കൊച്ചി
സൈബര്‍ ക്രിമിനലുകള്‍ ആറു മാസത്തിനിടെ കൊച്ചി നഗരവാസികളില്‍ നിന്ന്‌ തട്ടിയെടുത്തത്‌ 25 കോടിയോളം രൂപ.
നാലുകേസുകളില്‍ മാത്രം നഷ്‌ടമായത്‌ 20 കോടിയിലധികം രൂപയാണ്‌. ഇൗ നാലു കേസുകളുടെ അന്വോഷണത്തിനു മാത്രമായി പ്രത്യേക സംഘത്തിനെ നിയോഗിച്ചു. കൊച്ചി സിറ്റി പൊലീസിന്‌ കീഴിലുള്ള പോലീസ്‌ സ്‌റ്റേഷനുകളില്‍ മെയ്‌, ജൂണ്‍ മാസങ്ങളില്‍ മാത്രം രജിസ്‌റ്റര്‍ ചെയ്‌ത കേസുകളിലാണിത്‌. നാനൂറോളം സൈബര്‍ തട്ടിപ്പു കേസുകളാണു ജനുവരി മുതല്‍ ജൂണ്‍ വരെ രജിസ്‌റ്റര്‍ ചെയ്‌തതെന്ന്‌ സിറ്റി പോലീസ്‌ കമ്മിഷണര്‍ എസ്‌. ശ്യാംസുന്ദര്‍ പത്രസമ്മേളനത്തില്‍ പറഞ്ഞു. നാല്‍പത്‌ ശതമാനത്തോളം കേസുകളില്‍ പ്രതികളെ അറസ്‌റ്റു ചെയ്‌തു. പരാതിക്കാര്‍ക്ക്‌ നഷ്‌ടമായ രൂപയില്‍ 30-40 ശതമാനം വീണ്ടെടുക്കാനായതായും കമ്മിഷണര്‍ പറഞ്ഞു. ഡി.സി.പി. കെ.എസ്‌. സുദര്‍ശന്‍ പങ്കെടുത്തു. കറന്‍സി ട്രേഡിങ്‌ വഴി ലാഭമുണ്ടാക്കാമെന്നു പറഞ്ഞു കാക്കനാട്‌ സ്വദേശി ഐ.ടി. കമ്ബനി ഉടമയില്‍ നിന്നു തട്ടിയെടുത്തതു 6,93,20,000 രൂപ.
കമ്ബനിയുടെ വെബ്‌സൈറ്റില്‍ അക്കൗണ്ട്‌ ഉണ്ടാക്കി. തുടര്‍ന്നു കമ്ബനി നിര്‍ദ്ദേശിച്ച പന്ത്രണ്ട്‌ അക്കൗണ്ടുകളിലേയ്‌ക്കു 2023 ആഗസ്‌റ്റ് 19 മുതല്‍ ജൂണ്‍ 24 വരെ കാക്കനാട്‌ സ്വദേശി 6.93 കോടി നല്‍കി. പരാതി ലഭിച്ചത്‌ ഇന്‍ഫോപാര്‍ക്ക്‌ സ്‌റ്റേഷനില്‍. ഡല്‍ഹി പൊലീസ്‌, സി.ബി.ഐ. എന്നിവരുടെ പേര്‌ പറഞ്ഞ്‌ പൂണിത്തുറ സ്വദേശിയില്‍ നിന്ന്‌ തട്ടിയെടുത്തത്‌ 5,99,25,625 രൂപയാണ്‌. തുപൂണിത്തുറയ്‌ക്കെതിരെ ഡല്‍ഹി പൊലീസിന്റെയും സി.ബി.ഐയുടെയും വാറന്റുണ്ടെന്ന്‌ പറഞ്ഞ്‌ സംഘം ഭീഷണിപ്പെടുത്തി. സ്‌കൈപ്പ്‌ വീഡിയോ കോളില്‍ പൊലീസുകാരനായി വേഷം കെട്ടിയെത്തിയായിരുന്നു തട്ടിപ്പ്‌. പത്ത്‌ കമ്ബനികളുടെ അക്കൗണ്ടുകളിലേയ്‌ക്കാണ്‌ പൂണിത്തുറ സ്വദേശി പണം കൈമാറിയത്‌. പരാതി കിട്ടിയത്‌ മരട്‌ സ്‌റ്റേഷനില്‍.
നിങ്ങളുടെ പേരിലെത്തിയ കൊറിയറില്‍ മയക്കുമരുന്നും വ്യാജ പാസ്‌പോര്‍ട്ടുമുണ്ടെന്നു ഭീഷണിപ്പെടുത്തി ജഡ്‌ജസ്‌ അവന്യുവിലെ അറുപത്തിയഞ്ചുകാരിയില്‍ നിന്നു തട്ടിയതു 5.16 കോടി രൂപ. മുംബൈ പോലീസ്‌ ആസ്‌ഥാനത്ത്‌ നിന്നാണെന്നു പറഞ്ഞായിരുന്നു തട്ടിപ്പ്‌. സാമ്ബത്തിക തട്ടിപ്പ്‌ കേസില്‍ അറസ്‌റ്റ് വാറന്റുണ്ടെന്നും ഭീഷണിപ്പെടുത്തി. നിങ്ങളുടെ അക്കൗണ്ടകളിലുള്ള തുക പരിശോധിക്കണമെന്നും വ്യാജ മുംബൈ പോലീസ്‌ പറഞ്ഞു. അവര്‍ നിര്‍ദ്ദേശിച്ച അക്കൗണ്ടുകളിലേയ്‌ക്ക് അറുപത്തിയഞ്ചുകാരി 5.16 കോടി കൈമാറുകയായിരുന്നു. പരാതി ലഭിച്ചത്‌ ടൗണ്‍ നോര്‍ത്ത്‌ സ്‌റ്റേഷനില്‍. ഷെയര്‍ ട്രേഡിങ്‌ വഴി കൂടുതല്‍ പണമുണ്ടാക്കാമെന്ന്‌ പറഞ്ഞ്‌ മറൈന്‍ഡ്രൈവിലെ ഫ്‌ളാറ്റില്‍ താമസിക്കുന്ന അറുപതുകാരനില്‍ നിന്ന്‌ തട്ടിയെടുത്തത്‌ 3,37,65,000 രൂപ. സമൂഹ മാധ്യമങ്ങള്‍ വഴി ട്രേഡിങ്‌ നടത്തി പബണമുണ്ടാക്കാമെന്നു വാഗ്‌ദാനം നല്‍കിയായിരുന്നു തട്ടിപ്പ്‌. പരാതി ലഭിച്ചതു സെന്‍ട്രല്‍ സ്‌റ്റേഷനിലായിരുന്നു. സംഭവത്തില്‍ നാലുകേസുകള്‍ രജിസ്‌റ്റര്‍ ചെയ്‌തിരുന്നു.
ഒരു അഭിപ്രായം പോസ്റ്റ് ചെയ്യൂ