം. 48 മണിക്കൂറുകള്‍ തുടർച്ചയായി ജോലി ചെയ്യേണ്ടിവരുന്നതുള്‍പ്പെടെ വലിയ സമ്മർദ്ദങ്ങള്‍ നേരിടുന്ന മേഖലയാണ് കേരള പോലീസ് സേന. ആവശ്യത്തിന് പോലീസുകാരുടെ അഭാവം, കുറ്റാന്വേഷണം, ക്രമസമാധാന പാലനം, വിഐപി ഡ്യൂട്ടി തുടങ്ങി നിരവധി വിഷയങ്ങള്‍ കൈകാര്യം ചെയ്യേണ്ടി വരുന്നതിനിടയില്‍ സമ്മർദ്ദം കുറയ്ക്കാൻ എന്താണ് ചെയ്യേണ്ടത് എന്നതിന് പല വാദങ്ങളുമുണ്ട്. അത് പരിശോധിക്കാം.
സമ്മർദ്ദ ജീവിതത്തില്‍നിന്ന് രക്ഷപ്പെടുന്ന പോലീസുകാർ
എ.എസ്.ഐ ജിമ്മി ജോർജ്. പോലീസ് അക്കാദമിയിലെ പഴയ ആശുപത്രി കെട്ടിടത്തില്‍ തൂങ്ങിമരിച്ചു. ആലപ്പുഴ എ.ആർ ക്യാമ്ബിലെ പോലീസ് ഡ്രൈവർ സുധീഷിനെ വീടിനുളളില്‍ തൂങ്ങിമരിച്ച നിലയില്‍ കണ്ടെത്തി. എറണാകുളം, ഇൻഫോപാർക്ക് സ്റ്റേഷനിലെ സി.പി.ഒ മധുവിനെ വീട്ടില്‍ തൂങ്ങിമരിച്ച നിലയില്‍ കണ്ടെത്തി. വണ്ടൻമേട് സ്റ്റേഷനിലെ കോണ്‍സ്റ്റബിള്‍ രതീഷിനെ ലോഡ്ജില്‍ മരിച്ചനിലയില്‍ കണ്ടെത്തി. വിഴിഞ്ഞം സ്റ്റേഷനിലെ എ.എസ്.ഐ ജോർജ് കുരുവിളയെ കോട്ടയത്തെ വീട്ടില്‍ മരിച്ചനിലയില്‍ കണ്ടെത്തി. കേരളത്തില്‍ കഴിഞ്ഞ ആഴ്ചകളില്‍ ആത്മഹത്യ ചെയത പോലീസുകാരെ പറ്റി മാധ്യമങ്ങളില്‍ വന്ന വാർത്തകളാണ് ഇതൊക്കെ.
പോലീസുകാരനെ മരിച്ചനിലയില്‍ കണ്ടെത്തി, ആത്മഹത്യചെയ്ത നിലയില്‍ എന്നൊക്കെ കേള്‍ക്കുമ്ബോള്‍ അതിനെ വാർത്തകള്‍ക്കപ്പുറത്തേക്ക് നോക്കാൻ ആരും മെനക്കെടാറില്ല. കർഷകരുടെ ആത്മഹത്യ നമ്മെ ആശങ്കപ്പെടുത്തിയിരുന്നു. അതിലേറെ ആശങ്കയുണ്ടാക്കുന്നു സമൂഹത്തിന്റെ കാവല്‍ക്കാരായ പോലീസുകാരുടെ ആത്മഹത്യാ പരമ്പര. പോലീസുകാരുടെ ആത്മഹത്യ ഇന്നോ ഇന്നലെയൊ തുടങ്ങിയതല്ല. പക്ഷെ, അതിന്റെ എണ്ണം പെട്ടെന്ന് കൂടുന്നത് 2015 മുതലാണ്. കഴിഞ്ഞ അഞ്ച് വർഷത്തിനിടെ കേരള പോലീസില്‍ ആത്മഹത്യചെയ്ത പോലീസുകാരുടെ എണ്ണം 88 ആണെന്നതാണ് സർക്കാരിന്റെ തന്നെ കൈവശമുള്ള കണക്ക്.
2015-നും 2019-നും ഇടയില്‍ മാത്രം 51 പോലീസുകാരാണ് ജീവനൊടുക്കിയത്. 2016-ല്‍ മാത്രം 16 പേർ സ്വയം ജീവിതം അവസാനിപ്പിച്ചു. ഇങ്ങനെ പോയാല്‍ അഭിമാനത്തോടെയും ബഹുമാനത്തോടെയും കാണുന്ന കാക്കി യൂണിഫോമിനെ മരണത്തിന്റെ കുപ്പായമായി കാണേണ്ടിവരും. കഴിഞ്ഞ വർഷം രണ്ട് ഐ.ജി.മാർ സമഗ്രപഠനം നടത്തി, പോലീസ് മേധാവിക്ക് ഒരു റിപ്പോർട്ട് സമർപ്പിച്ചിരുന്നു. പോലീസ് സേനയില്‍ ആത്മഹത്യാപ്രവണത കൂടുന്നു എന്നായിരുന്നു കണ്ടെത്തല്‍. അമിത ജോലിഭാരവും വിശ്രമമില്ലായ്മയുമാണ് മാനസിക പിരിമുറക്കത്തിന് കാരണമെന്നാണ് ഈ റിപ്പോർട്ടില്‍ പറഞ്ഞത്. ജോലിഭാരവും കുടുംബപ്രശ്നങ്ങളും കാര്യങ്ങള്‍ സങ്കീർണമാക്കുന്നു.
മേലുദ്യോഗസ്ഥരുടെ പീഡനമാണ് സംസ്ഥാനത്ത് പോലീസ് ആത്മഹത്യകള്‍ക്ക് പിന്നിലുള്ള മറ്റൊരു കാരണമെന്നാണ് റിപ്പോർട്ടില്‍ പറയുന്നത്. കുടുംബാംഗങ്ങള്‍ക്ക് ഒപ്പം ചെലവഴിക്കാൻ സമയം കിട്ടുന്നില്ല. മാനസിക സമ്മർദം ഏറുമ്ബോള്‍ ലഹരിയിലേക്ക് വഴിമാറുന്നു, ചിലർ. പിന്നീട് കടുത്ത ആരോഗ്യ പ്രശ്നങ്ങളും സാമ്ബത്തിക പ്രതിസന്ധിയും. പോലീസ് സേനയിലെ സിവില്‍ പോലിസ് ഉദ്യോഗസ്ഥർ നേരിടുന്നത് വലിയ പ്രതിസന്ധികളാണ്. സ്വന്തം കുടുംബത്തിനൊപ്പം സമയം ചെലവഴിക്കാൻ സാധിക്കാതെവരുമ്ബോള്‍ ഉണ്ടാകുന്ന വിരക്തി ലഹരി ഉപയോഗത്തിലേക്ക് കൊണ്ടുപോകും. പതിയെ ഈ പ്രശ്നം സാമ്ബത്തിക പ്രയാസത്തിലേക്കും കുടുംബ ബന്ധങ്ങള്‍ താളംതെറ്റുന്നതിനും വഴിവെക്കുന്നു.
സ്റ്റേഷനുകളില്‍ ആവശ്യത്തിന് പോലീസ് ഉദ്യോഗസ്ഥരില്ലാത്തതാണ് ഒരു പ്രശ്നം. ജോലിക്കുവേണ്ടി റാങ്ക് പട്ടികയിലുള്ളവർ തെരുവില്‍ സമരംചെയ്യുന്ന സമയത്തുപോലും ജോലിഭാരം കാരണം ആത്മഹത്യചെയ്യേണ്ടിവരുന്ന പോലീസുകാരെപ്പറ്റി ആഭ്യന്തരവകുപ്പ് കാര്യമായി ചിന്തിച്ചില്ല എന്നതാണ് ദുഃഖകരമായ വസ്തുത. അതിന് പുറമെയാണ് സർക്കാരിന്റെ ഖജനാവ് നിറയ്ക്കല്‍ എന്ന പെറ്റിക്കേസ് ജോലിയും. സർക്കാരിന് വരുമാനം കൂട്ടാൻ പെറ്റി കേസ് ടാർജറ്റ് നലകിയിട്ടുണ്ട് പോലീസുകാർക്ക്. അത് തകിയ്ക്കാത്തവർക്ക് ശകാരവർഷം നിശ്ചയമാണ്.
മറ്റുള്ളവർ കേള്‍ക്കെ വയർലെസുവഴി പേരെടുത്തുപറഞ്ഞ് സഹപ്രവർത്തകർക്കിടയില്‍ ഉദ്യോഗസ്ഥരെ ശാസിക്കുന്ന മേലുദ്യോഗസ്ഥർ തങ്ങളുടെ താഴെയുള്ളവരെ മാനസിക സമ്മർദ്ദത്തിലാഴ്ത്തുന്നു. പിതാവിന്റെ പ്രയമുള്ള പോലീസുകാരെ പ്രായത്തില്‍ കുറഞ്ഞ ഏമാൻമാർ ഏടാ പോടാ എന്ന് വിളിക്കുന്നത് പതിവാണ്. കേള്‍ക്കുന്നയാളുടെ മാനസിക പ്രയാസം പരിഗണിക്കപ്പെടുന്നതേയില്ല. പേരെടുത്ത് വിളിക്കാൻ പോലും മനസ്സുകാണിക്കാത്ത ഇവർ എങ്ങനെ പൊതുജനത്തെ സേവിക്കുന്ന ജനമൈത്രി പോലീസിന്റെ ഉയർന്ന തലത്തിലിരിക്കുന്നുവെന്ന് ചിന്തിച്ച്‌ നോക്കിയിട്ടുണ്ടോ?
കഴിഞ്ഞ ദിവസങ്ങളിലൊക്കെ നടന്ന മരണങ്ങളില്‍ പോലീസുകാർ ആശങ്കയിലാണ്. കൂടെ ജോലിചെയ്തവർ പിടിച്ചുനില്‍ക്കാനാകാതെ വിടപറയുമ്ബോള്‍ സഹപ്രവർത്തകരുടെയും ഉളളുലയകയാണ്. സമൂഹത്തിന്റെ കെട്ടുറപ്പിന് ബലംനല്‍കുന്ന പോലീസ് സേന ആത്മവീര്യംനഷ്ടമായി ഉലയുകയാണോ എന്ന ചോദ്യവും ഇയരുന്നു. കഴിഞ്ഞ കുറെ ആഴ്ചകളിലായി പോലീസ് സേനാംഗങ്ങളുടെ വാട്സ് ആപ് ഗ്രൂപ്പുകളിലും ആത്മഹത്യ ചർച്ചാവിഷയമായിരുന്നു, ഐ.പി.എസ്. ഉദ്യോഗസ്ഥരുടെ മനോഭാവം മുതല്‍ സേനയ്ക്കുളളിലെ രാഷ്ട്രീയ വേർതിരിവ് വരെ വിമർശന വിധേയമാണ് ഈ ഗ്രൂപ്പുകളില്‍. പോലീസ് സേനയെ രക്ഷപ്പെടുത്താൻ മുഖ്യമന്ത്രിയോടുള്ള വിലാപങ്ങളുമുണ്ടതില്‍.
118 പേരുടെ ജോലി ചെയ്യുന്നത് 44 പോലീസുകാർ
പൊലീസുദ്യോഗസ്ഥരുടെ ജോലിഭാരവും മാനസിക സമ്മർദ്ദവും അടക്കമുള്ള പ്രശ്നങ്ങള്‍ നിയമസഭയില്‍ ഉന്നയിച്ച്‌ പ്രതിപക്ഷത്തോട് മുഖ്യമന്ത്രി പറഞ്ഞ മറുപടിയാണ് ശ്രദ്ധേയം. പോലീസ് സേനയില്‍ എട്ടുമണിക്കൂർ ജോലി ഉടൻ നടപ്പിലാക്കാനാകില്ലെന്ന് മുഖ്യമന്ത്രി സഭയെ അറിയിച്ചതോടെ ഇനിയും കാക്കിയിട്ട പോലിസുദ്യോഗസ്ഥർക്ക് ജീവൻ കളയേണ്ടിവരുമെന്ന് ഉറപ്പായി. ജോബിദാസ് എന്ന പോലീസുകാരന്റെ ആത്മഹത്യാക്കുറിപ്പ് പി.സി വിഷ്ണുനാഥ് നിയമസഭയില്‍ വായിച്ചിരുന്നു. നന്നായി പഠിക്കണമെന്നും പോലീസില്‍ അല്ലാതെ മറ്റൊരു ജോലി വാങ്ങണമെന്ന് മക്കള്‍ക്ക് നിർദ്ദേശമുള്ള ഭാഗമാണ് വായിച്ചത്. ഇന്നലെ അതൊരു ജോബിദാസാണ്. നാളെ അത് തങ്ങളില്‍ ആരുമാകാമെന്ന ഭീതി ഓരോ ഉദ്യോഗസ്ഥരിലുമുണ്ട്.
കഴിഞ്ഞ ഒരാഴ്ചക്കിടെ മാത്രം അഞ്ചു പോലീസുകാർ സംസ്ഥാനത്ത് ആത്മഹത്യചെയ്തു. ഈ ആത്മഹത്യകളുടെ പാപഭാരം ആരുടെ കൈകളിലാണ്. കുറഞ്ഞത് 118 പോലീസുകാരെങ്കിലും വേണം ഒരു പോലീസ് സ്റ്റേഷന്റെ പ്രവർത്തനം സുഗമമായി നടക്കാൻ. എന്നാല്‍, സംസ്ഥാനത്തെ മിക്ക പോലീസ് സ്റ്റേഷനുകളിലും 44 പോലീസുകാർ മാത്രമേയുള്ളു. അതിലും കുറവ് പോലീസുകാരുള്ള സ്റ്റേഷനുകളുമുണ്ട്. വനിതാ പോലീസുകാർക്ക് ആവശ്യമായ റെസ്റ്റ് റൂമുകള്‍ പോലുമില്ലാത്ത ഇടുങ്ങിയ മുറികളാണ് എല്ലാ പോലീസ് സ്റ്റേഷനുകളും. ഇത്തരമൊരു അന്തരീക്ഷത്തില്‍ മനഃസമാധാനത്തോടെ എങ്ങനെ ജോലിചെയ്യാൻ സാധിക്കും?
മരിച്ച പോലീസ് ഉദ്യോഗസ്ഥരുടെ മാനസികസമ്മർദ്ദം ഒഴിവാക്കാൻ യോഗ ഉള്‍പ്പെടെ നടത്തിവരികയാണെന്ന് മുഖ്യമന്ത്രി പറയുന്നത്. ആവശ്യത്തിന് വിശ്രമമില്ലാതെ 48 മണിക്കൂറുകളിലധികം തുടർച്ചയായി ജോലി ചെയ്യേണ്ടിവരുന്നവർ എവിടിരുന്നാണ് യോഗ ചെയ്യേണ്ടതെന്ന ചോദ്യം ചോദിക്കുന്നില്ല. സാങ്കേതിക വിദ്യയുടെ ഉപയോഗം വർധിപ്പിച്ച്‌ പോലീസ് സേനയിലെ അംഗബലം എങ്ങനെ കുറയ്ക്കാമെന്നാണ് സർക്കാർ ആലോചിക്കുന്നത്. പക്ഷേ, ക്രമസമാധാന പാലനത്തിന് പോലീസ് സേനയിലെ ആളുകള്‍ തികയാതെവരുന്ന സാഹചര്യം ഉണ്ടായാല്‍ അതിനെ എങ്ങനെ നേരിടണമെന്നതിന് കൃത്യമായ റൂട്ട്മാപ്പ് ആഭ്യന്തരവകുപ്പിനില്ല.
ജോലിയുടെ ഭാഗമായി വരുന്ന സമ്മർദ്ദം പൂർണമായി ഒഴിവാക്കാൻ കഴിയില്ല. എന്നാല്‍, അതിന് കാരണമാകുന്ന പ്രശ്നങ്ങളിലേക്ക് ഒന്ന് തിരിഞ്ഞുനോക്കാനെങ്കിലുമുള്ള മര്യാദ കാണിക്കാൻ തയ്യാറാകണമെന്നതാണ് പ്രധാനം. പോലീസുകാരന്റെ മാനസിക സമ്മർദ്ദം ക്രമസമാധാനത്തെ പോലും ബാധിക്കുമെന്ന യാഥാർഥ്യം കാണാതെപോകരുത്. ഇതിന് പുറമെ ഭരിക്കുന്ന പാർട്ടിയുടെ പ്രാദേശിക നേതാക്കളുടെ വരെ ഇടപെടല്‍ പോലീസ് സേനയില്‍ ഉണ്ടാക്കുന്ന ചേരിതിരിവും കണ്ടില്ലെന്ന് നടിക്കരുത്. പുകയുന്നില്ലെങ്കിലും പോലീസ് സേനയില്‍ നീറിനില്‍ക്കുന്ന പ്രശ്നങ്ങള്‍ നാളെ ഉരുള്‍പൊട്ടല്‍ പോലെ പുറത്തുവന്നാല്‍ അത് സർക്കാരിനും സംസ്ഥാനത്തിനുമുണ്ടാക്കുന്ന പ്രതിച്ഛായാ നഷ്ടം വലുതായിരിക്കും.
ഒരു അഭിപ്രായം പോസ്റ്റ് ചെയ്യൂ