ന്യൂഡല്‍ഹി: വിദ്വേഷം തുടച്ചുനീക്കുന്നതുവരെ യാത്ര തുടരുമെന്ന് രാഹുല്‍ ഗാന്ധി. ഇന്ത്യ ഒന്നിക്കുമെന്നും ഇത് തന്‍റെ വാഗ്ദാനമാണെന്നും രാഹുല്‍ ഗാന്ധി പറഞ്ഞു.
ഭാരത് ജോഡോ യാത്രയുടെ ഒന്നാം വാര്‍ഷികത്തോടനുബന്ധിച്ച്‌ സമൂഹമാധ്യമമായ എക്സില്‍ പങ്കുവെച്ച കുറിപ്പിലാണ് രാഹുല്‍ ഗാന്ധിയുടെ പരാമര്‍ശം.
ഭാരത് ജോഡോ യാത്രയുടെ ഐക്യത്തിലേക്കും സ്നേഹത്തിലേക്കുമുള്ള കോടിക്കണക്കിന് ചുവടുകള്‍ രാജ്യത്തിന് നല്ല നാളെയുടെ അടിത്തറയായി മാറിയെന്ന് യാത്രയുടെ വീഡിയോ പങ്കുവെച്ചുകൊണ്ട് അദ്ദേഹം പറഞ്ഞു.
ഭാരത് ജോഡോ യാത്രയില്‍ 12 പൊതുയോഗങ്ങളിലും 100ല്‍ അധികം തെരുവുകളിലും 13 വാര്‍ത്താസമ്മേളനങ്ങളിലും രാഹുല്‍ ഗാന്ധി സംസാരിച്ചിരുന്നു.
പാര്‍ട്ട് ടൈം രാഷ്ട്രീയക്കാരനില്‍ നിന്ന് പക്വതയുള്ള, എതിരാളികള്‍ ഗൗരവമായി എടുക്കുന്ന വ്യക്തിയിലേക്കുള്ള രാഹുല്‍ ഗാന്ധിയുടെ പരിവര്‍ത്തനമായിരുന്നു ഭാരത് ജോഡോ യാത്രയെന്ന് വിദഗ്ധര്‍ അഭിപ്രായപ്പെട്ടിരുന്നു. 4,000 കിലോമീറ്ററിലധികമുണ്ടായിരുന്ന യാത്രക്കിടെ കമല്‍ഹാസൻ, പൂജാ ഭട്ട്, റിയ സെൻ, സ്വര ഭാസ്‌കര്‍, രഷാമി ദേശായി, ആകാൻക്ഷ പുരി, അമോല്‍ പലേക്കര്‍ തുടങ്ങിയ സെലിബ്രിറ്റികള്‍ ഉള്‍പ്പെടെ സമൂഹത്തിന്റെ വിവിധ ഭാഗങ്ങളില്‍ നിന്നുള്ളവര്‍ യാത്രയില്‍ പങ്കുചേര്‍ന്നു.
നാഷനല്‍ കോണ്‍ഫറൻസ് നേതാക്കളായ ഫാറൂഖ് അബ്ദുല്ല, ഉമര്‍ അബ്ദുല്ല, പി.ഡി.പി നേതാവ് മെഹബൂബ മുഫ്തി, ശിവസേന നേതാക്കളായ ആദിത്യ താക്കറെ, പ്രിയങ്ക ചതുര്‍വേദി, സഞ്ജയ് റാവുത്ത്, എൻ.സി.പിയുടെ സുപ്രിയ സുലെ എന്നിവരും ഭാരത് ജോഡോ യാത്രയില്‍ വിവിധ സമയങ്ങളില്‍ രാഹുല്‍ ഗാന്ധിക്കൊപ്പം പങ്കുചേരാനെത്തിയിരുന്നു.
ഒരു അഭിപ്രായം പോസ്റ്റ് ചെയ്യൂ